ਦੋਵਾਂ ਦੇਸ਼ਾਂ ਦੀ ਭਾਈਵਾਲੀ 'ਚ ਵਿਰਾਸਤ ਅਤੇ ਵਿਕਾਸ ਅਹਿਮ-ਮੋਦੀ
ਨਵੀਂ ਦਿੱਲੀ, 6 ਮਈ (ਉਪਮਾ ਡਾਗਾ ਪਾਰਥ)-ਭਾਰਤ ਅਤੇ ਵੀਅਤਨਾਮ ਦਰਮਿਆਨ ਵਿਆਪਕ ਰਣਨੀਤਕ ਸਾਂਝੇਦਾਰੀ ਤਹਿਤ ਸਹਿਯੋਗ ਨੂੰ ਹੋਰ ਡੂੰਘਾ ਕਰਨ ਲਈ ਅੱਗੇ ਵਧਦਿਆਂ ਦੋਹਾਂ ਦੇਸ਼ਾਂ ਨੇ ਬੁੱਧਵਾਰ ਨੂੰ 13 ਸਮਝੌਤੇ ਸਹੀਬੱਧ ਕੀਤੇ | ਇਹ ਸਮਝੌਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਭਾਰਤ ਦੇ ਦੌਰੇ 'ਤੇ ਆਏ ਵੀਅਤਨਾਮ ਦੇ ਰਾਸ਼ਟਰਪਤੀ ਤੋ ਲਾਮ ਦਰਮਿਆਨ ਹੈਦਰਾਬਾਦ ਹਾਊਸ ਵਿਖੇ ਹੋਈ ਦੁਵੱਲੀ ਮੁਲਾਕਾਤ ਤੋਂ ਬਾਅਦ ਹੋਏ | ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਸੱਦੇ 'ਤੇ ਭਾਰਤ ਆਏ ਤੋ ਲਾਮ ਦਾ ਰਾਸ਼ਟਰਪਤੀ ਵਜੋਂ ਅਹੁਦਾ ਸੰਭਾਲਣ ਤੋਂ ਬਾਅਦ ਇਹ ਪਹਿਲਾ ਦੌਰਾ ਹੈ | ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਇਸ ਮੌਕੇ ਕੀਤੀ ਸਾਂਝੀ ਪ੍ਰੈੱਸ ਕਾਨਫਰੰਸ 'ਚ ਦੋਹਾਂ ਦੇਸ਼ਾਂ ਦੀ ਸਾਂਝੀ ਵਿਰਾਸਤ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਸਾਡੀ ਸਾਂਝੀ ਵਿਰਾਸਤ ਨੂੰ ਜਿਊਾਦਾ ਰੱਖਣ ਲਈ ਭਾਰਤ ਵੀਅਤਨਾਮ ਦੀ ਪੁਰਾਤਨ ਚੰਪਾ ਸੱਭਿਅਤਾ ਦੇ ਮੀ ਸਾਨ ਅਤੇ ਨਹਾਨ ਟਵਰ ਮੰਦਰਾਂ ਦੀ ਮੁੜ ਉਸਾਰੀ ਕਰ ਰਿਹਾ ਹੈ | ਇਸ ਤੋਂ ਇਲਾਵਾ ਅਸੀਂ (ਭਾਰਤ) ਚੰਪਾ ਸੱਭਿਅਤਾ ਦੀ ਮੈਨੁਸਕ੍ਰਿਪਟ ਨੂੰ ਵੀ ਡਿਜੀਟਲਾਈਜ਼ ਕਰਾਂਗੇ, ਤਾਂ ਜੋ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਇਸ ਨੂੰ ਸਾਂਭਿਆ ਜਾ ਸਕੇ | ਦੋਹਾਂ ਦੇਸ਼ਾਂ ਦਰਮਿਆਨ ਸਮਝੌਤਿਆਂ 'ਚ ਭਾਰਤ ਦੇ ਸੱਭਿਆਚਾਰ ਮੰਤਰਾਲੇ ਅਤੇ ਵੀਅਤਨਾਮ ਦੇ ਸੱਭਿਆਚਾਰ ਖੇਡ ਅਤੇ ਸੈਰ ਸਪਾਟਾ ਮੰਤਰਾਲੇ ਦਰਮਿਆਨ 2026-30 ਤੱਕ ਲਈ ਸੱਭਿਆਚਾਰਕ ਅਦਾਨ-ਪ੍ਰਦਾਨ ਪ੍ਰੋਗਰਾਮ ਭਾਰਤੀ ਰਿਜ਼ਰਵ ਬੈਂਕ ਅਤੇ ਵੀਅਤਨਾਮ ਦੇ ਬੈਂਕ ਐਸ. ਬੀ. ਵੀ. ਦਰਮਿਆਨ ਭੁਗਤਾਨ ਅਮਲ ਅਤੇ ਡਿਜੀਟਲ ਭੁਗਤਾਨ 'ਚ ਨਵੀਂ ਤਕਨਾਲੋਜੀ ਦੇ ਖੇਤਰ 'ਚ ਸਹਿਯੋਗ, ਦਵਾਈਆਂ ਦੇ ਖੇਤਰ 'ਚ ਰਾਜਗੀਰ ਸਥਿਤ ਨਾਲੰਦਾ ਯੂਨੀਵਰਸਿਟੀ ਅਤੇ ਹਨੋਈ ਸਥਿਤ ਹੋ ਚੀ ਮਿਕਹ ਨੈਸ਼ਨਲ ਅਕਾਦਮੀ ਦਰਮਿਆਨ ਵੀ ਸਮਝੌਤਾ ਸ਼ਾਮਿਲ ਹੈ | ਇਸ ਤੋਂ ਇਲਾਵਾ ਆਈ. ਸੀ. ਸੀ. ਆਰ. ਅਤੇ ਯੂਨੀਵਰਸਿਟੀ ਆਫ਼ ਸਾਇੰਸ ਐਂਡ ਐਜੂਕੇਸ਼ਨ ਦਰਿਮਆਨ ਆਈ ਸੀ ਸੀ ਆਰ ਚੇਅਰ ਐਂਡ ਇੰਡੀਆ ਸਟੱਡੀਜ਼ ਦੀ ਸਥਾਪਨਾ ਅਤੇ ਡਿਜੀਟਲ ਤਕਨਾਲੋਜੀ ਆਦਿ ਖੇਤਰਾਂ 'ਚ ਸਮਝੌਤਿਆਂ ਨੂੰ ਪ੍ਰਵਾਨਗੀ ਮਿਲੀ |
ਭਾਰਤ ਅਤੇ ਵੀਅਤਨਾਮ ਦਰਮਿਆਨ 13 ਸਮਝੌਤੇ ਸਹੀਬੱਧ
ਅਜੀਤ ਡੈਸਕ
07-05-2026