ਨਵੀਂ ਦਿੱਲੀ, 3 ਦਸੰਬਰ (ਜਗਤਾਰ ਸਿੰਘ)-ਦਿੱਲੀ ਦੀ 'ਛੋਟੀ ਸਰਕਾਰ' ਭਾਵ ਐਮ.ਸੀ.ਡੀ.(ਦਿੱਲੀ ਨਗਰ ਨਿਗਮ) ਦੇ 12 ਵਾਰਡਾਂ ਦੀਆਂ ਜ਼ਿਮਨੀ ਚੋਣਾਂ ਦੇ ਨਤੀਜੇ ਅੱਜ ਐਲਾਨ ਦਿੱਤੇ ਗਏ | ਇਨ੍ਹਾਂ ਜ਼ਿਮਨੀ ਚੋਣਾਂ 'ਚ ਭਾਜਪਾ ਨੇ 7 ਅਤੇ ਆਮ ਆਦਮੀ ਪਾਰਟੀ (ਆਪ) ਨੇ 3 ਸੀਟਾਂ ਜਿੱਤੀਆਂ, ਜਦ ਕਿ ਕਾਂਗਰਸ ਤੇ ਆਜ਼ਾਦ ਉਮੀਦਵਾਰ ਦੀ ਝੋਲੀ 1-1 ਸੀਟ ਪਈ ਹੈ | ਹਾਲਾਂਕਿ ਭਾਜਪਾ ਨੇ 12 ਵਿਚੋਂ 7 ਸੀਟਾਂ ਜਿੱਤੀਆਂ ਹਨ ਪਰ ਇਸ ਤੋਂ ਪਹਿਲਾਂ ਉਸ ਕੋਲ 9 ਸੀਟਾਂ ਸਨ | ਹੁਣ ਭਾਜਪਾ ਦੇ 7 ਸੀਟਾਂ ਜਿੱਤਣ ਤੋਂ ਬਾਅਦ ਸਦਨ ਵਿਚ ਕੁੱਲ 122 ਕੌਂਸਲਰ ਜਦਕਿ ਆਮ ਆਦਮੀ ਪਾਰਟੀ ਦੇ ਕੌਂਸਲਰਾਂ ਦੀ ਗਿਣਤੀ 102 ਹੋ ਗਈ ਹੈ | ਸਦਨ ਵਿਚ ਕੁੱਲ ਗਿਣਤੀ 250 ਹੈ ¢ ਹਾਲੀਆ ਦਿੱਲੀ ਵਿਧਾਨ ਸਭਾ ਚੋਣਾਂ ਤੋਂ ਬਾਅਦ ਕੁੱਝ ਕੌਂਸਲਰਾਂ ਦੇ ਵਿਧਾਇਕ ਬਣਨ ਨਾਲ 12 ਸੀਟਾਂ ਖ਼ਾਲੀ ਹੋ ਗਈਆਂ ਸਨ | ਹਾਲਾਂਕਿ ਮੌਜੂਦਾ ਸਮੇਂ ਐਮ.ਸੀ.ਡੀ. ਦੀ ਸੱਤਾ 'ਚ ਭਾਜਪਾ ਹੀ ਕਾਬਜ਼ ਹੈ |
