ਤਰਨ ਤਾਰਨ, 14 ਅਪ੍ਰੈਲ (ਇਕਬਾਲ ਸਿੰਘ ਸੋਢੀ)-ਕਿਸਾਨ ਮਜ਼ਦੂਰ ਸੰਘਰਸ਼ ਕਮੇਟੀ ਪਿੰਡ ਇਕਾਈ ਪਿੰਡ ਚੁਤਾਲਾ ਦੀ ਕੋਰ ਕਮੇਟੀ ਦੀ ਮੀਟਿੰਗ ਪਿੰਡ ਦੇ ਗੁਰਦੁਆਰਾ ਬਾਬਾ ਸ਼ਹੀਦਾਂ ਵਿਖੇ ਪ੍ਰਧਾਨ ਸਤਨਾਮ ਸਿੰਘ ਦੀ ਪ੍ਰਧਾਨਗੀ ਹੇਠ ਹੋਈ | ਮੀਟਿੰਗ 'ਚ ਬਿਜਲੀ ਦੇ ਘਰਾਂ 'ਚ ਲੱਗਣ ਵਾਲੇ ਚਿੱਪ ਮੀਟਰ, ਮਨਰੇਗਾ ਸਕੀਮ, ਆਟਾ-ਦਾਲ, ਪਿੰਡ ਦੀ ਟੁੱਟੀ ਹੋਈ ਸੜਕ, ਨਸ਼ਾ ਅਤੇ ਕਣਕ ਦੀ ਖਰੀਦ ਬਾਰੇ ਖੁੱਲ ਕੇ ਵਿਚਾਰ ਚਰਚਾ ਕੀਤੀ ਗਈ | ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਸੁਵਿੰਦਰ ਸਿੰਘ ਚੁਤਾਲਾ ਨੇ ਕਿਹਾ ਕਿ ਤਰਨ ਤਾਰਨ ਮੰਡੀ 'ਚ ਕਿਸਾਨ ਕਈ ਦਿਨਾਂ ਤੋਂ ਕਣਕ ਸੁਕਾ ਰਹੇ ਹਨ ਅਤੇ ਸੁੱਕੀ ਕਣਕ ਦੀ ਭਰਾਈ ਵਾਸਤੇ ਬਾਰਦਾਨਾ ਨਹੀਂ ਮਿਲ ਰਿਹਾ ਜਿੱਥੇ ਭਗਵੰਤ ਮਾਨ ਦੇ ਪ੍ਰਬੰਧਾਂ ਦੀ ਪੂਰੀ ਤਰ੍ਹਾਂ ਪੋਲ ਖੁੱਲ ਚੁੱਕੀ ਹੈ | ਕਿਸਾਨ ਲਗਾਤਾਰ ਮੰਡੀਆਂ ਵਿਚ ਖੱਜਲ ਖੁਆਰ ਹੋ ਰਹੇ ਹਨ | ਕਿਸਾਨ ਆਗੂਆਂ ਨੇ ਕਿਹਾ ਕਿ ਜੇਕਰ ਕਣਕ ਦੀ ਖਰੀਦ ਸ਼ੁਰੂ ਨਾ ਹੋਈ ਤਾਂ ਇਕ ਜਲਦੀ ਮੀਟਿੰਗ ਲਗਾ ਕੇ ਜ਼ਿਲ੍ਹੇ ਵਲੋਂ ਡੀ.ਐੱਫ.ਐੱਸ.ਸੀ. ਦੇ ਘਿਰਾਓ ਕੀਤਾ ਜਾਵੇਗਾ |
