ਅੰਮਿ੍ਤਸਰ, 4 ਦਸੰਬਰ (ਸੁਰਿੰਦਰਪਾਲ ਸਿੰਘ ਵਰਪਾਲ)-ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਜੂਆਲੋਜੀ ਵਿਗਿਆਨ ਵਿਭਾਗ ਦੇ ਪ੍ਰੋ: ਡਾ. ਪੂਜਾ ਓਹਰੀ ਨੂੰ ਹਾਲ ਹੀ 'ਚ 'ਪ੍ਰੋਫ਼ੈਸਰ ਐੱਚ. ਐੱਮ. ਸ਼ਾਹ ਯਾਦਗਾਰੀ ਇਨਾਮ' ਅਤੇ 10,000/- ਰੁਪਏ ਦੇ ਨਕਦ ਰਾਸ਼ੀ ਨਾਲ ਸਨਮਾਨਿਤ ਕੀਤਾ ਗਿਆ | ਇਹ ਵਕਾਰੀ ਸਨਮਾਨ ਨੈਮਾਟੋਲੋਜੀ ਸੋਸਾਇਟੀ ਭਾਰਤ ਵਲੋਂ ਖੇਤੀਬਾੜੀ ਖੋਜ ਸੰਸਥਾਵਾਂ (ਆਈ. ਸੀ. ਏ. ਆਰ.-ਆਈ. ਆਈ. ਓ. ਆਰ. ਅਤੇ ਹੋਰ) ਦੇ ਸਹਿਯੋਗ ਨਾਲ ਕਰਵਾਏ ਗਏ ਰਾਸ਼ਟਰੀ ਸੈਮੀਨਾਰ ਦੌਰਾਨ ਦਿੱਤਾ ਗਿਆ | ਇਹ ਇਨਾਮ ਨੈਮਾਟੋਡ ਵਿਗਿਆਨ ਦੇ ਖੇਤਰ 'ਚ ਪਿਛਲੇ ਪੰਜ ਸਾਲਾਂ ਦੌਰਾਨ ਛਾਪੇ ਗਏ ਖੋਜ ਪੱਤਰਾਂ ਦੇ ਆਧਾਰ 'ਤੇ ਸਭ ਤੋਂ ਵਧੀਆ ਯੋਗਦਾਨ ਪਾਉਣ ਵਾਲੇ ਵਿਦਵਾਨ ਨੂੰ ਦਿੱਤਾ ਜਾਂਦਾ ਹੈ | ਡਾ. ਪੁਜਾ ਓਹਰੀ ਨੇ ਉਪ ਕੁਲਪਤੀ ਪ੍ਰੋ. (ਡਾ.) ਕਰਮਜੀਤ ਸਿੰਘ ਦਾ ਧੰਨਵਾਦ ਕਰਦਿਆਂ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ 'ਚ ਸਿਰਜੇ ਰਿਸਰਚ-ਕੇਂਦ੍ਰਤ ਅਕਾਦਮਿਕ ਮਾਹੌਲ ਦੀ ਪ੍ਰਸ਼ੰਸਾ ਕੀਤੀ | ਉਨ੍ਹਾਂ ਕਿਹਾ ਕਿ ਯੂਨੀਵਰਸਿਟੀ ਦੀ ਪ੍ਰਗਤੀਸ਼ੀਲ ਸੋਚ, ਸਹਿਯੋਗੀ ਨੀਤੀਆਂ ਅਤੇ ਅਕਾਦਮਿਕ-ਰਿਸਰਚ 'ਚ ਅੱਗੇ ਵਧਣ ਪ੍ਰਤੀ ਵਚਨਬੱਧਤਾ ਨੇ ਉਨ੍ਹਾਂ ਨੂੰ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਪੱਧਰ 'ਤੇ ਮਾਣ ਹਾਸਿਲ ਕਰਨ 'ਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ |
