ਸ਼ਾਹਕੋਟ ਤਹਿਸੀਲ 'ਚ 'ਈਜ਼ੀ ਰਜਿਸਟਰੀ' ਪ੍ਰਣਾਲੀ ਫੇਲ੍ਹ, ਸਿਰਫ਼ ਕਾਗ਼ਜ਼ਾਂ ਤੱਕ ਸੀਮਤ ਸਰਕਾਰੀ ਦਾਅਵੇ

ਅ

ਅਜੀਤ ਡੈਸਕ 08-05-2026

ਸ਼ਾਹਕੋਟ, 7 ਮਈ (ਦਲਜੀਤ ਸਿੰਘ ਸਚਦੇਵਾ)-ਪੰਜਾਬ ਦੀ ਮੌਜੂਦਾ ਆਮ ਆਦਮੀ ਪਾਰਟੀ ਦੀ ਸਰਕਾਰ ਵਲੋਂ ਤਹਿਸੀਲਾਂ 'ਚੋਂ ਭਿ੍ਸ਼ਟਾਚਾਰ ਨੂੰ ਜੜ੍ਹੋਂ ਖ਼ਤਮ ਕਰਨ ਤੇ ਲੋਕਾਂ ਨੂੰ ਖੱਜਲ-ਖੁਆਰੀ ਤੋਂ ਬਚਾਉਣ ਲਈ ਸ਼ੁਰੂ ਕੀਤੀ ਗਈ 'ਈਜ਼ੀ ਰਜਿਸਟਰੀ' ਪ੍ਰਣਾਲੀ ਤਹਿਸੀਲ ਸ਼ਾਹਕੋਟ ਵਿਚ ਫੇਲ੍ਹ ਸਾਬਤ ਹੋ ਰਹੀ ਹੈ | ਜਿੱਥੇ ਮਾਨ ਸਰਕਾਰ ਵਲੋਂ ਵੱਡੇ-ਵੱਡੇ ਦਾਅਵੇ ਕੀਤੇ ਜਾ ਰਹੇ ਹਨ ਕਿ ਹੁਣ ਲੋਕਾਂ ਨੂੰ ਤਹਿਸੀਲ ਦਫ਼ਤਰਾਂ ਵਿਚ ਕਿਸੇ ਮੁਸ਼ਕਿਲ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ, ਉੱਥੇ ਹੀ ਸ਼ਾਹਕੋਟ ਦੀ ਜ਼ਮੀਨੀ ਹਕੀਕਤ ਸਰਕਾਰ ਦੇ ਇਨ੍ਹਾਂ ਦਾਅਵਿਆਂ ਦੀ ਫੂਕ ਕੱਢ ਰਹੀ ਹੈ | ਤਹਿਸੀਲ ਦਫ਼ਤਰ ਸ਼ਾਹਕੋਟ ਵਿਚ 'ਈਜ਼ੀ ਰਜਿਸਟਰੀ' ਦੀ ਸਹੂਲਤ ਲਈ ਐਡਵੋਕੇਟ ਤੇ ਕੰਪਿਊਟਰ ਆਪ੍ਰੇਟਰ ਲਈ ਵਿਸ਼ੇਸ਼ ਕੈਬਿਨ ਤਾਂ ਬਣਾਏ ਗਏ ਹਨ, ਪਰ ਇਨ੍ਹਾਂ ਕੈਬਿਨਾਂ 'ਚ ਉਹ ਕਦੇ ਵੀ ਨਜ਼ਰ ਨਹੀਂ ਆਉਂਦੇ | ਪਤਾ ਲੱਗਾ ਹੈ ਕਿ ਜਦੋਂ ਇਸ ਪ੍ਰਣਾਲੀ ਦੀ ਸ਼ੁਰੂਆਤ ਹੋਈ ਸੀ, ਸਿਰਫ਼ ਉਸ ਸਮੇਂ ਹੀ ਮੁਲਾਜ਼ਮ ਇੱਥੇ ਬੈਠੇ ਦਿਖਾਈ ਦਿੱਤੇ ਸਨ, ਉਸ ਤੋਂ ਬਾਅਦ ਇਹ ਕੈਬਿਨ ਸਿਰਫ਼ ਸਜਾਵਟ ਦਾ ਸਾਮਾਨ ਬਣ ਕੇ ਰਹਿ ਗਏ ਹਨ | ਸਵਾਲ ਇਹ ਖੜ੍ਹਾ ਹੁੰਦਾ ਹੈ ਕਿ ਜੇਕਰ ਇਹ ਮੁਲਾਜ਼ਮ ਆਪਣੀਆਂ ਸੀਟਾਂ 'ਤੇ ਬੈਠਦੇ ਹੀ ਨਹੀਂ, ਤਾਂ ਫਿਰ ਇਨ੍ਹਾਂ ਦੀਆਂ ਤਨਖਾਹਾਂ ਕਿੱਥੇ ਜਾ ਰਹੀਆਂ ਹਨ? ਕੀ ਸਰਕਾਰੀ ਖ਼ਜ਼ਾਨੇ ਨੂੰ ਬਿਨਾਂ ਕੰਮ ਕੀਤੇ ਚੂਨਾ ਲਾਇਆ ਜਾ ਰਿਹਾ ਹੈ? ਸਰਕਾਰ ਦਾ ਮਕਸਦ ਸੀ ਕਿ ਲੋਕ ਆਪਣੀ ਸਿੱਧੀ ਰਜਿਸਟਰੀ ਲਿਖਵਾਉਣ ਤਾਂ ਜੋ ਵਿਚੋਲਾ ਪ੍ਰਥਾ ਖ਼ਤਮ ਹੋਵੇ | ਪਰ ਸ਼ਾਹਕੋਟ ਵਿਚ ਲੋਕ ਅਜੇ ਵੀ ਪੁਰਾਣੇ ਸਿਸਟਮ ਮੁਤਾਬਕ ਅਰਜੀ ਨਵੀਸਾਂ ਤੇ ਵਿਚੋਲਿਆਂ ਕੋਲ ਜਾਣ ਲਈ ਮਜਬੂਰ ਹਨ, ਜਿਸ ਕਾਰਨ ਆਮ ਜਨਤਾ ਦੀ ਆਰਥਿਕ ਲੁੱਟ ਲਗਾਤਾਰ ਜਾਰੀ ਹੈ | ਲੋਕਾਂ ਦਾ ਕਹਿਣਾ ਹੈ ਕਿ ਅਫ਼ਸਰਸ਼ਾਹੀ ਹੇਠਲੇ ਪੱਧਰ 'ਤੇ ਸਰਕਾਰ ਦੇ ਲੋਕ-ਪੱਖੀ ਫ਼ੈਸਲਿਆਂ ਨੂੰ ਜਾਣਬੁੱਝ ਕੇ ਲਾਗੂ ਨਹੀਂ ਹੋਣ ਦੇ ਰਹੀ | ਜੇਕਰ ਉੱਚ ਅਧਿਕਾਰੀ ਤਹਿਸੀਲ ਦਫ਼ਤਰ ਵਿਚ ਲੱਗੇ ਸੀ.ਸੀ.ਟੀ.ਵੀ ਕੈਮਰਿਆਂ ਦੀ ਫੁਟੇਜ ਚੈੱਕ ਕਰਨ, ਤਾਂ ਸਾਫ਼ ਹੋ ਜਾਵੇਗਾ ਕਿ 'ਈਜ਼ੀ ਰਜਿਸਟਰੀ' ਕੈਬਿਨਾਂ 'ਚ ਮੁਲਾਜ਼ਮ ਕਿੰਨੇ ਦਿਨ ਹਾਜ਼ਰ ਰਹੇ ਹਨ | ਸੂਤਰਾਂ ਤੋਂ ਇਹ ਵੀ ਪਤਾ ਲੱਗਾ ਹੈ ਕਿ ਤਹਿਸੀਲ ਦਫ਼ਤਰ ਦੇ ਅਧਿਕਾਰੀ ਸਰਕਾਰ ਦੀਆਂ ਅੱਖਾਂ ਵਿਚ ਘੱਟਾ ਪਾਉਣ ਲਈ ਮਹੀਨੇ ਵਿਚ ਕੁਝ ਰਜਿਸਟਰੀਆਂ ਈ.