ਲੰਡਨ, 26 ਮਾਰਚ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ) -ਭਾਰਤ ਦੇ ਪ੍ਰਮੁੱਖ ਨਿਲਾਮੀ ਘਰ ਅਸ਼ਟਗੁਰੂ ਨੇ ਵਿਸ਼ਵ ਪੱਧਰ 'ਤੇ ਆਪਣੇ ਪੈਰ ਪਸਾਰਦਿਆਂ ਲੰਡਨ ਵਿਚ ਆਪਣਾ ਪਹਿਲਾ ਅੰਤਰਰਾਸ਼ਟਰੀ ਦਫ਼ਤਰ ਖੋਲ੍ਹ ਕੇ ਇਕ ਵੱਡੀ ਪ੍ਰਾਪਤੀ ਹਾਸਲ ਕੀਤੀ ਹੈ | ਇਹ ਨਵਾਂ ਦਫ਼ਤਰ ਲੰਡਨ ਦੇ ਮਸ਼ਹੂਰ ਸਾਊਥ ਕੈਂਸਿੰਗਟਨ ਇਲਾਕੇ ਵਿਚ ਖੋਲਿ੍ਹਆ ਗਿਆ ਹੈ, ਜੋ ਕਿ ਕਲਾ ਤੇ ਸੱਭਿਆਚਾਰ ਦਾ ਕੇਂਦਰ ਮੰਨਿਆ ਜਾਂਦਾ ਹੈ | ਇਸ ਦਾ ਮੁੱਖ ਮਕਸਦ ਯੂਰਪੀਅਨ ਸੰਗ੍ਰਹਿ ਕਰਤਾਵਾਂ ਤੇ ਉੱਥੇ ਰਹਿ ਰਹੇ ਭਾਰਤੀ ਭਾਈਚਾਰੇ ਤੱਕ ਪਹੁੰਚ ਬਣਾਉਣਾ ਹੈ | ਅਸ਼ਟਗੁਰੂ ਲੰਡਨ ਵਿਚ ਆਪਣੀ ਪਹਿਲੀ ਨਿਲਾਮੀ 27 ਮਈ ਨੂੰ ਕਰਨ ਜਾ ਰਿਹਾ ਹੈ, ਜਿਸ ਵਿਚ ਦੁਨੀਆ ਦੀਆਂ ਬਿਹਤਰੀਨ ਘੜੀਆਂ ਪੇਸ਼ ਕੀਤੀਆਂ ਜਾਣਗੀਆਂ | ਲੰਡਨ ਦੀ ਇਸ ਟੀਮ ਦੀ ਅਗਵਾਈ ਲਰੀਸਾ ਜੇਸੀ ਤੇ ਟਿਮ ਬੋਰਨ ਵਰਗੇ ਤਜਰਬੇਕਾਰ ਮਾਹਰ ਕਰ ਰਹੇ ਹਨ | ਲੰਡਨ ਤੋਂ ਬਾਅਦ, ਅਸ਼ਟਗੁਰੂ ਆਉਣ ਵਾਲੇ ਸਮੇਂ ਵਿਚ ਸਿੰਗਾਪੁਰ ਤੇ ਨਿਊਯਾਰਕ ਵਰਗੇ ਵੱਡੇ ਸ਼ਹਿਰਾਂ ਵਿਚ ਵੀ ਆਪਣੇ ਦਫ਼ਤਰ ਖੋਲ੍ਹਣ ਦੀ ਤਿਆਰੀ ਕਰ ਰਿਹਾ ਹੈ |
