ਆਈ.ਐਸ.ਆਈ. ਨਾਲ ਜੁੜੇ ਕੌਮਾਂਤਰੀ ਹਥਿਆਰ ਤਸਕਰਾਂ ਦਾ ਪਰਦਾਫਾਸ਼

• ਪੰਜਾਬ ਦੇ 2 ਗੈਂਗਸਟਰਾਂ ਸਮੇਤ 4 ਕਾਬੂ • ਵਿਦੇਸ਼ੀ ਹਥਿਆਰ ਬਰਾਮਦ
ਨਵੀਂ ਦਿੱਲੀ, 22 ਨਵੰਬਰ (ਮਿਸਰਦੀਪ ਸਿੰਘ ਭਾਟੀਆ)-ਦਿੱਲੀ ਪੁਲਿਸ ਨੇ ਕਿਹਾ ਹੈ ਕਿ ਉੱਤਰੀ ਭਾਰਤ 'ਚ ਸੰਗਠਿਤ ਅਪਰਾਧ ਸਮੂਹਾਂ ਨੂੰ ਉੱਚ-ਪੱਧਰੀ ਵਿਦੇਸ਼ੀ ਹਥਿਆਰਾਂ ਦੀ ਸਪਲਾਈ ਕਰਨ 'ਚ ਸ਼ਾਮਿਲ 4 ਮੁੱਖ ਕਾਰਕੰੁਨਾਂ ਦੀ ਗਿ੍ਫ਼ਤਾਰੀ ਨਾਲ ਪਾਕਿਸਤਾਨ ਦੇ ਆਈ. ਐਸ. ਆਈ.-ਸਮਰਥਿਤ ਤਸਕਰਾਂ ਨਾਲ ਜੁੜੇ ਇਕ ਅੰਤਰਰਾਸ਼ਟਰੀ ਹਥਿਆਰਾਂ ਦੀ ਤਸਕਰੀ ਨੈੱਟਵਰਕ ਦਾ ਪਰਦਾਫਾਸ਼ ਕੀਤਾ ਗਿਆ ਹੈ | ਗਿ੍ਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਛਾਣ ਮਨਦੀਪ ਸਿੰਘ (38) ਤੇ ਦਲਵਿੰਦਰ ਕੁਮਾਰ (34) ਦੋਵੇਂ ਪੰਜਾਬ ਦੇ ਰਹਿਣ ਵਾਲੇ ਤੇ ਰੋਹਨ ਤੋਮਰ (30) ਤੇ ਅਜੈ ਉਰਫ਼ ਮੋਨੂੰ (37) ਉੱਤਰ ਪ੍ਰਦੇਸ਼ ਦੇ ਬਾਗਪਤ ਦੇ ਰਹਿਣ ਵਾਲੇ ਵਜੋਂ ਹੋਈ ਹੈ | ਪੁਲਿਸ ਨੇ ਦੱਸਿਆ ਕਿ 19 ਨਵੰਬਰ ਨੂੰ ਆਈ. ਐਸ. ਆਈ.-ਸਮਰਥਿਤ ਸਪਲਾਈ ਚੇਨ ਬਾਰੇ ਖੁਫੀਆ ਜਾਣਕਾਰੀ ਮਿਲੀ ਸੀ, ਜੋ ਪੰਜਾਬ ਮੂਲ ਦੇ ਗੈਂਗਸਟਰ ਸੋਨੂੰ ਖੱਤਰੀ ਉਰਫ਼ ਰਾਜੇਸ਼ ਕੁਮਾਰ, ਜੋ ਇਸ ਸਮੇਂ ਅਮਰੀਕਾ 'ਚ ਰਹਿੰਦਾ ਹੈ ਤੇ 45 ਤੋਂ ਵੱਧ ਅਪਰਾਧਿਕ ਮਾਮਲਿਆਂ 'ਚ ਲੋੜੀਂਦਾ ਹੈ, ਦੇ ਗੈਂਗ ਨਾਲ ਜੁੜੀ ਹੋਈ ਹੈ | ਕੁੱਲ 10 ਪਿਸਤੌਲ, ਜਿਨ੍ਹਾਂ 'ਚ ਤਿੰਨ ਤੁਰਕੀ-ਬਣੇ ਪੀ.ਐਕਸ.-5.7 ਪਿਸਤੌਲ ਤੇ ਪੰਜ ਚੀਨ-ਬਣੇ ਪੀ.ਐਕਸ.-3 ਪਿਸਤੌਲ ਸ਼ਾਮਿਲ ਹਨ, 92 ਜ਼ਿੰਦਾ ਕਾਰਤੂਸ ਤੇ ਇਕ ਚਿੱਟੀ ਕਾਰ ਸਮੇਤ ਜ਼ਬਤ ਕੀਤੇ ਗਏ ਹਨ | ਪੁਲਿਸ ਅਨੁਸਾਰ ਨੈੱਟਵਰਕ ਨੇ ਡਰੋਨ ਦੀ ਵਰਤੋਂ ਕਰਕੇ ਪਾਕਿਸਤਾਨ ਤੋਂ ਤਸਕਰੀ ਕੀਤੇ ਗਏ ਵਿਦੇਸ਼ੀ ਹਥਿਆਰ ਪ੍ਰਾਪਤ ਕੀਤੇ ਤੇ ਉਨ੍ਹਾਂ ਨੂੰ ਦਿੱਲੀ, ਹਰਿਆਣਾ, ਉੱਤਰ ਪ੍ਰਦੇਸ਼ ਤੇ ਪੰਜਾਬ ਦੇ ਗੈਂਗਸਟਰਾਂ ਨੂੰ ਸਪਲਾਈ ਕੀਤਾ | ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਰਾਡਾਰ ਤੋਂ ਬਚਣ ਲਈ ਘੱਟ ਉਚਾਈ ਵਾਲੀਆਂ ਉਡਾਣਾਂ ਦੇ ਸਮਰੱਥ ਅਨੁਕੂਲਿਤ ਡਰੋਨਾਂ ਦੀ ਵਰਤੋਂ ਕਰਕੇ ਪਾਕਿਸਤਾਨ ਤੋਂ ਹਥਿਆਰਾਂ ਦੀ ਤਸਕਰੀ ਕੀਤੀ ਜਾ ਰਹੀ ਸੀ | ਸਰਹੱਦ ਪਾਰ ਸਥਿਤ ਤਸਕਰਾਂ ਨੇ ਦੇਰ ਰਾਤ ਪੰਜਾਬ 'ਚ ਅੰਤਰਰਾਸ਼ਟਰੀ ਸਰਹੱਦ ਦੇ ਕਮਜ਼ੋਰ ਹਿੱਸਿਆਂ ਦੇ ਨਾਲ-ਨਾਲ ਪਹਿਲਾਂ ਤੋਂ ਨਿਸ਼ਾਨਬੱਧ ਜੀ.ਪੀ.ਐਸ. ਸਥਾਨਾਂ 'ਤੇ ਖੇਪਾਂ ਸੁੱਟੀਆਂ |