ਨਵੀਂ ਦਿੱਲੀ, 29 ਜਨਵਰੀ (ਮਿਸਰਦੀਪ ਭਾਟੀਆ)-ਦਿੱਲੀ ਦੇ ਚਾਰ ਪ੍ਰਾਈਵੇਟ ਸਕੂਲਾਂ ਨੂੰ ਧਮਕੀ ਭਰੇ ਈ-ਮੇਲ ਮਿਲੇ ਹਨ | ਇਨ੍ਹਾਂ ਵਿਚ ਸਕੂਲਾਂ ਨੂੰ ਉਡਾਉਣ ਦੀ ਧਮਕੀ ਦਿੱਤੀ ਗਈ ਹੈ | ਮਾਮਲੇ ਦੀ ਸੂਚਨਾ ਮਿਲਦੇ ਹੀ ਪੁਲਿਸ ਮੌਕੇ 'ਤੇ ਪਹੁੰਚੀ | ਹਾਲਾਂਕਿ ਪੁਲਿਸ ਨੂੰ ਅਜੇ ਤੱਕ ਕੁਝ ਵੀ ਸ਼ੱਕੀ ਨਹੀਂ ਮਿਲਿਆ ਹੈ | ਦਿੱਲੀ ਕੈਂਟ ਏਰੀਆ ਦੇ ਲੋਰੇਟੋ ਕਾਨਵੈਂਟ ਸਕੂਲ ਨੂੰ ਸਵੇਰੇ 8.22 ਵਜੇ ਇਕ ਧਮਕੀ ਭਰਿਆ ਫੋਨ ਆਇਆ | ਇਸ ਤੋਂ ਬਾਅਦ ਸਵੇਰੇ 9.18 ਵਜੇ ਸੀ.ਆਰ. ਪਾਰਕ ਦੇ ਡੌਨ ਬੋਸਕੋ ਸਕੂਲ ਵਿਚ ਵੀ ਇਸੇ ਤਰ੍ਹਾਂ ਦਾ ਫੋਨ ਆਇਆ | ਆਨੰਦ ਨਿਕੇਤਨ ਦੇ ਕਾਰਮਲ ਸਕੂਲ ਨੂੰ ਵੀ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ | ਸਕੂਲ ਨੂੰ 9.22 ਵਜੇ ਧਮਕੀ ਭਰਿਆ ਈ-ਮੇਲ ਮਿਲਿਆ | ਦਵਾਰਕਾ ਦੇ ਸੈਕਟਰ 23 ਦੇ ਕਾਰਮਲ ਸਕੂਲ ਨੂੰ ਵੀ 9.25 ਮਿੰਟ 'ਤੇ ਅਜਿਹਾ ਹੀ ਈ-ਮੇਲ ਮਿਲਿਆ | ਲੋਰੇਟੋ ਕਾਨਵੈਂਟ, ਡੌਨ ਬੋਸਕੋ, ਆਨੰਦ ਨਿਕੇਤਨ ਕਾਰਮਲ ਸਕੂਲ ਅਤੇ ਦਵਾਰਕਾ ਕਾਰਮਲ ਸਕੂਲ ਵਿਚ ਧਮਕੀ ਦੀ ਸੂਚਨਾ ਮਿਲਣ ਤੋਂ ਬਾਅਦ ਪੁਲਿਸ ਟੀਮਾਂ ਮੌਕੇ 'ਤੇ ਸਕੂਲਾਂ ਵਿਚ ਪਹੁੰਚ ਗਈਆਂ | ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਸਕੂਲਾਂ ਦੀ ਤਲਾਸ਼ੀ ਲਈ ਜਾ ਰਹੀ ਹੈ | 28 ਜਨਵਰੀ ਨੂੰ ਗੁਰੂਗ੍ਰਾਮ ਦੇ 13 ਵੱਡੇ ਸਕੂਲਾਂ ਨੂੰ ਵੀ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ ਸੀ |
