ਸਿਰਸਾ, 22 ਜਨਵਰੀ (ਭੁਪਿੰਦਰ ਪੰਨੀਵਾਲੀਆ)-ਬਸੰਤ ਪੰਚਮੀ ਮੌਕੇ ਪਿੰਡ ਭਰੋਖਾਂ ਦੇ ਸੰਗਮ ਸਕੂਲ ਵਿਚ ਪਤੰਗ ਬਣਾਉਣ ਦਾ ਮੁਕਾਬਲਾ ਕਰਵਾਇਆ | ਬਹੁਤ ਸਾਰੇ ਵਿਦਿਆਰਥੀਆਂ ਨੇ ਮੁਕਾਬਲੇ ਵਿਚ ਉਤਸ਼ਾਹ ਨਾਲ ਹਿੱਸਾ ਲਿਆ, ਆਪਣੀ ਰਚਨਾਤਮਕ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕੀਤਾ | ਬੱਚਿਆਂ ਦੁਆਰਾ ਬਣਾਏ ਗਏ ਰੰਗੀਨ ਤੇ ਆਕਰਸ਼ਕ ਪਤੰਗਾਂ ਨੇ ਪੂਰੇ ਸਕੂਲ ਕੈਂਪਸ ਨੂੰ ਬਸੰਤ ਦੇ ਰੰਗਾਂ ਨਾਲ ਭਰ ਦਿੱਤਾ | ਸਕੂਲ ਦੇ ਪਿ੍ੰਸੀਪਲ ਛਗਨ ਸੇਠੀ ਨੇ ਕਿਹਾ ਕਿ ਭਾਰਤ ਵਿਚ ਤਿਉਹਾਰਾਂ ਦੀ ਇਕ ਅਮੀਰ ਪ੍ਰੰਪਰਾ ਹੈ ਤੇ ਅਜਿਹੇ ਜਸ਼ਨ ਸਾਡੀ ਸੱਭਿਆਚਾਰ ਨਾਲ ਜੁੜਨ ਦਾ ਮੌਕਾ ਪ੍ਰਦਾਨ ਕਰਦੇ ਹਨ | ਉਨ੍ਹਾਂ ਦੱਸਿਆ ਕਿ ਸੰਗਮ ਸਕੂਲ ਬੱਚਿਆਂ 'ਚ ਭਾਰਤੀ ਸੱਭਿਆਚਾਰ ਪ੍ਰਤੀ ਜਾਗਰੂਕਤਾ ਪੈਦਾ ਕਰਨ ਲਈ ਨਿਯਮਿਤ ਤੌਰ 'ਤੇ ਸਾਰੇ ਪ੍ਰਮੁੱਖ ਤਿਉਹਾਰਾਂ ਨਾਲ ਸੰਬੰਧਤ ਵਿਦਿਅਕ ਤੇ ਸੱਭਿਆਚਾਰਕ ਗਤੀਵਿਧੀਆਂ ਦਾ ਆਯੋਜਨ ਕਰਦਾ ਹੈ | ਬਸੰਤ ਪੰਚਮੀ ਦੇ ਮੌਕੇ ਆਯੋਜਿਤ ਇਸ ਮੁਕਾਬਲੇ ਦਾ ਉਦੇਸ਼ ਵਿਦਿਆਰਥੀਆਂ ਦੀਆਂ ਰਚਨਾਤਮਕ ਯੋਗਤਾਵਾਂ ਨੂੰ ਉਤਸ਼ਾਹਿਤ ਕਰਨਾ ਤੇ ਉਨ੍ਹਾਂ ਦੇ ਆਤਮਵਿਸ਼ਵਾਸ ਦੀ ਭਾਵਨਾ ਨੂੰ ਮਜ਼ਬੂਤ ਕਰਨਾ ਸੀ | ਮੁਕਾਬਲੇ ਦੌਰਾਨ ਵਿਦਿਆਰਥੀਆਂ ਨੇ ਸ਼ਾਨਦਾਰ ਕਲਪਨਾ, ਰੰਗ ਸੰਜੋਗ ਤੇ ਕਲਾਤਮਕ ਹੁਨਰ ਪ੍ਰਦਰਸ਼ਿਤ ਕੀਤੇ | ਜੱਜਾਂ 'ਚ ਸ਼ੀਤਲ ਮਹਿਤਾ, ਅੰਜੂ ਤਿਨ੍ਹਾ, ਕਵਿਤਾ ਸੈਨ, ਕੋਮਲ ਪ੍ਰੀਤ ਤੇ ਭਾਰਤੀ ਮੋਂਗਾ ਸ਼ਾਮਿਲ ਸਨ | ਜੱਜਾਂ ਨੇ ਭਾਗੀਦਾਰਾਂ ਦੀਆਂ ਪਤੰਗਾਂ ਦਾ ਉਨ੍ਹਾਂ ਦੀ ਸੁੰਦਰਤਾ, ਰਚਨਾਤਮਕਤਾ ਤੇ ਪੇਸ਼ਕਾਰੀ ਦੇ ਆਧਾਰ 'ਤੇ ਮੁਲਾਂਕਣ ਕੀਤਾ | ਇਸ ਮੁਕਾਬਲੇ ਵਿਚ ਗੁਰੂਨੂਰ ਸਿੰਘ ਤੇ ਸੁਖਸਾਗਰ ਨੇ ਪਹਿਲਾ, ਸਮਰ ਜਾਂਗੜਾ ਨੇ ਦੂਜਾ ਅਤੇ ਅਮਿਤ ਸੋਨੀ ਤੇ ਕਾਰਤਿਕ ਰੋਜ਼ ਨੇ ਸਾਂਝੇ ਤੌਰ 'ਤੇ ਤੀਜਾ ਸਥਾਨ ਪ੍ਰਾਪਤ ਕੀਤਾ |
