ਜਗਰਾਉਂ, 22 ਦਸੰਬਰ (ਗੁਰਦੀਪ ਸਿੰਘ ਮਲਕ)-ਕਿਰਤੀ ਕਿਸਾਨ ਯੂਨੀਅਨ ਦੇ ਇਕ ਵਫ਼ਦ ਨੇ ਐੱਸ.ਐੱਸ.ਪੀ. ਲੁਧਿਆਣਾ ਦਿਹਾਤੀ ਡਾ: ਅੰਕੁਰ ਗੁਪਤਾ ਨੂੰ ਕਿਰਤੀ ਕਿਸਾਨ ਯੂਨੀਅਨ ਦੇ ਸੂਬਾ ਆਗੂ ਸੰਤੋਖ ਸਿੰਘ ਸੰਧੂ, ਜ਼ਿਲ੍ਹਾ ਪ੍ਰਧਾਨ ਸਾਧੂ ਸਿੰਘ ਅੱਚਰਵਾਲ, ਜਗਰੂਪ ਸਿੰਘ ਗਿੱਲ, ਤਹਿਸੀਲ ਪ੍ਰਧਾਨ ਸਾਬਕਾ ਸਰਪੰਚ ਬਚਨ ਸਿੰਘ ਦੀ ਅਗਵਾਈ ਹੇਠ ਮਿਲ ਕੇ ਮੰਗ ਕੀਤੀ ਕਿ ਹੜ੍ਹ ਪੀੜਤ ਕਿਸਾਨ ਸੰਘਰਸ਼ ਕਮੇਟੀ ਦੇ ਨਾਂਅ ਹੇਠ ਕਿਸਾਨਾਂ ਦੀ ਮਦਦ ਦੇ ਬਹਾਨੇ ਧੋਖੇ ਨਾਲ ਕਿਸਾਨਾਂ ਦੇ ਵਾਹਨ ਕਿਰਾਏ 'ਤੇ ਲੈ ਕੇ ਮਾਈਨਿੰਗ ਕਰ ਰਹੇ ਮਾਫੀਆ ਵਿਰੁੱਧ ਕਾਰਵਾਈ ਕੀਤੀ ਜਾਵੇ ਅਤੇ ਜਿਹੜੇ ਕਿਸਾਨਾਂ ਵਿਰੁੱਧ ਮੁਕਦਮਾ ਨੰਬਰ 283 ਦਰਜ ਕੀਤਾ ਗਿਆ ਹੈ, ਨੂੰ ਰੱਦ ਕੀਤਾ ਜਾਵੇ | ਇੱਥੇ ਵਰਨਣਯੋਗ ਹੈ ਕਿ ਪੰਜਾਬ ਸਰਕਾਰ ਵਲੋਂ ਹੜ੍ਹਾਂ ਕਾਰਨ ਕਿਸਾਨਾਂ ਦੇ ਖੇਤਾਂ 'ਚ ਪਈ ਰੇਤ ਚੁੱਕਣ ਲਈ ਕੀਤਾ ਗਿਆ ਐਲਾਨ 'ਜਿਸਦਾ ਖੇਤ ਉਸਦੀ ਰੇਤ' ਦਾ ਲਾਹਾ ਲੈ ਕੇ ਰੇਤ ਮਾਫੀਆ ਨੇ ਕਿਸਾਨਾਂ ਦੀ ਮਦਦ ਦੇ ਬਹਾਨੇ ਜਗਰਾਉਂ ਤਹਿਸੀਲ ਵਿਚ ਪੈਂਦੇ ਪਿੰਡ ਮੱਧੇਪੁਰ ਵਿਚ ਲੋੜਵੰਦ ਕਿਸਾਨਾਂ ਕੋਲ ਉਨ੍ਹਾਂ ਦੇ ਵਾਹਨ ਕਿਰਾਏ 'ਤੇ ਲੈ ਕੇ ਅਤੇ ਨੇੜਲੇ ਇਲਾਕੇ ਤੋਂ ਲੇਬਰ ਰਾਹੀਂ ਮਾਈਨਿੰਗ ਕੀਤੀ ਜਾ ਰਹੀ ਸੀ | ਮਾਈਨਿੰਗ ਵਿਭਾਗ ਨੇ ਨਾ ਤਾਂ ਕਿਸਾਨਾਂ ਅਤੇ ਨਾ ਹੀ ਪੰਚਾਇਤਾਂ ਨੂੰ ਇਸ ਦੀ ਜਾਣਕਾਰੀ ਦਿੱਤੀ | ਇਲਾਕੇ ਵਿਚ ਰੇਤ ਮਾਫੀਆ ਕਿਸਾਨਾਂ ਨੂੰ ਗੁੰਮਰਾਹ ਕਰਕੇ ਰੇਤ ਦੀ ਢੋਆ ਢੁਆਈ ਕਰਵਾ ਰਿਹਾ ਹੈ | ਨਾ ਹੀ ਸਿੱਧਵਾਂ ਥਾਣੇ ਨੇ ਟਿੱਪਰਾਂ 'ਤੇ ਹੋ ਰਹੀ ਰੇਤ ਦੀ ਢੋਆ ਢੁਆਈ ਨੂੰ ਰੋਕਿਆ | ਜਿਹੜੀ ਅੱਜ ਵੀ ਲੁਧਿਆਣਾ ਅਤੇ ਜਲੰਧਰ ਨੂੰ ਧੜੱਲੇ ਨਾਲ ਟਿੱਪਰਾਂ 'ਤੇ ਕੀਤੀ ਜਾ ਰਹੀ ਹੈ | ਵਫ਼ਦ ਦੇ ਵਿਚ ਸ਼ਾਮਿਲ ਯੂਥ ਵਿੰਗ ਦੇ ਆਗੂ ਰਮਨ ਸਿੰਘ, ਯੂਨੀਅਨ ਆਗੂ ਸੁਰਿੰਦਰ ਸਿੰਘ, ਗੁਰਕਮਲ ਸਿੰਘ, ਰਤਨ ਸਿੰਘ, ਸੁਰਜੀਤ ਸਿੰਘ ਸਮਰਾ, ਸੁਖਦੇਵ ਸਿੰਘ, ਕਸ਼ਮੀਰ ਮੰਡਿਆਲਾ ਆਦਿ ਸ਼ਾਮਿਲ ਸਨ |
