ਟੋਹਾਣਾ/ਜਾਖ਼ਲ, 22 ਜਨਵਰੀ (ਮਨਜੀਤ ਸਿੰਘ)-ਟੋਹਾਣਾ 'ਚ ਜਾਂਚ ਪੜਤਾਲ ਤੋਂ ਬਾਅਦ ਬੇਨਿਯਮੀਆਂ ਕਾਰਨ ਇਕ ਮੈਡੀਕਲ ਸਟੋਰ ਨੂੰ ਸੀਲ ਕਰਨ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ | ਮੈਡੀਕਲ ਸਟੋਰ ਨੂੰ ਸੀਲ ਕਰਨ ਦਾ ਕਾਰਨ ਇਹ ਹੈ ਦੱਸਿਆ ਜਾ ਰਿਹਾ ਹੈ ਕਿ ਇਸ ਮੈਡੀਕਲ ਸਟੋਰ 'ਤੇ ਬਿਨਾਂ ਕਿਸੇ ਡਾਕਟਰ ਦੀ ਪਰਚੀ 'ਤੇ ਲਿਖੀਆਂ ਦਵਾਈਆਂ ਤੇ ਬਹੁਤ ਸਾਰੀ ਮਿਆਦ ਪੁੱਗੀ ਵਾਲੀ ਦਵਾਈ ਵੇਚੀ ਜਾਂਦੀ ਸੀ | ਪਿਛਲੇ ਦੋ ਸਾਲਾਂ ਤੋਂ ਇਹ ਮੈਡੀਕਲ ਸਟੋਰ ਚੱਲ ਰਿਹਾ ਸੀ ਜਦਕਿ ਇਨ੍ਹਾਂ ਕੋਲ ਲਾਇਸੈਂਸ ਵੀ ਹੈ | ਲਾਇਸੈਂਸ ਹੋਣ ਦੇ ਬਾਵਜੂਦ ਇਸ ਮੈਡੀਕਲ ਸਟੋਰ 'ਤੇ ਨਾ ਹੀ ਮੈਡੀਕਲ ਦਾ ਬੋਰਡ ਲੱਗਾ ਹੈ | ਇਸ ਮੈਡੀਕਲ ਸਟੋਰ ਨੂੰ ਨੌਵੀਂ ਪਾਸ ਇਕ ਨੌਜਵਾਨ ਵਲੋਂ ਚਲਾਇਆ ਜਾ ਰਿਹਾ ਸੀ | ਉਸ ਵਲੋਂ ਹੀ ਇਸ ਮੈਡੀਕਲ ਸਟੋਰ ਤੋਂ ਦਵਾਈਆਂ ਦੇਣ ਦਾ ਕੰਮ ਕੀਤਾ ਜਾ ਰਿਹਾ ਸੀ | ਵਿਭਾਗੀ ਕਾਰਵਾਈ ਕਰਦਿਆਂ ਡਰੱਗ ਐਂਡ ਕੋਸਮੈਟਿਕ ਡਿਪਾਰਟਮੈਂਟ ਵਲੋਂ ਇਸ ਮੈਡੀਕਲ ਸਟੋਰ ਨੂੰ ਸੀਲ ਕਰ ਦਿੱਤਾ ਗਿਆ |
