ਨਵੀਂ ਦਿੱਲੀ, 1 ਜਨਵਰੀ (ਉਪਮਾ ਡਾਗਾ ਪਾਰਥ)-'ਆਰਟੀਫਿਸ਼ੀਅਲ ਇੰਟੈਲੀਜੈਂਸ (ਏ.ਆਈ.) ਅੱਜ ਪੂਰੀ ਦੁਨੀਆ 'ਚ ਅਰਥਵਿਵਸਥਾ ਅਤੇ ਸਮਾਜ ਨੂੰ ਨਵੀਂ ਦਿਸ਼ਾ ਦੇ ਰਹੀ ਹੈ | ਇਹ ਸਾਡੇ ਸਿੱਖਣ, ਕੰਮ ਕਰਨ, ਆਧੁਨਿਕ ਸੇਵਾਵਾਂ ਤੱਕ ਪਹੁੰਚ ਅਤੇ ਮਨੁੱਖਤਾ ਦੀਆਂ ਵੱਡੀਆਂ ਚੁਣੌਤੀਆਂ ਨਾਲ ਨਜਿੱਠਣ ਦੇ ਤਰੀਕਿਆਂ ਨੂੰ ਤੇਜ਼ੀ ਨਾਲ ਬਦਲ ਰਿਹਾ ਹੈ | ਭਾਰਤ ਜਿਹੇ ਵਿਕਾਸਸ਼ੀਲ ਦੇਸ਼ ਲਈ (ਏ.ਆਈ.) ਸਿਰਫ਼ ਤਕਨੀਕ ਨਹੀਂ ਸਗੋਂ ਹਾਂ ਪੱਖੀ ਬਦਲਾਅ ਦਾ ਵੱਡਾ ਮੌਕਾ ਹੈ |' ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਨੇ ਵੀਰਵਾਰ ਨੂੰ ਰਾਸ਼ਟਰਪਤੀ ਭਵਨ ਦੇ ਸੰਸਕ੍ਰਿਤਕ ਕੇਂਦਰ 'ਚ ਕਰਵਾਏ ਗਏ ਵਿਸ਼ੇਸ਼ ਪ੍ਰੋਗਰਾਮ 'ਚ ਉਕਤ ਵਿਚਾਰ ਪ੍ਰਗਟਾਏ | ਰਾਸ਼ਟਰਪਤੀ ਨੇ ਕਿਹਾ ਕਿ ਭਾਰਤ ਦਾ ਹਮੇਸ਼ਾ ਤੋਂ ਨਜ਼ਰੀਆ ਰਿਹਾ ਹੈ ਕਿ ਤਕਨੀਕ ਲੋਕਾਂ ਨੂੰ ਮਜ਼ਬੂਤ ਬਣਾਏ ਅਤੇ ਸਭ ਲਈ ਮੌਕੇ ਪੈਦਾ ਕਰੇ | ਏ.ਆਈ. ਦੀ ਵਰਤੋਂ ਸਮਾਜਿਕ, ਆਰਥਿਕ ਅਤੇ ਤਕਨੀਕੀ ਦੂਰੀ ਨੂੰ ਘੱਟ ਕਰਨ ਲਈ ਕੀਤੀ ਜਾਣੀ ਚਾਹੀਦੀ ਹੈ | ਇਹ ਯਕੀਨੀ ਬਣਾਇਆ ਜਾਣਾ ਜ਼ਰੂਰੀ ਹੈ ਕਿ ਇਸ ਦਾ ਫਾਇਦਾ ਹਰ ਵਰਗ, ਉਮਰ ਅਤੇ ਹਾਸ਼ੀਏ 'ਤੇ ਖੜ੍ਹੇ ਲੋਕਾਂ ਤੱਕ ਪਹੁੰਚੇ | ਰਾਸ਼ਟਰਪਤੀ ਨੇ ਕਿਹਾ ਕਿ ਏ.ਆਈ. ਆਉਣ ਵਾਲੇ ਦਹਾਕੇ 'ਚ ਕੁੱਲ ਘਰੇਲੂ ਉਤਪਾਦ, ਰੁਜ਼ਗਾਰ ਅਤੇ ਉਤਪਾਦਕਤਾ ਨੂੰ ਉਤਸ਼ਾਹਿਤ ਕਰਨ 'ਚ ਅਹਿਮ ਭੂਮਿਕਾ ਨਿਭਾਏਗੀ | ਉਨ੍ਹਾਂ ਰਾਸ਼ਟਰੀ ਪੱਧਰ 'ਤੇ ਪ੍ਰਤਿਭਾ ਦੇ ਨਿਰਮਾਣ 'ਚ ਡੇਟਾ ਸਾਇੰਸ, ਏ.ਆਈ. ਇੰਜੀਨੀਅਰਿੰਗ ਅਤੇ ਡੇਟਾ ਐਨਾਲਿਟਿਕਸ ਜਿਹੇ ਹੁਨਰਾਂ ਦੀ ਅਹਿਮੀਅਤ 'ਤੇ ਵੀ ਜ਼ੋਰ ਦਿੱਤਾ | ਉਨ੍ਹਾਂ ਕਿਹਾ ਕਿ ਸਰਕਾਰ ਇਸ ਗੱਲ 'ਤੇ ਧਿਆਨ ਦੇ ਰਹੀ ਹੈ ਕਿ ਭਾਰਤ ਨਾ ਸਿਰਫ਼ ਉੱਨਤ ਤਕਨੀਕ ਨੂੰ ਅਪਣਾਏ ਸਗੋਂ ਇਕ ਜ਼ਿੰਮੇਵਾਰ ਅਤੇ ਸਮਾਵੇਸ਼ੀ ਤਕਨੀਕੀ ਭਵਿੱਖ ਦਾ ਨਿਰਮਾਣ ਵੀ ਕਰੇ | ਰਾਸ਼ਟਰਪਤੀ ਮੁਰਮੂ ਨੇ '#.ਸਕਿੱਲ ਦਾ ਨੇਸ਼ਨ' ਏ.ਆਈ. ਚੈਲੰਜ ਦੀ ਵੀ ਸ਼ੁਰੂਆਤ ਕੀਤੀ |
ਆਰਟੀਫਿਸ਼ੀਅਲ ਇੰਟੈਲੀਜੈਂਸ (ਏ.ਆਈ.) ਬਦਲਾਅ ਲਿਆਉਣ ਦਾ ਸ਼ਕਤੀਸ਼ਾਲੀ ਮੌਕਾ-ਰਾਸ਼ਟਰਪਤੀ
ਰਾਸ਼ਟਰਪਤੀ ਭਵਨ ਵਿਖੇ 'ਸਕਿੱਲ ਦਾ ਨੇਸ਼ਨ' ਚੈਲੰਜ, ਦੇ ਲਾਂਚ ਦੌਰਾਨ ਰਾਸ਼ਟਰਪਤੀ ਦਰੋਪਦੀ ਮੁਰਮੂ, ਨਾਲ ਕੇਂਦਰੀ ਮੰਤਰੀ ਧਰਮਿੰਦਰ ਪ੍ਰਧਾਨ, ਕੇਂਦਰੀ ਰਾਜ ਮੰਤਰੀ ਜੈਅੰਤ ਚੌਧਰੀ ਅਤੇ ਹੋਰ | <br/>
02-01-2026
