ਮਹਿੰਗਾ ਪਏਗਾ ਹਾਈਵੇ ਤੇ ਸੜਕਾਂ ਦੀਆਂ ਸਾਈਡਾਂ 'ਤੇ ਕੂੜਾ ਸੁੱਟਣਾ
ਅਜੀਤ ਡੈਸਕ
04-12-2025
ਸਹਾਇਕ ਕਮਿਸ਼ਨਰ ਵਿਕਰਾਂਤ ਵਰਮਾ ਨੇ ਦੱਸਿਆ ਕਿ ਬੀਤੀ ਰਾਤ ਪਠਾਨਕੋਟ ਚੌਕ ਹੋਟਲ ਦੋ ਕੋਲ, ਸ੍ਰੀ ਦੇਵੀ ਤਾਲਾਬ ਮੰਦਰ ਰੋਡ ਤੇ ਚੁਗਿੱਟੀ ਬਾਈਪਾਸ ਕੋਲ ਨਾਕੇ ਲਗਾਏ ਗਏ ਸੀ | ਟੀਮ ਨੇ ਚੈਕਿੰਗ ਵੇਲੇ ਕਈ ਲੋਕਾਂ ਨੂੰ ਰਾਤ ਨੂੰ ਕੂੜਾ ਸੁੱਟਦੇ ਫੜਿਆ ਤੇ ਉਨ੍ਹਾਂ ਨੂੰ ਪਹਿਲੀ ਵਾਰ ਚਿਤਾਵਨੀ ਦੇ ਕੇ ਛੱਡ ਦਿੱਤਾ ਕਿ ਜੇਕਰ ਇਸ ਤਰ੍ਹਾਂ ਨਾਲ ਅੱਗੇ ਵੀ ਹਾਈਵੇ ਅਤੇ ਸੜਕਾਂ ਦੀਆਂ ਸਾਈਡਾਂ 'ਤੇ ਕੂੜਾ ਸੁੱਟਦੇ ਕੋਈ ਫੜਿਆ ਜਾਂਦਾ ਹੈ ਤਾਂ ਜੁਰਮਾਨਾ ਵਸੂਲ ਕੀਤਾ ਜਾਵੇਗਾ | ਵਿਕਰਾਂਤ ਵਰਮਾ ਨੇ ਦੱਸਿਆ ਕਿ ਰਾਤ ਨੂੰ ਇਸ ਬਾਰੇ ਚੈਕਿੰਗ ਕਰਨ 'ਤੇ ਕੁਝ ਲੋਕਾਂ ਨੂੰ ਹਾਈਵੇ ਅਤੇ ਸੜਕਾਂ 'ਤੇ ਕੂੜਾ ਸੁੱਟਦਿਆਂ ਫੜਿਆ ਸੀ |
ਡੰਪਾਂ 'ਤੇ ਨਹੀਂ ਲੱਗੇ ਕੈਮਰੇ
ਕੁਝ ਸਮਾਂ ਪਹਿਲਾਂ ਨਿਗਮ ਪ੍ਰਸ਼ਾਸਨ ਨੇ ਫ਼ੈਸਲਾ ਕੀਤਾ ਸੀ ਕਿ ਡੰਪਾਂ 'ਤੇ ਕਈ ਰੈਸਟੋਰੈਂਟ, ਢਾਬੇ ਅਤੇ ਹੋਰ ਅਦਾਰੇ ਕੂੜਾ ਇਕੱਠਾ ਕਰਨ ਵਾਲੇ ਰੈਗ ਪਿੱਕਰਾਂ ਨੂੰ ਫ਼ੀਸ ਨਾ ਦੇਣ ਕਰਕੇ ਕੂੜਾ ਨਹੀਂ ਦਿੰਦੇ ਤੇ ਉਹ ਦੇਰ ਰਾਤ ਜਾਂ ਦਿਨ ਚੜੇ੍ਹ ਉਹ ਕੂੜਾ ਡੰਪਾਂ 'ਤੇ ਸੁੱਟ ਦਿੰਦੇ ਹਨ ਜਿਸ ਕਰਕੇ ਨਿਗਮ ਪ੍ਰਸ਼ਾਸਨ ਨੂੰ ਕੂੜਾ ਚੁੱਕਣ ਲਈ ਖਰਚਾ ਕਰਨਾ ਪੈਂਦਾ ਹੈ, ਉਨ੍ਹਾਂ ਨੂੰ ਰੋਕਣ ਲਈ ਡੰਪਾਂ 'ਤੇ ਕੈਮਰੇ ਲਗਾਏ ਜਾਣਗੇ ਪਰ ਅਜੇ ਤੱਕ ਕੈਮਰੇ ਨਹੀਂ ਲਗਾਏ ਗਏ ਹਨ, ਜਿਸ ਕਰਕੇ ਡੰਪਾਂ 'ਤੇ ਕੂੜਾ ਲਗਾਤਾਰ ਵਧ ਰਿਹਾ ਹੈ |
