ਬੰਗਾ, 19 ਅਕਤੂਬਰ (ਪ. ਪ.)-ਪੰਜਾਬੀ ਭਾਸ਼ਾ, ਸਾਹਿਤ, ਸੱਭਿਆਚਾਰ ਤੇ ਪੰਜਾਬੀ ਲੇਖਕਾਂ ਦੀ ਸਾਂਝੀ ਆਵਾਜ਼ ਵਜੋਂ ਜਾਣੀ ਜਾਂਦੀ ‘ਕੇਂਦਰੀ ਪੰਜਾਬੀ ਲੇਖਕ ਸਭਾ’ ਦੀ ਟੀਮ ਦੀ ਚੋਣ ਹਰ ਤਿੰਨ ਸਾਲ ਬਾਅਦ ਹੁੰਦੀ ਆ ਰਹੀ ਹੈ। ਇਸ ਵਾਰ ਚੋਣ ਲਈ ਵੋਟਾਂ 25 ਅਕਤੂਬਰ ਨੂੰ ਦੇਸ਼ ਭਗਤ ਯਾਦਗਾਰ ਹਾਲ਼ ਜਲੰਧਰ ਵਿਖੇ ਪੈਣਗੀਆਂ। ਸਭਾ ਦੇ ਮੌਜੂਦਾ ਪ੍ਰਧਾਨ ਦਰਸ਼ਨ ਸਿੰਘ ਬੁੱਟਰ ਤੇ ਜਨਰਲ ਸਕੱਤਰ ਸੁਸ਼ੀਲ ਦੁਸਾਂਝ ਅਨੁਸਾਰ ਇਸ ਵੋਟ ਪ੍ਰਕਿਰਿਆ ਸਭਾ ਦੇ ਹੁਣ ਤੱਕ ਬਣ ਚੁੱਕੇ ਮੈਂਬਰ ਹੀ ਭਾਗ ਲੈ ਸਕਣਗੇ ਜਿਨ੍ਹਾਂ ਦੀ ਸੂਚੀ ਪੰਜਾਬੀ ਲੇਖਕ ਨਾਂ ਦੀ ਬੁੱਕਲਿਟ ਵਿਚ ਪ੍ਰਕਾਸ਼ਿਤ ਕੀਤੀ ਜਾ ਚੁੱਕੀ ਹੈ। ਸਭਾ ਦੇ ਪ੍ਰਮੁੱਖ ਅਹੁਦੇਦਾਰਾਂ ਨੇ ਚੋਣ ਲਈ ਉਤਸ਼ਾਹਿਤ ਲੇਖਕਾਂ ਨੂੰ ਬੇਨਤੀ ਕੀਤੀ ਕਿ ਉਹ ਚੋਣ ਕਮਿਸ਼ਨਰ ਵਲੋਂ ਜਾਰੀ ਵੋਟਰ ਕਾਰਡ, ਲੇਖਕਾਂ ਦੀ ਸੂਚੀ ਵਿਚ ਦਰਜ ਆਪਣਾ ਵੋਟਰ ਨੰਬਰ ਤੇ ਕੋਈ ਫੋਟੋ ਵਾਲਾ ਪਹਿਚਾਣ ਪੱਤਰ ਆਪਣੇ ਨਾਲ ਜ਼ਰੂਰ ਲੈ ਕੇ ਆਉਣ। ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ ਤੋਂ ਸਭਾ ਦੇ ਮੈਂਬਰ ਤੇ ਪੰਜਾਬੀ ਲੇਖਕ ਰਾਜ ਹੀਉਂ ਅਤੇ ਪੱਤਰਕਾਰ ਸੁਰਿੰਦਰ ਕਰਮ ਲਧਾਣਾ ਨੇ ਦੱਸਿਆ ਕਿ ਇਸ ਚੋਣ ਲਈ ਪੰਜਾਬੀ ਲੇਖਕਾਂ ਵਿਚ ਭਾਰੀ ਉਤਸ਼ਾਹ ਵੇਖਣ ਨੂੰ ਮਿਲ਼ ਰਿਹਾ ਹੈ। ਸਭਾ ਦੇ ਪ੍ਰਧਾਨਗੀ ਦੇ ਅਹੁਦੇ ਲਈ ਜਨਵਾਦੀ ਲੇਖਕ ਸਮੂਹ ਵਲੋਂ ਸੁਸ਼ੀਲ ਦੁਸਾਂਝ ਤੇ ਪ੍ਰਗਤੀਸ਼ੀਲ ਧਿਰ ਵਲੋਂ ਸੁਰਜੀਤ ਜੱਜ ਆਹਮੋ ਸਾਹਮਣੇ ਹਨ। ਇਸ ਤਰ੍ਹਾਂ ਨਵੀਂ ਚੁਣੀ ਗਈ ਟੀਮ ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ .) ਨੂੰ ਆਉਣ ਵਾਲ਼ੇ ਤਿੰਨ ਸਾਲ ਚਲਾਵੇਗੀ।
