ਟੱਲੇਵਾਲ, 29 ਦਸੰਬਰ (ਸੋਨੀ ਚੀਮਾ)-ਪੰਜਾਬ ਸਰਕਾਰ ਵਲੋਂ ਪਿਛਲੇ ਸਮੇਂ ਤੋਂ ਰਜਵਾਹਿਆਂ ਕੱਸੀਆਂ ਦੇ ਨਵ ਨਿਰਮਾਣ ਕੀਤਾ ਜਾ ਰਿਹਾ, ਜਿਸ ਦੇ ਚੱਲਦਿਆਂ ਪਹਿਲਾਂ ਬਣੇ ਰਜਵਾਹਿਆਂ ਤੇ ਕੱਸੀਆਂ ਦੇ ਕਈ ਪੁਲ ਵੀ ਉਕਤ ਨਿਰਮਾਣ ਦੌਰਾਨ ਟੱੁਟ ਗਏ, ਜਿਨਾਂ ਨੂੰ ਠੀਕ ਕਰਨ ਦੀ ਬਿਜਾਏ ਬਹੁਤੇ ਪੁਲਾਂ ਨੂੰ ਰਜਵਾਹਿਆਂ ਕੱਸੀਆਂ ਦਾ ਨਿਰਮਾਣ ਕਰ ਰਹੇ ਠੇਕੇਦਾਰ ਅੱਧਵਾਟੇ ਛੱਡ ਗਏ, ਜੋ ਵਾਹਨਾਂ ਦੇ ਲੰਘਣ ਕਾਰਨ ਪੂਰੀ ਤਰਾਂ ਟੱੁਟ ਗਏ ਹਨ ਅਤੇ ਹਰ ਰੋਜ਼ ਹਾਦਸਿਆਂ ਦਾ ਕਾਰਨ ਬਣ ਰਹੇ ਹਨ | ਅਜਿਹਾ ਹੀ ਮਾਮਲਾ ਪਿੰਡ ਪੱਖੋਕੇ ਤੋਂ ਮੱਲੀਆਂ ਨੂੰ ਜਾਂਦੇ ਕੱਚੇ ਰਸਤੇ ਸਬੰਧੀ ਵੀ ਸਾਹਮਣੇ ਆਇਆ ਹੈ, ਜੋ ਕਿ ਠੇਕੇਦਾਰ ਵਲੋਂ ਛੋਟਾ ਰਜਵਾਹਾ ਦਾ ਬਣਾਉਣ ਸਮੇਂ ਪੱਖੋਕੇ ਤੋਂ ਮੱਲੀਆਂ ਅਤੇ ਖੇਤਾਂ ਨੂੰ ਜਾਂਦੇ ਉਕਤ ਇਕੋ ਰਸਤੇ 'ਤੇ ਬਣੇ ਖਸਤਾ ਹਾਲ ਪੁਲ ਨੂੰ ਜਿਉਂ ਦਾ ਤਿਉਂ ਛੱਡ ਦਿੱਤਾ | ਜੋ ਵਿਚਕਾਰ ਤੋਂ ਬਿਲਕੁਲ ਟੱੁਟ ਚੱੁਕਾ ਹੈ ਅਤੇ ਹਾਦਸਿਆਂ ਨੂੰ ਸੱਦਾ ਦੇ ਰਿਹਾ ਹੈ | ਇਸ ਮੌਕੇ ਨਾਅਰੇਬਾਜ਼ੀ ਕਰਦਿਆਂ ਨਾਇਬ ਸਿੰਘ ਪੰਚ, ਸੁਖਪਾਲ ਸਿੰਘ, ਰਾਜ ਸ਼ਰਮਾ, ਜਗਦੇਵ ਸਿੰਘ, ਕਰਨੈਲ ਸਿੰਘ, ਜੋਰਾ ਸਿੰਘ, ਕਾਸੀ ਸਿੰਘ, ਦਰਸ਼ਨ ਸਿੰਘ, ਬੇਅੰਤ ਸਿੰਘ, ਜਗਵੰਤ ਸਿੰਘ ਆਦਿ ਨੇ ਰੋਸ ਜ਼ਾਹਰ ਕਰਦਿਆਂ ਕਿਹਾ ਕਿ ਉਕਤ ਰਸਤਾ ਕਾਫ਼ੀ ਚੱਲਦਾ ਹੈ, ਪਰ ਧੁੰਦ ਦੇ ਮੌਸਮ ਵਿਚ ਇਸ ਰਸਤੇ 'ਤੇ ਬਣਿਆ ਇਹ ਖਸਤਾ ਹਾਲਤ ਪੁਲ ਕਿਸੇ ਦੀ ਵੀ ਜਾਨ ਜੋਖ਼ਮ ਵਿਚ ਪਾ ਸਕਦਾ ਹੈ | ਜਿਸ ਲਈ ਪ੍ਰਸ਼ਾਸਨ ਅਤੇ ਠੇਕੇਦਾਰ ਇਸ ਪੁਲ ਦੀ ਮੁਰੰਮਤ ਆਦਿ ਕਰਵਾ ਕੇ ਲੋਕਾਂ ਦੀ ਸਮੱਸਿਆ ਦਾ ਹੱਲ ਕਰੇ |
