ਡੇਰਾਬੱਸੀ, 17 ਫਰਵਰੀ (ਗੁਰਮੀਤ ਸਿੰਘ)-ਪੰਜਾਬ ਤੇ ਚੰਡੀਗੜ੍ਹ ਦੀਆਂ ਮੁਟਿਆਰਾਂ ਵਲੋਂ ਅਮਨ ਹੋਟਲ ਅਤੇ ਰੈਸਟੋਰੈਂਟ ਵਿਖੇ ਕਰਵਾਏ ਗਏ ਮਿਸ ਗ੍ਰੈਂਡ ਪੰਜਾਬ ਅਤੇ ਮਿਸ ਗ੍ਰੈਂਡ ਚੰਡੀਗੜ੍ਹ-2026 ਪੇਜੈਂਟ ਦੌਰਾਨ ਹੁਨਰ ਅਤੇ ਸੁੰਦਰਤਾ ਦਾ ਲੋਹਾ ਮਨਵਾਇਆ ਗਿਆ | ਸਟੇਟ ਡਾਇਰੈਕਟਰ ਅਕਸ਼ਿਤਾ ਅਰੋੜਾ ਦੀ ਅਗਵਾਈ ਹੇਠ ਇਹ ਸਮਾਗਮ ਨਾ ਸਿਰਫ਼ ਤਾਜਪੋਸ਼ੀ ਤੱਕ ਸੀਮਿਤ ਰਿਹਾ, ਬਲਕਿ ਨੌਜਵਾਨਾਂ ਨੂੰ ਲੀਡਰਸ਼ਿਪ ਅਤੇ ਆਤਮ-ਵਿਸ਼ਵਾਸ ਦੇਣ ਵਾਲਾ ਪਲੇਟਫਾਰਮ ਸਾਬਿਤ ਹੋਇਆ | ਇਸ ਮੌਕੇ ਪੰਜਾਬ ਤੋਂ ਆਈ ਅਸ਼ਿਤਾ ਗੁਪਤਾ ਨੂੰ ਮਿਸ ਗ੍ਰੈਂਡ ਪੰਜਾਬ-2026 ਦਾ ਤਾਜ ਪਹਿਨਾਇਆ ਗਿਆ, ਜਦਕਿ ਸੁਨੰਦਾ ਸ਼ਰਮਾ ਅਤੇ ਜੈਸਮੀਨ ਗਰੇਵਾਲ ਨੂੰ ਫਸਟ ਅਤੇ ਸੈਕਿੰਡ ਰਨਰਅੱਪ ਘੋਸ਼ਿਤ ਕੀਤਾ ਗਿਆ | ਇਸੇ ਤਰ੍ਹਾਂ ਚੰਡੀਗੜ੍ਹ ਤੋਂ ਆਈ ਈ. ਆਰ. ਐਸ਼ਵਰੀਆ ਨੇ ਮਿਸ ਗ੍ਰੈਂਡ ਚੰਡੀਗੜ੍ਹ-2026 ਦਾ ਖ਼ਿਤਾਬ ਆਪਣੇ ਨਾਂਅ ਕੀਤਾ, ਜਦਕਿ ਪੂਜਾ ਤੱਤੇ ਅਤੇ ਸਾਨੀਆ ਸ਼ਰਮਾ ਕ੍ਰਮਵਾਰ ਫਸਟ ਅਤੇ ਸੈਕਿੰਡ ਰਨਰਅੱਪ ਰਹੀਆਂ | ਜੇਤੂ ਰਹਿਣ ਵਾਲੀਆਂ ਇਹ ਮੁਟਿਆਰਾਂ ਹੁਣ ਮਿਸ ਗ੍ਰੈਂਡ ਇੰਡੀਆ-2026 ਦੌਰਾਨ ਰਾਸ਼ਟਰੀ ਪੱਧਰ 'ਤੇ ਆਪਣੀ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕਰਨਗੀਆਂ |