ਤਰਨ ਤਾਰਨ, 28 ਦਸੰਬਰ (ਹਰਿੰਦਰ ਸਿੰਘ)- ਫੇਸਬੁੱਕ 'ਤੇ ਮੱਝਾਂ ਵੇਚਣ ਦੇ ਨਾਂਅ 'ਤੇ ਪੈਸੇ ਮੰਗਵਾ ਕੇ ਬਾਅਦ 'ਚ ਖ਼ਰੀਦਦਾਰ ਨੂੰ ਮੱਝਾਂ ਨਾ ਭੇਜਣ ਦੇ ਦੋਸ਼ ਹੇਠ ਸਾਈਬਰ ਕਰਾਈਮ ਤਰਨ ਤਾਰਨ ਵਲੋਂ ਅਣਪਛਾਤੇ ਵਿਅਕਤੀ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ | ਇਸ ਸੰਬੰਧੀ ਬਲਵਿੰਦਰ ਸਿੰਘ ਪੁੱਤਰ ਪੂਰਨ ਸਿੰਘ ਵਾਸੀ ਮੱਜੂਪੁਰ ਨੇ ਪੁਲਿਸ ਨੂੰ ਸ਼ਿਕਾਇਤ ਦਰਜ ਕਰਵਾਈ ਕਿ ਉਸ ਨੇ ਫੇਸਬੁੱਕ 'ਤੇ ਇਕ ਇਸ਼ਤਿਹਾਰ ਦੇਖਿਆ, ਜਿਸ ਵਿਚ ਮੱਝਾਂ 16 ਕਿੱਲੋ ਦੁੱਧ, ਜਿਸ ਦਾ ਮੁੱਲ 80 ਹਜ਼ਾਰ ਰੁਪਏ ਕਿਹਾ ਗਿਆ | ਮੈਂ ਇਸ਼ਤਿਹਾਰਕਰਤਾ ਨਾਲ ਸੰਪਰਕ ਕਰਕੇ ਮਿਤੀ 13 ਸਤੰਬਰ 2025 ਨੂੰ 8000 ਰੁਪਏ ਭੇਜ ਦਿੱਤੇ | ਉਸ ਤੋਂ ਬਾਅਦ ਮੇਰੇ ਵਲੋਂ ਵੱਖ-ਵੱਖ ਤਰੀਕਾਂ ਨੂੰ ਕਰੀਬ 2 ਲੱਖ 38 ਹਾਜ਼ਰ 846 ਰੁਪਏ ਗੂਗਲ ਪੇਅ ਕੀਤੇ ਹਨ | ਉਸ ਨੇ ਦੱਸਿਆ ਕਿ ਉਕਤ ਅਣਪਛਾਤੇ ਵਿਅਕਤੀ ਵਲੋਂ ਨਾ ਤਾਂ ਮੈਨੂੰ ਮੱਝਾਂ ਭੇਜੀਆਂ ਗਈਆਂ ਹਨ ਤੇ ਨਾ ਹੀ ਪੈਸੇ ਵਾਪਸ ਕੀਤੇ ਗਏ ਹਨ ਤੇ ਉਲਟਾ ਜਾਨੋ ਮਾਰਨ ਦੀਆਂ ਧਮਕੀਆਂ ਦੇ ਰਿਹਾ ਹੈ | ਇਸ ਸੰਬੰਧੀ ਸਾਈਬਰ ਕਰਾਈਮ ਤਰਨ ਤਾਰਨ ਦੇ ਇੰਸ. ਜਸਪਾਲ ਸਿੰਘ ਨੇ ਮਾਮਲੇ ਦੀ ਜਾਂਚ ਕਰਦਿਆਂ ਅਣਪਛਾਤੇ ਵਿਅਕਤੀ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਉਸ ਦੀ ਭਾਲ ਲਈ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ |
