ਦੱਖਣੀ ਅਫ਼ਰੀਕਾ ਨੇ ਜ਼ਿੰਬਾਬਵੇ ਨੂੰ 5 ਵਿਕਟਾਂ ਨਾਲ ਹਰਾਇਆ

ਨਵੀਂ ਦਿੱਲੀ, 1 ਮਾਰਚ (ਪੀ.ਟੀ.ਆਈ.)-ਆਈ.ਸੀ.ਸੀ. ਟੀ-20 ਵਿਸ਼ਵ ਕੱਪ 2026 ਦੇ 51ਵੇਂ ਮੈਚ 'ਚ ਦੱਖਣੀ ਅਫਰੀਕਾ ਨੇ ਜ਼ਿੰਬਾਬਵੇ ਨੂੰ 5 ਵਿਕਟਾਂ ਨਾਲ ਹਰਾਇਆ। ਦਿੱਲੀ ਦੇ ਅਰੁਣ ਜੇਤਲੀ ਸਟੇਡੀਅਮ 'ਚ ਸੁਪਰ 8 ਪੜਾਅ ਦੇ ਇਸ ਮੈਚ 'ਚ ਜ਼ਿੰਬਾਬਵੇ ਨੇ ਦੱਖਣੀ ਅਫਰੀਕਾ ਨੂੰ ਜਿੱਤਣ ਲਈ 154 ਦੌੜਾਂ ਦਾ ਟੀਚਾ ਦਿੱਤਾ ਸੀ, ਜਿਸਨੂੰ ਉਨ੍ਹਾਂ ਨੇ 17.5 ਓਵਰਾਂ ਵਿਚ ਹਾਸਲ ਕਰ ਲਿਆ। ਇਹ ਮੌਜੂਦਾ ਟੂਰਨਾਮੈਂਟ 'ਚ ਦੱਖਣੀ ਅਫਰੀਕਾ ਦੀ ਲਗਾਤਾਰ 7ਵੀਂ ਜਿੱਤ ਸੀ। ਇਸ ਜਿੱਤ ਨਾਲ ਦੱਖਣੀ ਅਫਰੀਕਾ 6 ਅੰਕਾਂ ਨਾਲ ਗਰੁੱਪ 1 'ਚ ਸਿਖਰ 'ਤੇ ਰਿਹਾ। ਦੱਖਣੀ ਅਫਰੀਕਾ ਹੁਣ ਸੈਮੀਫਾਈਨਲ ਵਿਚ ਨਿਊਜ਼ੀਲੈਂਡ ਦਾ ਸਾਹਮਣਾ ਕਰੇਗਾ, ਜੋ 4 ਮਾਰਚ ਨੂੰ ਕੋਲਕਾਤਾ ਦੇ ਈਡਨ ਗਾਰਡਨ 'ਚ ਖੇਡਿਆ ਜਾਵੇਗਾ। ਦੱਖਣੀ ਅਫਰੀਕਾ ਦੀ ਦੌੜ ਦਾ ਪਿੱਛਾ ਕਰਨ 'ਚ ਸ਼ੁਰੂਆਤ ਮਾੜੀ ਰਹੀ, ਜਿਸ 'ਚ ਕੁਇੰਟਨ ਡੀ ਕੌਕ (0 ਦੌੜਾਂ) ਤੇ ਏਡਨ ਮਾਰਕਰਾਮ (4 ਦੌੜਾਂ) 14 ਦੌੜਾਂ 'ਤੇ ਆਊਟ ਹੋ ਗਏ। ਦੋਵੇਂ ਓਪਨਰ ਜ਼ਿੰਬਾਬਵੇ ਦੇ ਕਪਤਾਨ ਸਿਕੰਦਰ ਰਜ਼ਾ ਦੇ ਹੱਥੋਂ ਫਸ ਗਏ। ਰਿਆਨ ਰਿਕਲਟਨ ਨੇ ਕੁਝ ਵੱਡੇ ਸ਼ਾਟ ਖੇਡੇ, ਪਰ ਉਸਦੀ ਪਾਰੀ ਜ਼ਿਆਦਾ ਦੇਰ ਤੱਕ ਨਹੀਂ ਚੱਲੀ। ਰਿਕਲਟਨ ਨੇ 22 ਗੇਂਦਾਂ 'ਚ 31 ਦੌੜਾਂ ਦਾ ਯੋਗਦਾਨ ਪਾਇਆ। ਇਸ ਤੋਂ ਬਾਅਦ ਡੇਵਾਲਡ ਬ੍ਰੀਵਿਸ ਤੇ ਡੇਵਿਡ ਮਿਲਰ ਵਿਚਕਾਰ ਚੌਥੀ ਵਿਕਟ ਲਈ 50 ਦੌੜਾਂ ਦੀ ਸਾਂਝੇਦਾਰੀ ਹੋਈ। ਉੱਥੋਂ, ਜਾਰਜ ਲਿੰਡੇ ਅਤੇ ਟ੍ਰਿਸਟਨ ਸਟੱਬਸ ਨੇ ਛੇਵੀਂ ਵਿਕਟ ਲਈ 53 ਦੌੜਾਂ ਦੀ ਮੈਚ ਜੇਤੂ ਸਾਂਝੇਦਾਰੀ ਕੀਤੀ। ਸਟੱਬਸ ਨੇ 21 ਅਤੇ ਜਾਰਜ ਲਿੰਡੇ ਨੇ 30 ਦੌੜਾਂ ਬਣਾਈਆਂ। ਸਲਾਮੀ ਬੱਲੇਬਾਜ਼ ਬ੍ਰਾਇਨ ਬੇਨੇਟ (15 ਦੌੜਾਂ) ਤੇ ਡੀਓਨ ਮਾਇਰਸ (11 ਦੌੜਾਂ) ਵੀ ਦੋਹਰੇ ਅੰਕੜੇ ਤੱਕ ਪਹੁੰਚੇ। ਦੱਖਣੀ ਅਫਰੀਕਾ ਲਈ, ਕਵੇਨਾ ਮਫਾਕਾ ਤੇ ਕੋਰਬਿਨ ਬੋਸ਼ ਨੇ 2-2 ਵਿਕਟਾਂ ਲਈਆਂ, ਜਦੋਂ ਕਿ ਐਨਰਿਚ ਨੌਰਟਜੇ, ਜਾਰਜ ਲਿੰਡੇ ਅਤੇ ਲੁੰਗੀ ਨਗੀਡੀ ਨੇ ਇਕ-ਇਕ ਵਿਕਟ ਲਈ।