ਟੋਰਾਂਟੋ, 29 ਜਨਵਰੀ (ਹਰਜੀਤ ਸਿੰਘ ਬਾਜਵਾ)-ਓਾਨਟਾਰੀਓ ਦੇ ਨੌਰਥ ਤੇ ਈਸਟ ਸਾਈਡ ਦੇ ਕਈ ਇਲਾਕਿਆਂ 'ਚ ਭੁਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ | ਇੱਥੋਂ ਦੇ ਸਮੇਂ ਅਨੁਸਾਰ ਮੰਗਲਵਾਰ ਤੇ ਬੁੱਧਵਾਰ ਦੀ ਵਿਚਕਾਰਲੀ ਰਾਤ ਨੂੰ ਤਕਰੀਬਨ 11 ਵਜੇ ਦੇ ਕਰੀਬ ਇੱਥੋਂ ਦੇ ਵੱਖ-ਵੱਖ ਖੇਤਰਾਂ 'ਚ ਇਹ ਝਟਕੇ ਮਹਿਸੂਸ ਕੀਤੇ ਜਾਣ ਦੀਆਂ ਖ਼ਬਰਾਂ ਹਨ | ਜਿਸਦੇ ਅਨੁਸਾਰ ਇਸ ਸਬੰਧੀ ਤਕਰੀਬਨ 3000 ਤੋਂ ਵੀ ਵਧੇਰੇ ਲੋਕਾਂ ਵੱਲੋਂ ਵੱਖ ਵੱਖ ਮਾਧਿਅਮਾਂ ਰਾਹੀਂ ਦੱਸਿਆ ਗਿਆ ਕਿ ਕਿਵੇਂ ਉਹਨਾਂ ਨੂੰ ਝਟਕੇ ਲੱਗਣ ਕਾਰਨ ਥੋੜਾ ਡਰ ਮਹਿਸੂਸ ਹੋਇਆ | ਇੱਥੋਂ ਦੇ ਓਰੀਲਿਆ, ਨਿਆਗਰਾ ਫ਼ਾਲਜ਼, ਕਿਚਨਰ, ਬੈਲਵੈਲ,ਟੋਰਾਂਟੋਂ, ਬਿੱਟਬੀ, ਸੈਂਟ ਫੀਲਡ, ਸਕਾਰਬ੍ਰੋ, ਐਸ਼ਬਰਨ, ਈਟੋਬੀਕੋ, ਨਿਉਮਾਰਕੀਟ, ਕੁਇੰਟਵੈਸਟ ਤੇ ਹੋਰ ਸ਼ਹਿਰਾਂ 'ਚ ਵੀ ਲੋਕਾਂ ਵੱਲੋਂ 3.7 ਤੀਬਰਤਾ ਵਾਲੇ ਇਸ ਭੁਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ | ਜਿਸ ਬਾਰੇ ਮਾਹਿਰਾਂ ਤੇ ਇਸ ਸੰਬੰਧੀ ਕੰਮ ਕਰ ਰਹੀਆਂ ਏਜੰਸੀਆਂ ਦਾ ਕਹਿਣਾ ਹੈ ਕਿ ਇਹਨਾਂ ਖੇਤਰਾਂ 'ਚ ਦੁਬਾਰਾ ਭੁਚਾਲ ਦੇ ਝਟਕੇ ਲੱਗਣ ਦੀਆਂ ਸੰਭਾਵਨਾਵਾਂ ਤੋਂ ਵੀ ਇਨਕਾਰ ਨਹੀ ਕੀਤਾ ਜਾ ਸਕਦਾ |
