ਅੰਮਿ੍ਤਸਰ, 22 ਜਨਵਰੀ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਕਰਾਚੀ ਸ਼ਹਿਰ 'ਚ ਗੁਲ ਪਲਾਜ਼ਾ ਵਿਚਲੀਆਂ ਦੁਕਾਨਾਂ ਨੂੰ ਸ਼ਾਰਟ ਸਰਕਟ ਕਾਰਨ ਲੱਗੀ ਭਿਆਨਕ ਅੱਗ ਅਤੇ ਉਸ ਦੇ ਬਾਅਦ ਇਮਾਰਤ ਦੇ ਢਹਿਣ ਨਾਲ ਮਲਬੇ ਹੇਠਾਂ ਹੁਣ ਤਕ 60 ਤੋਂ ਵੱਧ ਲੋਕਾਂ ਦੀਆਂ ਲਾਸ਼ਾਂ ਮਿਲ ਚੁੱਕੀਆਂ ਹਨ | ਅੱਗ ਨਾਲ ਨੁਕਸਾਨੇ ਢਾਂਚਿਆਂ ਦੇ ਡਿੱਗਣ ਦਾ ਸਿਲਸਿਲਾ ਅੱਜ ਛੇਵੇਂ ਦਿਨ ਵੀ ਜਾਰੀ ਰਿਹਾ | ਬਚਾਅ ਅਧਿਕਾਰੀਆਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਇਮਾਰਤ ਦੇ ਢਹਿ-ਢੇਰੀ ਹੋਏ ਹਿੱਸਿਆਂ 'ਚ ਖੋਜ ਕਾਰਜਾਂ ਦੇ ਅੱਗੇ ਵਧਣ ਨਾਲ ਮਿ੍ਤਕਾਂ ਦੀ ਅੰਤਿਮ ਗਿਣਤੀ ਹੋਰ ਵਧ ਸਕਦੀ ਹੈ | ਰੈਸਕਿਊ 1122 ਦੇ ਮੁੱਖ ਸੰਚਾਲਨ ਅਧਿਕਾਰੀ ਆਬਿਦ ਜਲਾਲ ਨੇ ਪੁਸ਼ਟੀ ਕੀਤੀ ਕਿ ਟੀਮਾਂ ਨੇ ਗੁਲ ਪਲਾਜ਼ਾ ਦੇ ਮੇਜ਼ਾਨਾਈਨ ਅਤੇ ਪਹਿਲੀ ਮੰਜ਼ਿਲ ਦੀ ਖੋਜ ਪੂਰੀ ਕਰ ਲਈ ਹੈ, ਜਦਕਿ ਪਲਾਜ਼ਾ ਦੇ ਇਕ ਪਾਸੇ ਤੋਂ ਖੋਜ ਯਤਨ ਚੁਣੌਤੀਪੂਰਨ ਬਣੇ ਹੋਏ ਹਨ | ਉਨ੍ਹਾਂ ਅੱਗੇ ਕਿਹਾ ਕਿ ਉਮੀਦ ਹੈ ਕਿ ਖੋਜ ਕਾਰਜ ਸ਼ੁੱਕਰਵਾਰ ਨੂੰ ਪੂਰਾ ਹੋ ਜਾਣਗੇ, ਹਾਲਾਂਕਿ, ਹਲਾਤ ਮੁਸ਼ਕਲ ਬਣੇ ਹੋਏ ਹਨ |
