ਬਠਿੰਡਾ, 30 ਦਸੰਬਰ (ਅੰਮਿ੍ਤਪਾਲ ਸਿੰਘ ਵਲ੍ਹਾਣ)-ਸਤਿਕਾਰ ਮਹਿਲਾ ਕਲੱਬ, ਆਦਰਸ਼ ਨਗਰ ਬਠਿੰਡਾ ਵਲੋਂ ਸ੍ਰੀ ਗਰੂ ਗੋਬਿੰਦ ਸਿੰਘ ਜੀ ਦੇ ਚਾਰ ਸਾਹਿਬਜ਼ਾਦਿਆਂ ਅਤੇ ਮਾਤਾ ਗੁਜਰੀ ਜੀ ਦੀ ਅਮਰ ਸ਼ਹਾਦਤ ਨੂੰ ਸਮਰਪਿਤ ਬਠਿੰਡਾ-ਅੰਮਿ੍ਤਸਰ ਹਾਈਵੇ 'ਤੇ ਅਰਦਾਸ ਕਰਕੇ ਅਤੇ ਦੇਗ ਵਰਤਾਕੇ ਲੰਗਰ ਸੇਵਾ ਦਾ ਸ਼ੁਭ ਆਰੰਭ ਕੀਤਾ ਗਿਆ | ਅਰਦਾਸ ਦੇ ਪਵਿੱਤਰ ਪਲਾਂ ਦੌਰਾਨ ਸ਼ਹੀਦਾਂ ਦੀ ਕੁਰਬਾਨੀ ਨੂੰ ਯਾਦ ਕਰਦਿਆਂ ਹਰ ਮਨ ਭਾਵੁਕ ਹੋ ਗਿਆ | ਠੰਢੇ ਮੌਸਮ ਦੇ ਬਾਵਜੂਦ ਕਲੱਬ ਦੀਆਂ ਮੈਂਬਰਾਂ ਨੇ ਨਿਸ਼ਕਾਮ ਭਾਵਨਾ ਨਾਲ ਚਾਹ ਅਤੇ ਬਿਸਕੁੱਟਾਂ ਦਾ ਲੰਗਰ ਵਰਤਾਇਆ, ਜਿਸ ਨਾਲ ਰਾਹਗੀਰਾਂ ਅਤੇ ਯਾਤਰੀਆਂ ਦੇ ਚਿਹਰਿਆਂ 'ਤੇ ਸੰਤੋਖ ਅਤੇ ਸ਼ਰਧਾ ਝਲਕ ਪਈ | ਹਾਈਵੇ ਤੋਂ ਲੰਘਦੇ ਡਰਾਇਵਰਾਂ ਅਤੇ ਆਮ ਲੋਕਾਂ ਨੇ ਰੁਕ ਕੇ ਲੰਗਰ ਛਕਿਆ ਅਤੇ ਸ਼ਹੀਦਾਂ ਨੂੰ ਨਮਨ ਕੀਤਾ | ਇਹ ਸੇਵਾ ਕਾਰਜ ਸਿਰਫ਼ ਲੰਗਰ ਨਹੀਂ ਸੀ, ਸਗੋਂ ਸੱਚ, ਤਿਆਗ ਅਤੇ ਮਨੁੱਖਤਾ ਦੇ ਉਹ ਮੁੱਲ ਯਾਦ ਕਰਵਾਉਂਦਾ ਰਿਹਾ, ਜਿਨ੍ਹਾਂ ਲਈ ਸਾਹਿਬਜ਼ਾਦਿਆਂ ਅਤੇ ਮਾਤਾ ਗੁਜਰੀ ਜੀ ਨੇ ਅਦੁੱਤੀ ਕੁਰਬਾਨੀ ਦਿੱਤੀ |
