ਔਰਤਾਂ 'ਤੇ ਹੁੰਦੇ ਜ਼ੁਲਮ
ਅਕਸਰ ਦੇਖਣ ਵਿਚ ਆਉਂਦਾ ਹੈ ਕਿ ਔਰਤਾਂ 'ਤੇ ਜ਼ੁਲਮ ਦਿਨੋ-ਦਿਨ ਵਧਦੇ ਜਾ ਰਹੇ ਹਨ। ਦਾਜ ਦੀ ਮੰਗ ਹੋਵੇ, ਪਤੀ ਨਸ਼ੇ ਕਰਦਾ ਹੋਵੇ ਔਰਤਾਂ ਨਾਲ ਜਬਰਜਨਾਹ ਜਾਂ ਛੇੜਖਾਨੀ ਦੀਆਂ ਖ਼ਬਰਾਂ ਅਖ਼ਬਾਰਾਂ ਵਿਚ ਛਪਦੀਆਂ ਰਹਿੰਦੀਆਂ ਹਨ। ਕਈ ਵਾਰ ਔਰਤਾਂ ਨੂੰ ਘਰੋਂ ਕੱਢ ਦਿੱਤਾ ਜਾਂਦਾ ਹੈ ਜਾਂ ਜਾਨੋਂ ਵੀ ਮਾਰ ਦਿੱਤਾ ਜਾਂਦਾ ਹੈ। ਕਈ ਵਾਰ ਔਰਤਾਂ ਨਾਲ ਹੋਏ ਧੱਕੇ ਬਾਰੇ ਥਾਣਿਆਂ ਵਿਚ ਐਫ.ਆਈ.ਆਰ. ਦਰਜ ਕਰਵਾਉਣ ਲਈ ਧਰਨੇ, ਮੁਜ਼ਾਹਰੇ, ਸੜਕਾਂ ਤੱਕ ਜਾਮ ਕੀਤੀਆਂ ਜਾਂਦੀਆਂ ਹਨ। ਅਦਾਲਤਾਂ ਵਿਚ ਚੱਲਦੇ ਕੇਸਾਂ ਦੇ ਫ਼ੈਸਲੇ ਵੀ ਬਹੁਤ ਸਮਾਂ ਲੈ ਲੈਂਦੇ ਹਨ। ਦੇਰ ਨਾਲ ਮਿਲਿਆ ਇਨਸਾਫ਼ ਵੀ ਇਨਸਾਫ਼ ਨਹੀਂ ਹੁੰਦਾ। ਹੁਣ ਤਾਂ ਛੋਟੀਆਂ-ਛੋਟੀਆਂ ਬੱਚੀਆਂ ਨੂੰ ਵੀ ਜਿਣਸੀ ਛੇੜਖਾਨੀ ਦਾ ਸ਼ਿਕਾਰ ਬਣਾਇਆ ਜਾ ਰਿਹਾ ਹੈ।
-ਮਹਿੰਦਰ ਸਿੰਘ ਬਾਜਵਾ
ਪਿੰਡ ਮਸੀਤਾਂ, ਜ਼ਿਲਾ ਕਪੂਰਥਲਾ।
ਖ਼ੁਦ ਨੂੰ 10 ਮਿੰਟ ਅੱਗੇ ਰੱਖੋ
ਅਸੀਂ ਰੋਜ਼ਾਨਾ ਜ਼ਿੰਦਗੀ ਵਿਚ ਵੇਖਦੇ ਹਾਂ ਕਿ ਬਹੁਤ ਸਾਰੇ ਲੋਕਾਂ ਨੇ ਜਦੋਂ ਕਿਸੇ ਜਗ੍ਹਾ ਜਾਣਾ ਹੋਵੇ ਤਾਂ ਦੇਰੀ ਨਾਲ ਪਹੁੰਚਣ ਕਾਰਨ ਅਕਸਰ ਪ੍ਰੇਸ਼ਾਨ ਰਹਿੰਦੇ ਹਨ। ਸਾਨੂੰ ਅਜਿਹੀ ਕਮਜ਼ੋਰੀ ਨੂੰ ਤੁਰੰਤ ਸੁਧਾਰ ਲੈਣਾ ਚਾਹੀਦਾ ਹੈ। ਜੇਕਰ ਕਿਸੇ ਸਥਾਨ 'ਤੇ 6 ਵਜੇ ਪਹੁੰਚਣਾ ਹੋਵੇ ਤਾਂ ਅੱਧਾ ਘੰਟਾ ਪਹਿਲਾਂ ਪਹੁੰਚਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। ਕਿਉਂਕਿ ਅਸੀਂ ਅਕਸਰ ਲੇਟ ਪੁਹੰਚਣ 'ਤੇ ਪ੍ਰੇਸ਼ਾਨ ਹੁੰਦੇ ਹਾਂ। ਸਾਡੀ ਜੀਵਨਸ਼ੈਲੀ ਬਹੁਤ ਭੱਜ-ਦੌੜ ਵਾਲੀ ਹੋਣ ਕਰਕੇ ਅਵਿਵਸਥਿਤ ਹੋ ਗਈ ਹੈ। ਇਸ ਤੋਂ ਬਚਣ ਲਈ ਇਕ ਮਾਤਰ ਤਰੀਕਾ ਹੈ ਕਿ ਅਸੀਂ ਆਪਣੇ-ਆਪ ਨੂੰ ਹਰ ਕੰਮ ਵਿਚ 10 ਮਿੰਟ ਅੱਗੇ ਰੱਖੀਏ। ਜੇਕਰ ਅਸੀਂ ਕਿਸੇ ਦਫਤਰ 10 ਵਜੇ ਪਹੁੰਚਣਾ ਹੈ ਤਾਂ 9.50 'ਤੇ ਪਹੁੰਚ ਜਾਈਏ। ਇਸ ਤਰ੍ਹਾਂ ਦਾ ਨਿਯਮ ਆਪਣੀ ਜ਼ਿੰਦਗੀ ਵਿਚ ਅਪਣਾ ਕੇ ਅਸੀਂ ਬਹੁਤ ਸਾਰੀਆਂ ਪ੍ਰੇਸ਼ਾਨੀਆਂ ਤੋਂ ਬਚ ਸਕਦੇ ਹਾਂ।
-ਚਰਨਜੀਤ ਸਿੰਘ ਮੁਕਤਸਰ
ਚਾਈਨਾ ਡੋਰ ਤੇ ਮਾਪਿਆਂ ਦੀ ਜ਼ਿੰਮੇਵਾਰੀ
ਚਾਈਨਾ ਡੋਰ, ਬੱਚਿਆਂ ਅਤੇ ਪੰਛੀਆਂ ਲਈ ਬਹੁਤ ਖ਼ਤਰਨਾਕ ਸਾਬਤ ਹੋ ਰਹੀ ਹੈ। ਇਸ ਨੂੰ ਰੋਕਣ ਵਿਚ ਮਾਪਿਆਂ ਦੀ ਭੂਮਿਕਾ ਸਭ ਤੋਂ ਮਹੱਤਵਪੂਰਨ ਹੈ। ਕਈ ਵਾਰ ਬੱਚਿਆਂ ਦੀ ਜ਼ਿੱਦ ਜਾਂ ਮਨੋਰੰਜਨ ਦੇ ਨਾਂਅ 'ਤੇ ਮਾਪੇ ਖੁਦ ਹੀ ਇਹ ਡੋਰ ਉਨ੍ਹਾਂ ਨੂੰ ਖਰੀਦ ਕੇ ਦਿੰਦੇ ਹਨ, ਜੋ ਅਣਜਾਣੇ ਵਿਚ ਇਕ ਗ਼ਲਤ ਕੰਮ ਨੂੰ ਉਤਸ਼ਾਹਿਤ ਕਰਨ ਵਾਂਗ ਹੈ। ਮਾਪਿਆਂ ਨੂੰ ਆਪਣੇ ਬੱਚਿਆਂ ਨੂੰ ਇਸ ਡੋਰ ਦੇਨੁਕਸਾਨਾਂ ਬਾਰੇ ਸਮਝਾਉਣ, ਕਾਨੂੰਨੀ ਪਾਬੰਦੀ ਦੀ ਜਾਣਕਾਰੀ ਦੇਣ ਅਤੇ ਸੁਰੱਖਿਅਤ ਵਿਕਲਪਾਂ ਵੱਲ ਪ੍ਰੇਰਿਤ ਕਰਨਾ ਚਾਹੀਦਾ ਹੈ। ਘਰ ਤੋਂ ਹੀ ਜਾਗਰੂਕਤਾ ਦੀ ਸ਼ੁਰੂਆਤ ਹੋਵੇ ਤਾਂ ਸਮਾਜ ਵਿਚ ਵੀ ਸਹੀ ਸੁਨੇਹਾ ਜਾਵੇਗਾ। ਜਦੋਂ ਮਾਪੇ ਜ਼ਿੰਮੇਵਾਰ ਬਣਨਗੇ, ਤਦ ਹੀ ਬੱਚੇ ਵੀ ਸੁਰੱਖਿਆ ਅਤੇ ਸੰਵੇਦਨਸ਼ੀਲਤਾ ਸਿੱਖਣਗੇ ਅਤੇ ਚਾਈਨਾ ਡੋਰ ਵਰਗੀਆਂ ਖ਼ਤਰਨਾਕ ਚੀਜ਼ਾਂ ਤੋਂ ਦੂਰ ਰਹਿਣਗੇ।
-ਰਾਜ ਕੁਮਾਰ ਖੰਨਾ
(ਐਮ.ਏ., ਐਮ.ਫਿਲ)
ਸਕਾਰਾਤਮਿਕ ਸੋਚ
ਨਕਾਰਾਤਮਿਕ ਸੋਚ ਵਾਲੇ ਲੋਕ ਹਰ ਗੱਲ ਵਿਚ ਮਾੜਾ ਪੱਖ ਹੀ ਵੇਖਦੇ ਹਨ। ਉਨ੍ਹਾਂ ਨੂੰ ਹਮੇਸ਼ਾ ਡਰ, ਸ਼ੱਕ ਤੇ ਨਿਰਾਸ਼ਾ ਘੇਰ ਲੈਂਦੀ ਹੈ। ਅਜਿਹੀ ਸੋਚ ਨਾ ਸਿਰਫ਼ ਉਨ੍ਹਾਂ ਦੀ ਆਪਣੀ ਤਰੱਕੀ ਰੋਕਦੀ ਹੈ, ਸਗੋਂ ਆਸ-ਪਾਸ ਦੇ ਲੋਕਾਂ ਦਾ ਮਨੋਬਲ ਵੀ ਘਟਾਉਂਦੀ ਹੈ। ਜੀਵਨ ਵਿਚ ਚੰਗਾ ਸੋਚਣਾ ਤੇ ਹੌਸਲਾ ਰੱਖਣਾ ਬਹੁਤ ਜ਼ਰੂਰੀ ਹੈ, ਕਿਉਂਕਿ ਸਾਕਾਰਾਤਮਿਕ ਸੋਚ ਹੀ ਸਫਲਤਾ ਦੀ ਕੁੰਜੀ ਹੈ। ਜਿਹੜਾ ਮਨੁੱਖ ਹਰ ਹਾਲਾਤ ਵਿਚ ਚੰਗਾ ਪੱਖ ਵੇਖਣਾ ਸਿੱਖ ਲੈਂਦਾ ਹੈ, ਉਹੀ ਅਸਲ ਜ਼ਿੰਦਗੀ ਜਿੱਤਦਾ ਹੈ।
-ਮੰਜੂ ਰਾਇਕਾ, ਭਿੰਡਰਾਂ ਸੰਗਰੂਰ।
