ਸ਼ਾਹਪੁਰ ਕੰਢੀ, 23 ਸਤੰਬਰ (ਰਣਜੀਤ ਸਿੰਘ)-ਕੰਢੀ ਇਲਾਕੇ ਦੇ ਕਿਸਾਨ ਜੰਗਲੀ ਜਾਨਵਰਾਂ ਤੋਂ ਡਾਢੇ ਪ੍ਰੇਸ਼ਾਨ ਹਨ | ਜੰਗਲੀ ਜਾਨਵਰ ਸੂਰ, ਬਾਂਦਰ ਪੱਕੀਆਂ ਫ਼ਸਲਾਂ ਬਰਬਾਦ ਕਰ ਰਹੇ ਹਨ | ਪਿੰਡ ਮੱਟੀ, ਕੋਟ, ਜੁੱਗਥਾ ਹਲੇਡ ਆਦਿ ਪਿੰਡਾਂ ਦੇ ਕਿਸਾਨ ਸੁਰਜਨ ਸਿੰਘ, ਵਿਸ਼ਾਲ ਸਿੰਘ, ਮਹਿੰਦਰ ਸਿੰਘ, ਮਲਕੀਅਤ ਸਿੰਘ, ਜਗਵੀਰ ਸਿੰਘ ਆਦਿ ਨੇ ਦੱਸਿਆ ਕਿ ਜੰਗਲੀ ਜਾਨਵਰਾਂ ਨੇ ਕਿਸਾਨਾਂ ਦੀ ਰਾਤਾਂ ਦੀ ਨੀਂਦ ਹਰਾਮ ਕੀਤੀ ਹੋਈ ਹੈ | ਰਾਤ ਸਮੇਂ ਜੰਗਲੀ ਸੂਰ ਝੁੰਡ ਬਣਾ ਕੇ ਆਉਂਦੇ ਹਨ ਤੇ ਮੱਕੀ ਦੀ ਪੱਕੀ ਫਸਲ ਬਰਬਾਦ ਕਰ ਦਿੰਦੇ ਹਨ | ਦਿਨ ਦੇ ਸਮੇਂ ਬਾਂਦਰਾਂ ਨੇ ਖੌਫ ਮਚਾਇਆ ਹੁੰਦਾ ਹੈ | ਜਦੋਂ ਵੀ ਰਣਜੀਤ ਸਾਗਰ ਡੈਮ ਦੇ ਝੀਲ ਵਿਚ ਪਾਣੀ ਵੱਧ ਜਾਂਦਾ ਹੈ ਤਾਂ ਜੰਗਲੀ ਜਾਨਵਰ ਪਿੰਡ 'ਚ ਮੂੰਹ ਕਰ ਲੈਂਦੇ ਹਨ | ਕਿਸਾਨਾਂ ਨੇ ਮੰਗ ਕੀਤੀ ਹੈ ਕਿ ਜਿਹੜੀਆਂ ਜ਼ਮੀਨਾਂ ਜੰਗਲਾਂ ਦੇ ਨਜ਼ਦੀਕ ਹਨ, ਵਿਭਾਗ ਉਨ੍ਹਾਂ ਥਾਵਾਂ 'ਤੇ ਕੰਡਿਆਲੀ ਤਾਰ ਲਗਵਾਏ ਤਾਂ ਜੋ ਜੰਗਲੀ ਜਾਨਵਰ ਖੇਤਾਂ ਵੱਲ ਨਾ ਆ ਸਕਣ |
