ਮਲੌਦ, 21 ਮਈ (ਸਹਾਰਨ ਮਾਜਰਾ)-ਇਨ੍ਹੀਂ ਦਿਨੀਂ ਪੰਜਾਬ ਵਿੱਚ ਪਿਛਲੇ ਕੁੱਝ ਦਿਨਾਂ ਤੋਂ ਪੈ ਰਹੀ ਅੱਤ ਦੀ ਗਰਮੀ ਕਾਰਨ ਜਿੱਥੇ ਆਮ ਜਨ ਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਗਿਆ ਹੈ, ਉੱਥੇ ਨਿੱਕੇ ਨਿੱਕੇ ਬੱਚਿਆਂ ਦਾ ਕਰੀਬ 43-44 ਡਿਗਰੀ ਤਾਪਮਾਨ ਦੌਰਾਨ ਅੰਤਾਂ ਦਾ ਬੁਰਾ ਹਾਲ ਹੋਇਆ ਪਿਆ ਹੈ | ਬੱਚੇ ਲਗਾਤਾਰ ਬਿਮਾਰ ਹੋ ਰਹੇ ਹਨ | ਉੱਪਰੋਂ ਮਾਪਿਆਂ ਨੂੰ ਡੂੰਘੀ ਚਿੰਤਾ ਲੱਗੀ ਹੋਈ ਹੈ | ਹਾਈ ਤੇ ਸੈਕੰਡਰੀ ਸਕੂਲਾਂ ਵਿੱਚ ਬਹੁਤ ਸਾਰੇ ਬੱਚੇ ਦੂਰ ਦੁਰੇਡੇ ਤੋਂ ਪੈਦਲ ਜਾਂ ਸਾਈਕਲਾਂ 'ਤੇ ਪੜ੍ਹਨ ਆਉਂਦੇ ਹਨ | ਸਿਖਰ ਦੁਪਹਿਰੇ 2 ਵਜੇ ਘਰਾਂ ਨੂੰ ਪਰਤਣਾ ਕਿਸੇ ਸੰਭਾਵੀ ਖ਼ਤਰੇ ਤੋਂ ਬਾਹਰ ਨਹੀਂ ਜਾਪਦਾ | ਇਸੇ ਤਰ੍ਹਾਂ ਆਂਗਣਵਾੜੀ ਸਕੂਲਾਂ ਅਤੇ ਪ੍ਰਾਇਮਰੀ ਸਕੂਲਾਂ ਦੇ ਬੱਚੇ ਛੋਟੇ ਹੋਣ ਕਰਕੇ ਇਨ੍ਹੀਂ ਗਰਮੀ ਉਨ੍ਹਾਂ ਲਈ ਸਹਿਣ ਕਰਨੀ ਬਹੁਤ ਅÏਖੀ ਹੈ | ਉੱਪਰੋਂ ਲਗਾਤਾਰ ਬਿਜਲੀ ਦੇ ਕੱਟ ਲੱਗਣ ਕਰਕੇ ਬੱਚਿਆਂ ਨੂੰ ਪੱਖੇ ਦੀ ਹਵਾ ਵੀ ਨਸੀਬ ਨਹੀਂ ਹੁੰਦੀ ਅਤੇ ਉਨ੍ਹਾਂ ਨੂੰ ਪੜਾਈ ਕਰਨ ਤੋਂ ਇਲਾਵਾ ਅੰਤਾਂ ਦੀ ਗਰਮੀ ਦੌਰਾਨ ਬੈਠਣ ਵਿੱਚ ਵੀ ਬਹੁਤ ਮੁਸ਼ਕਿਲ ਹੋ ਰਹੀ ਹੈ | ਮਾਪਿਆਂ ਨੇ ਮੰਗ ਕੀਤੀ ਮੁੱਖ ਮੰਤਰੀ ਸਾਬ ਤੁਸੀਂ ਤੇ ਵਿਧਾਇਕ, ਮੰਤਰੀ ਸਾਰੇ ਏਅਰ ਕੰਡੀਸ਼ਨਰਾਂ ਵਿਚ ਠੰਢੀਆਂ ਹਵਾਵਾਂ ਲੈਂਦੇ ਹੋ, ਪਰ ਬੱਚਿਆਂ ਬਾਰੇ ਸੋਚੋ | ਇਸ ਲਈ ਬੱਚਿਆਂ ਦੀ ਸਿਹਤ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਤੁਰੰਤ ਛੁੱਟੀਆਂ ਕੀਤੀਆਂ ਜਾਣ |
