ਗੂਹਲਾ ਚੀਕਾ/ਕੁਰੂਕਸ਼ੇਤਰ, 19 ਫਰਵਰੀ (ਓ.ਪੀ. ਸੈਣੀ)-ਸੰਸਦ ਮੈਂਬਰ ਨਵੀਨ ਜਿੰਦਲ 20 ਫਰਵਰੀ ਨੂੰ ਕੁਰੂਕਸ਼ੇਤਰ ਜ਼ਿਲ੍ਹਾ ਜੇਲ੍ਹ ਵਿਖੇ ਵਾਲੀਬਾਲ ਕੋਰਟ ਦਾ ਉਦਘਾਟਨ ਕਰਨਗੇ | ਇਸ ਮੌਕੇ ਇਕ ਪ੍ਰਦਰਸ਼ਨੀ ਵਾਲੀਬਾਲ ਮੈਚ 'ਕੁਰੂਕਸ਼ੇਤਰ ਕੈਦੀ ਪ੍ਰੀਮੀਅਰ ਲੀਗ-ਸੀਜ਼ਨ 1' ਦਾ ਵੀ ਐਲਾਨ ਕਰੇਗਾ, ਜੋ ਅਪ੍ਰੈਲ 'ਚ ਸ਼ੁਰੂ ਹੋਵੇਗਾ | ਇਸ ਵਾਲੀਬਾਲ ਕੋਰਟ ਦੀ ਸਥਾਪਨਾ ਨਵੀਨ ਜਿੰਦਲ ਫਾਊਾਡੇਸ਼ਨ ਦੁਆਰਾ ਸੰਸਦ ਮੈਂਬਰ ਨਵੀਨ ਜਿੰਦਲ ਦੀ ਪਹਿਲਕਦਮੀ 'ਤੇ ਕੀਤੀ ਗਈ ਹੈ | ਇਸ ਵਾਲੀਬਾਲ ਕੋਰਟ ਦਾ ਉਦੇਸ਼ ਜੇਲ੍ਹ ਵਿਚ ਖੇਡਾਂ ਅਤੇ ਸਕਾਰਾਤਮਿਕ ਗਤੀਵਿਧੀਆਂ ਨੂੰ ਉਤਸ਼ਾਹਿਤ ਕਰਨਾ ਅਤੇ ਕੈਦੀਆਂ ਦੇ ਪੁਨਰਵਾਸ ਲਈ ਸਾਰਥਿਕ ਪਹਿਲਕਦਮੀਆਂ ਕਰਨਾ ਹੈ | 'ਕੁਰੂਕਸ਼ੇਤਰ ਕੈਦੀ ਪ੍ਰੀਮੀਅਰ ਲੀਗ' ਰਾਹੀਂ, ਨਵੀਨ ਜਿੰਦਲ ਫਾਊਾਡੇਸ਼ਨ ਅਨੁਸ਼ਾਸਨ, ਆਤਮ-ਵਿਸ਼ਵਾਸ, ਟੀਮ ਭਾਵਨਾ ਅਤੇ ਨਵੀਂ ਸ਼ੁਰੂਆਤ ਦੇ ਸੰਦੇਸ਼ ਨੂੰ ਉਤਸ਼ਾਹਿਤ ਕਰੇਗਾ | ਉਪਰੋਕਤ ਪ੍ਰੋਗਰਾਮ ਬਾਰੇ ਜਾਣਕਾਰੀ ਦਿੰਦੇ ਹੋਏ, ਐਮ.ਪੀ. ਦਫ਼ਤਰ ਇੰਚਾਰਜ ਅਤੇ ਸਾਬਕਾ ਆਈ.ਏ.ਐਸ. ਅਧਿਕਾਰੀ ਧਰਮਵੀਰ ਸਿੰਘ ਨੇ ਕਿਹਾ ਕਿ ਖੇਡਾਂ ਸਿਰਫ ਇਕ ਮੁਕਾਬਲਾ ਨਹੀਂ ਹਨ, ਸਗੋਂ ਸ਼ਖ਼ਸੀਅਤ ਵਿਕਾਸ ਅਤੇ ਪਰਿਵਰਤਨ ਲਈ ਇਕ ਪ੍ਰਭਾਵਸ਼ਾਲੀ ਮਾਧਿਅਮ ਹਨ | ਨਵੀਨ ਜਿੰਦਲ ਫਾਊਾਡੇਸ਼ਨ ਰਾਹੀਂ, ਜ਼ਿਲ੍ਹਾ ਜੇਲ੍ਹ 'ਚ ਖੇਡ ਗਤੀਵਿਧੀਆਂ ਮਾਨਸਿਕ ਸੰਤੁਲਨ ਬਣਾਈ ਰੱਖਣ, ਸਕਾਰਾਤਮਿਕ ਊਰਜਾ ਪ੍ਰਦਾਨ ਕਰਨ, ਆਤਮ-ਵਿਸ਼ਵਾਸ ਵਧਾਉਣ ਅਤੇ ਸਮੂਹਿਕ ਸਹਿਯੋਗ ਦੀ ਭਾਵਨਾ ਵਿਕਸਤ ਕਰਨ 'ਚ ਮਹੱਤਵਪੂਰਨ ਭੂਮਿਕਾ ਨਿਭਾਉਣਗੀਆਂ | ਉਨ੍ਹਾਂ ਦੱਸਿਆ ਕਿ ਐਮਪੀ ਨਵੀਨ ਜਿੰਦਲ ਖ਼ੁਦ ਇਕ ਖਿਡਾਰੀ ਹਨ | ਉਨ੍ਹਾਂ ਦਾ ਮੰਨਣਾ ਹੈ ਕਿ ਜੇਲ੍ਹ ਸਿਰਫ ਸਜਾ ਦਾ ਸਥਾਨ ਨਹੀਂ ਹੈ, ਸਗੋਂ ਸੁਧਾਰ ਅਤੇ ਆਤਮ-ਨਿਰੀਖਣ ਦਾ ਮੌਕਾ ਵੀ ਹੈ | ਖੇਡਾਂ ਇਕ ਵਿਅਕਤੀ ਦੇ ਅੰਦਰ ਅਨੁਸ਼ਾਸਨ, ਆਤਮ-ਵਿਸ਼ਵਾਸ ਅਤੇ ਚਰਿੱਤਰ ਦਾ ਨਿਰਮਾਣ ਕਰਦੀਆਂ ਹਨ | ਉਨ੍ਹਾਂ ਦੀ ਪਹਿਲਕਦਮੀ 'ਤੇ, ''ਕੁਰੂਕਸ਼ੇਤਰ ਕੈਦੀ ਪ੍ਰੀਮੀਅਰ ਲੀਗ'' ਸਕਾਰਾਤਮਿਕ ਤਬਦੀਲੀ ਅਤੇ ਇਕ ਨਵੀਂ ਦਿਸ਼ਾ ਲਿਆਉਣ ਦਾ ਇਕ ਯਤਨ ਹੈ |
