ਖੰਨਾ, 5 ਮਾਰਚ (ਹਰਜਿੰਦਰ ਸਿੰਘ ਲਾਲ)-ਖੰਨਾ ਦੇ ਅਟਵਾਲ ਪੈਲੇਸ ਰੋਡ 'ਤੇ ਇਕ ਵੱਡਾ ਹਾਦਸਾ ਵਾਪਰਿਆ | ਤੂੜੀ ਲੈ ਕੇ ਜਾ ਰਹੀ ਇੱਕ ਓਵਰਲੋਡ ਟਰੈਕਟਰ ਟਰਾਲੀ ਨੂੰ ਅਚਾਨਕ ਅੱਗ ਲੱਗ ਗਈ | ਅੱਗ ਇੰਨੀ ਤੇਜ਼ ਸੀ ਕਿ ਤੂੜੀ ਕੁੱਝ ਹੀ ਸਮੇਂ ਵਿੱਚ ਸੜ ਕੇ ਸੁਆਹ ਹੋ ਗਈ | ਇਹ ਹਾਦਸਾ ਉਦੋਂ ਵਾਪਰਿਆ ਜਦੋਂ ਇੱਕ ਟਰੈਕਟਰ ਟਰਾਲੀ ਇੱਕ ਬਿਜਲੀ ਦੇ ਟਰਾਂਸਫ਼ਾਰਮਰ ਨਾਲ ਟਕਰਾ ਗਈ | ਟਰਾਂਸਫ਼ਾਰਮਰ ਵਿਚੋਂ ਨਿਕਲਦੀਆਂ ਚੰਗਿਆੜੀਆਂ ਨੇ ਅੱਗ ਨੂੰ ਭੜਕਾਇਆ ਜੋ ਤੇਜ਼ੀ ਨਾਲ ਫੈਲ ਗਈ | ਹਾਲਾਂਕਿ ਕਿ ਪ੍ਰਸ਼ਾਸਨ ਨੇ ਦਿਨ ਵੇਲੇ ਓਵਰਲੋਡ ਵਾਹਨਾਂ ਦੇ ਸ਼ਹਿਰ ਵਿੱਚ ਦਾਖਲ ਹੋਣ 'ਤੇ ਪਾਬੰਦੀ ਲਗਾਈ ਹੈ, ਪਰ ਫਿਰ ਵੀ ਟਰੈਕਟਰ ਟਰਾਲੀਆਂ ਲਿੰਕ ਰੋਡ 'ਤੇ ਖੁੱਲ੍ਹ ਕੇ ਚੱਲ ਰਹੀਆਂ ਹਨ | ਖ਼ੁਸ਼ਕਿਸਮਤੀ ਨਾਲ, ਉਸ ਵਕਤ ਹੀ ਉੱਥੋਂ ਇੱਕ ਕਰੇਨ ਲੰਘ ਰਹੀ ਸੀ, ਜਿਸ ਨਾਲ ਇੱਕ ਵੱਡਾ ਹਾਦਸਾ ਟਾਲਣ ਵਿਚ ਮਦਦ ਮਿਲੀ | ਕਰੇਨ ਦੀ ਮਦਦ ਨਾਲ, ਟਰਾਲੀ ਨੂੰ ਪਾਸੇ ਕਰ ਦਿੱਤਾ ਗਿਆ, ਜਿਸ ਨਾਲ ਇੱਕ ਵੱਡੀ ਤਬਾਹੀ ਟਲ ਗਈ | ਜੇਕਰ ਅੱਗ ਫੈਲ ਜਾਂਦੀ, ਤਾਂ ਨਾਲ ਲੱਗਦੀ ਕਿਸਾਨ ਐਨਕਲੇਵ ਕਾਲੋਨੀ ਨੂੰ ਭਾਰੀ ਨੁਕਸਾਨ ਹੋ ਸਕਦਾ ਸੀ | ਇੱਕ ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ਹਾਦਸੇ ਵਿੱਚ ਟਰੈਕਟਰ ਟਰਾਲੀ ਨੂੰ ਨੁਕਸਾਨ ਪਹੁੰਚਿਆ ਹੈ, ਪਰ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ |
