ਕੋਲਕਾਤਾ, 26 ਮਾਰਚ (ਰਣਜੀਤ ਸਿੰਘ ਲੁਧਿਆਣਵੀ)-ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਅੱਜ ਉਸ ਸਮੇਂ ਵੱਡੇ ਹਾਦਸੇ ਤੋਂ ਵਾਲ-ਵਾਲ ਬਚ ਗਏ, ਜਦੋਂ ਤਕਰੀਬਨ ਡੇਢ ਘੰਟਾ ਹਵਾ 'ਚ ਚੱਕਰ ਲਾਉਣ ਤੋਂ ਬਾਅਦ ਉਨ੍ਹਾਂ ਦਾ ਹੈਲੀਕਾਪਟਰ ਦਮਦਮ ਹਵਾਈ ਅੱਡੇ 'ਤੇ ਉਤਰਨ 'ਚ ਸਫਲ ਰਿਹਾ | ਵੀਰਵਾਰ ਸ਼ਾਮ 5.18 ਵਜੇ ਉਨ੍ਹਾਂ ਦਾ ਹੈਲੀਕਾਪਟਰ ਹੇਠਾਂ ਉਤਰਨ 'ਚ ਸਫਲ ਹੋਇਆ | ਪਾਂਡੇਸ਼ਵਰ ਅਤੇ ਦੂਬਰਾਜਪੁਰ 'ਚ ਰੈਲੀ ਕਰਨ ਤੋਂ ਬਾਅਦ ਮੁੱਖ ਮੰਤਰੀ ਕੋਲਕਾਤਾ ਵਾਪਸ ਆ ਰਹੇ ਸਨ | ਮਮਤਾ ਅੰਡਾਲ ਹਵਾਈ ਅੱਡੇ ਤੋਂ 3.19 ਵਜੇ ਰਵਾਨਾ ਹੋਏ ਸਨ | ਕੋਲਕਾਤਾ ਪਹੁੰਚਣ ਤੋਂ ਪਹਿਲਾਂ ਹੀ ਭਾਰੀ ਮੀਂਹ ਅਤੇ ਹਨੇ੍ਹਰੀ ਚੱਲਣ ਲੱਗੀ | 3.55 ਵਜੇ ਕੋਲਕਾਤਾ ਉਤਰਨਾ ਸੀ ਪਰ ਦਮਦਮ ਪੁੱਜਣ ਤੋਂ ਪਹਿਲਾਂ ਹੀ ਮੌਸਮ ਖਰਾਬ ਹੋ ਗਿਆ ਅਤੇ ਤਕਰੀਬਨ ਡੇਢ ਘੰਟਾ ਹਵਾ 'ਚ ਰਹਿਣ ਤੋਂ ਬਾਅਦ ਉਨ੍ਹਾਂ ਦਾ ਹੈਲੀਕਾਪਟਰ 5.18 ਵਜੇ ਉਤਰ ਸਕਿਆ |
