ਪਠਾਨਕੋਟ 14 ਅਪ੍ਰੈਲ (ਵਿਨੋਦ)-ਨਸ਼ਾ ਵਿਰੋਧੀ ਮੁਹਿੰਮ ਦੇ ਹਿੱਸੇ ਵਜੋਂ ਨੰਗਲ ਭੂਰ ਪੁਲਿਸ ਨੇ ਇਕ ਵਿਅਕਤੀ ਨੂੰ ਵੱਡੀ ਮਾਤਰਾ ਵਿਚ ਨਾਜਾਇਜ਼ ਸ਼ਰਾਬ ਸਮੇਤ ਗਿ੍ਫ਼ਤਾਰ ਕੀਤਾ ਹੈ | ਦੋਸ਼ੀ ਦੀ ਪਹਿਚਾਣ ਪਿੰਡ ਘਿਆਲਾ ਦੇ ਵਸਨੀਕ ਪ੍ਰਸ਼ੋਤਮ ਲਾਲ ਵਜੋਂ ਹੋਈ ਹੈ | ਮਿਲੀ ਜਾਣਕਾਰੀ ਅਨੁਸਾਰ ਏ.ਐਸ.ਆਈ. ਬਲਵਿੰਦਰ ਸਿੰਘ ਆਪਣੀ ਪੁਲਿਸ ਟੀਮ ਨਾਲ ਨੰਗਲ ਤੰਬੂਆਂ ਪਿੰਡ ਨੇੜੇ ਫਲਾਈਓਵਰ 'ਤੇ ਗਸ਼ਤ ਕਰ ਰਹੇ ਸਨ | ਜਦੋਂ ਪੁਲਿਸ ਟੀਮ ਨੇੜੇ ਆਈ ਤਾਂ ਉਹ ਵਿਅਕਤੀ ਡਰ ਗਿਆ ਅਤੇ ਡੱਬਾ ਛੱਡ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ | ਪੁਲਿਸ ਨੇ ਤੇਜ਼ੀ ਨਾਲ ਕਾਰਵਾਈ ਕਰਦਿਆਂ ਦੋਸ਼ੀ ਨੂੰ ਘੇਰ ਲਿਆ ਅਤੇ ਉਸ ਨੂੰ ਮੌਕੇ 'ਤੇ ਹੀ ਕਾਬੂ ਕਰ ਲਿਆ | ਪਲਾਸਟਿਕ ਦੇ ਡੱਬੇ ਦੀ ਜਾਂਚ ਕਰਨ 'ਤੇ ਬਰਾਮਦ ਡੱਬੇ ਵਿਚ 6000 ਮਿਲੀਲੀਟਰ ਨਾਜਾਇਜ਼ ਸ਼ਰਾਬ ਸੀ | ਨਿਯਮਾਂ ਅਨੁਸਾਰ ਪੁਲਿਸ ਨੇ ਸ਼ਰਾਬ ਦਾ ਨਮੂਨਾ ਲਿਆ ਅਤੇ ਬਾਕੀ ਖੇਪ ਜ਼ਬਤ ਕਰ ਲਈ | ਦੋਸ਼ੀ ਦੀ ਪਹਿਚਾਣ ਘਿਆਲਾ ਪਿੰਡ ਦੇ ਵਸਨੀਕ ਪ੍ਰਸ਼ੋਤਮ ਵਜੋਂ ਹੋਈ ਹੈ | ਪੁਲਿਸ ਦਾ ਕਹਿਣਾ ਹੈ ਕਿ ਦੋਸ਼ੀ ਵਿਰੁੱਧ ਆਬਕਾਰੀ ਐਕਟ ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ | ਉਨਾਂ ਸਪੱਸ਼ਟ ਕੀਤਾ ਕਿ ਇਲਾਕੇ ਵਿਚ ਕਿਸੇ ਵੀ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥ ਜਾਂ ਸ਼ਰਾਬ ਦੇ ਵਪਾਰ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ ਅਤੇ ਭਵਿੱਖ ਵਿਚ ਵੀ ਅਜਿਹੀਆਂ ਜਾਂਚਾਂ ਜਾਰੀ ਰਹਿਣਗੀਆਂ |
