ਬ੍ਰਾਜ਼ੀਲ ਦੀ ਕੰਪਨੀ ਵਲੋਂ ਭਾਰਤ ਨੂੰ ਕੇ.ਸੀ.-390 ਜਹਾਜ਼ਾਂ ਲਈ ਗਲੋਬਲ ਨਿਰਮਾਣ ਆਧਾਰ ਬਣਾਉਣ ਦਾ ਵਾਅਦਾ <br/>

ਨਵੀਂ ਦਿੱਲੀ, 22 ਫਰਵਰੀ (ਏਜੰਸੀ)-ਬ੍ਰਾਜ਼ੀਲ ਦੀ ਏਅਰੋਸਪੇਸ ਦਿੱਗਜ ਕੰਪਨੀ ਐਂਬਰੇਅਰ ਨੇ ਸੰਕੇਤ ਦਿੱਤਾ ਕਿ ਜੇਕਰ ਉਸ ਨੂੰ ਭਾਰਤੀ ਹਵਾਈ ਫ਼ੌਜ 80 ਟਰਾਂਸਪੋਰਟ ਜਹਾਜ਼ਾਂ ਦਾ ਠੇਕਾ ਮਿਲਦਾ ਹੈ ਤਾਂ ਉਹ ਆਪਣੇ ਕੇ.ਸੀ.-390 ਮਿਲੇਨੀਅਮ ਜਹਾਜ਼ਾਂ ਲਈ ਵੱਡਾ ਉਤਪਾਦਨ ਕੇਂਦਰ ਸਥਾਪਤ ਕਰਨ ਲਈ ਤਿਆਰ ਹੈ | ਇਹ ਇਕਰਾਰਨਾਮਾ ਏਸ਼ੀਆ-ਪ੍ਰਸ਼ਾਂਤ ਦੇ ਵੱਡੇ ਬਾਜ਼ਾਰ ਦਾ ਸਮਰਥਨ ਕਰੇਗਾ | ਇਕ ਵਿਸ਼ੇਸ਼ ਇੰਟਰਵਿਊ 'ਚ ਐਂਬਰੇਅਰ ਦੇ ਪ੍ਰਧਾਨ ਅਤੇ ਸੀ.ਈ.ਓ. ਫ੍ਰਾਂਸਿਸਕੋ ਗੋਮਜ਼ ਨੇਟੋ ਨੇ ਕੇ.ਸੀ.-390 ਮਿਲੇਨੀਅਮ ਨੂੰ ਭਾਰਤ ਲਈ ਸਭ ਤੋਂ ਵਧੀਆ ਵਿਕਲਪ ਵਜੋਂ ਪੇਸ਼ ਕੀਤਾ | ਉਨ੍ਹਾਂ ਨਾਟੋ ਦੀ ਖਰੀਦ ਲਹਿਰ ਦਾ ਲਾਭ ਉਠਾਉਂਦੇ ਹੋਏ ਇਸ ਜਹਾਜ਼ ਨੂੰ ਰਣਨੀਤਕ ਹਵਾਈ ਲਿਫਟ ਲਈ ਨਵੇਂ 'ਗਲੋਬਲ ਬੈਂਚਮਾਰਕ' ਵਜੋਂ ਪੇਸ਼ ਕੀਤਾ | ਉਨ੍ਹਾਂ ਕਿਹਾ ਕਿ ਸਾਡੇ ਜਹਾਜ਼ਾਂ ਦੀ ਚੋਣ ਕਰਕੇ ਭਾਰਤੀ ਹਵਾਈ ਸੈਨਾ ਆਧੁਨਿਕ ਹਵਾਈ ਸੈਨਾਵਾਂ ਦੇ ਤੇਜ਼ੀ ਨਾਲ ਫੈਲ ਰਹੇ, ਅੰਤਰ-ਸੰਚਾਲਿਤ ਗਠਜੋੜ ਨਾਲ ਜੁੜ ਜਾਏਗੀ | ਕੇ.ਸੀ.-390 ਨੂੰ ਬਹੁਤ ਵਧੀਆ ਮਲਟੀ-ਮਿਸ਼ਨ ਵਰਕ ਹਾਰਸ ਵਜੋਂ ਦਰਸਾਉਂਦੇ ਹੋਏ ਨੇਟੋ ਨੇ ਕਿਹਾ ਕਿ ਜੇਕਰ ਭਾਰਤੀ ਇਕਰਾਰਨਾਮਾ ਮਿਲਦਾ ਹੈ ਤਾਂ ਕੰਪਨੀ ਏਸ਼ੀਆ-ਪ੍ਰਸ਼ਾਂਤ ਬਾਜ਼ਾਰ ਨੂੰ ਸਮਰਥਨ ਕਰਨ ਲਈ ਭਾਰਤ ਨੂੰ ਹਵਾਈ ਜਹਾਜ਼ਾਂ ਲਈ ਆਪਣਾ ਪ੍ਰਮੁੱਖ ਉਤਪਾਦਨ ਕੇਂਦਰ ਬਣਾ ਲਵੇਗੀ |