ਜੀ ਰਜਿਸਟਰੀ ਦੇ ਖ਼ਾਤੇ ਪਾਉਂਦੇ ਹਨ, ਪਰ ਜ਼ਮੀਨੀ ਪੱਧਰ 'ਤੇ ਈ.ਜੀ ਰਜਿਸਟਰੀ ਦਾ ਕੰਮ ਠੱਪ ਪਿਆ ਹੈ |
ਬੁਨਿਆਦੀ ਸਹੂਲਤਾਂ ਦਾ ਬੁਰਾ ਹਾਲ
ਜਦੋਂ ਪੱਤਰਕਾਰਾਂ ਦੀ ਟੀਮ ਨੇ ਤਹਿਸੀਲ ਦਫ਼ਤਰ ਦਾ ਦੌਰਾ ਕੀਤਾ ਤਾਂ ਉਨ੍ਹਾਂ ਦੇਖਿਆ ਕਿ ਸਿਰਫ਼ ਦਫ਼ਤਰੀ ਕੰਮ ਹੀ ਨਹੀਂ, ਸਗੋਂ ਜਨਤਕ ਸਹੂਲਤਾਂ ਪੱਖੋਂ ਵੀ ਸ਼ਾਹਕੋਟ ਤਹਿਸੀਲ ਦਾ ਹਾਲ ਮਾੜਾ ਹੈ | ਭਿਆਨਕ ਗਰਮੀ ਦੇ ਬਾਵਜੂਦ ਲੋਕਾਂ ਲਈ ਲੱਗਾ ਵਾਟਰ ਕੂਲਰ ਕਾਫ਼ੀ ਸਮੇਂ ਤੋਂ ਖ਼ਰਾਬ ਪਿਆ ਹੈ | ਲੋਕਾਂ ਨੂੰ ਪੀਣ ਵਾਲੇ ਪਾਣੀ ਲਈ ਬਾਹਰ ਭਟਕਣਾ ਪੈਂਦਾ ਹੈ | ਤਹਿਸੀਲ ਵਿਚ ਬਣੇ ਬਾਥਰੂਮਾਂ 'ਤੇ ਇਹ ਵੀ ਨਹੀਂ ਲਿਖਿਆ ਗਿਆ ਕਿ ਕਿਹੜਾ ਇਸਤਰੀਆਂ ਲਈ ਤੇ ਕਿਹੜਾ ਪੁਰਸ਼ਾਂ ਲਈ ਹੈ | ਇਨ੍ਹਾਂ ਬੁਨਿਆਦੀ ਸਹੂਲਤਾਂ ਵੱਲ ਤਹਿਸੀਲ ਦਫ਼ਤਰ ਦੇ ਅਧਿਕਾਰੀ ਵਲੋਂ ਧਿਆਨ ਨਹੀਂ ਦਿੱਤਾ ਜਾ ਰਿਹਾ |

ਸ਼ਾਹਕੋਟ ਤਹਿਸੀਲ 'ਚ 'ਈਜ਼ੀ ਰਜਿਸਟਰੀ' ਪ੍ਰਣਾਲੀ ਫੇਲ੍ਹ, ਸਿਰਫ਼ ਕਾਗ਼ਜ਼ਾਂ ਤੱਕ ਸੀਮਤ ਸਰਕਾਰੀ ਦਾਅਵੇ

Subscribers Only Story

ਸੰਬੰਧਿਤ ਖ਼ਬਰਾਂ