ਸਮਾਜ ਤੇ ਰਾਸ਼ਟਰਾਂ ਲਈ ਖ਼ਤਰਾ ਹਨ ਨਸ਼ੀਲੇ ਪਦਾਰਥ ਤੇ ਅੱਤਵਾਦ-ਮੋਦੀ

ਜੀ-20 ਸੰਮੇਲਨ ਦੌਰਾਨ ਮਾਨਵਤਾਵਾਦ ਨੂੰ ਉਤਸ਼ਾਹਿਤ ਕਰਨ ਲਈ ਸਿਹਤ ਸੰਭਾਲ ਤੇ ਗਿਆਨ ਤਜਵੀਜ਼ਾਂ ਰੱਖੀਆਂ
ਜੋਹਾਨਸਬਰਗ, 22 ਨਵੰਬਰ (ਪੀ.ਟੀ.ਆਈ.)-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਜੀ-20 ਸਿਖ਼ਰ ਸੰਮੇਲਨ ਨੂੰ ਸੰਬੋਧਨ ਕਰਦਿਆਂ ਵਿਸ਼ਵਵਿਆਪੀ ਵਿਕਾਸ ਮਾਪਦੰਡਾਂ 'ਤੇ ਡੂੰਘਾਈ ਨਾਲ ਮੁੜ-ਵਿਚਾਰ ਕਰਨ ਦਾ ਸੱਦਾ ਦਿੰਦਿਆਂ 'ਡਰੱਗ-ਅੱਤਵਾਦ' ਗੱਠਜੋੜ ਵਿਰੁੱਧ ਜੰਗ ਲਈ ਅਤੇ ਮਾਨਵਤਾਵਾਦ ਨੂੰ ਉਤਸ਼ਾਹਿਤ ਕਰਨ ਲਈ ਸਿਹਤ ਸੰਭਾਲ ਅਤੇ ਹੁਨਰ 'ਤੇ ਆਪਣੀਆਂ ਤਜਵੀਜ਼ਾਂ ਪੇਸ਼ ਕੀਤੀਆਂ | ਜੀ-20 ਨੇਤਾਵਾਂ ਦੀ ਮੀਟਿੰਗ ਦੇ ਉਦਘਾਟਨੀ ਸੈਸ਼ਨ ਨੂੰ ਸੰਬੋਧਨ ਕਰਦੇ ਹੋਏ ਮੋਦੀ ਨੇ ਵਾਤਾਵਰਨ-ਸੰਤੁਲਿਤ, ਸੱਭਿਆਚਾਰਕ ਤੌਰ 'ਤੇ ਅਮੀਰ ਤੇ ਸਮਾਜਿਕ ਤੌਰ 'ਤੇ ਇਕਸੁਰ ਜੀਵਨ ਢੰਗਾਂ ਨੂੰ ਸੁਰੱਖਿਅਤ ਰੱਖਣ ਲਈ ਜੀ-20 ਅਧੀਨ ਇਕ ਵਿਸ਼ਵ ਵਿਆਪੀ ਪਰੰਪਰਾਗਤ ਗਿਆਨ ਭੰਡਾਰ ਬਣਾਉਣ ਦਾ ਪ੍ਰਸਤਾਵ ਰੱਖਿਆ | ਮੋਦੀ ਨੇ 'ਸਮਵੇਸ਼ੀ ਤੇ ਟਿਕਾਊ ਆਰਥਿਕ ਵਿਕਾਸ ਕਿਸੇ ਨੂੰ ਵੀ ਪਿੱਛੇ ਨਹੀਂ ਛੱਡਦਾ' ਵਿਸ਼ੇ 'ਤੇ ਇਜਲਾਸ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਹੁਣ ਸਾਡੇ ਲਈ ਆਪਣੇ ਵਿਕਾਸ ਮਾਪਦੰਡਾਂ 'ਤੇ ਮੁੜ-ਵਿਚਾਰ ਕਰਨ ਤੇ ਉਸ ਵਿਕਾਸ 'ਤੇ ਧਿਆਨ ਕੇਂਦਰਿਤ ਕਰਨ ਦਾ ਸਹੀ ਸਮਾਂ ਹੈ, ਜੋ ਸਮਾਵੇਸ਼ੀ ਤੇ ਟਿਕਾਊ ਹੋਵੇ | ਉਨ੍ਹਾਂ ਕਿਹਾ ਕਿ ਭਾਰਤ ਦੇ ਸੱਭਿਅਕ ਮੁੱਲ, ਖਾਸ ਕਰਕੇ ਅਟੁੱਟ ਮਨੁੱਖਤਾਵਾਦ ਦਾ ਸਿਧਾਂਤ ਅੱਗੇ ਵਧਣ ਦਾ ਰਸਤਾ ਪੇਸ਼ ਕਰਦੇ ਹਨ | ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ, ਖਾਸ ਕਰਕੇ ਫੈਂਟਾਨਿਲ ਵਰਗੇ ਬਹੁਤ ਹੀ ਖ਼ਤਰਨਾਕ ਪਦਾਰਥਾਂ ਦੀ ਚੁਣੌਤੀ ਨੂੰ ਦੂਰ ਕਰਨ ਲਈ ਭਾਰਤ ਵਲੋਂ ਨਸ਼ੀਲੇ ਪਦਾਰਥਾਂ-ਅੱਤਵਾਦ ਦੇ ਗੱਠਜੋੜ ਦਾ ਮੁਕਾਬਲਾ ਕਰਨ ਲਈ ਜੀ-20 ਪਹਿਲਕਦਮੀ ਦਾ ਪ੍ਰਸਤਾਵ ਰੱਖਿਆ | ਉਨ੍ਹਾਂ ਕਿਹਾ ਕਿ ਅਫਰੀਕਾ ਦੀ ਤਰੱਕੀ ਵਿਸ਼ਵਵਿਆਪੀ ਤਰੱਕੀ ਲਈ ਬਹੁਤ ਜ਼ਰੂਰੀ ਹੈ ਅਤੇ ਉਨ੍ਹਾਂ ਜੀ-20-ਅਫਰੀਕਾ ਹੁਨਰ ਗੁਣਕ ਪਹਿਲਕਦਮੀ ਦਾ ਪ੍ਰਸਤਾਵ ਰੱਖਿਆ | ਉਨ੍ਹਾਂ ਕਿਹਾ ਕਿ ਭਾਰਤ ਹਮੇਸ਼ਾ ਅਫਰੀਕਾ ਨਾਲ ਏਕਤਾ 'ਚ ਖੜ੍ਹਾ ਰਿਹਾ ਹੈ | ਮੈਨੂੰ ਇਸ ਤੱਥ 'ਤੇ ਮਾਣ ਹੈ ਕਿ ਭਾਰਤ ਦੀ ਜੀ-20 ਪ੍ਰਧਾਨਗੀ ਦੌਰਾਨ ਹੀ ਅਫਰੀਕੀ ਯੂਨੀਅਨ ਇਕ ਸਥਾਈ ਜੀ-20 ਮੈਂਬਰ ਬਣਿਆ | ਉਨ੍ਹਾਂ ਕਿਹਾ ਕਿ ਸਾਡਾ ਸਮੂਹਿਕ ਟੀਚਾ ਅਗਲੇ ਦਹਾਕੇ ਅੰਦਰ ਅਫਰੀਕਾ 'ਚ 10 ਲੱਖ ਪ੍ਰਮਾਣਿਤ ਸਿਖਲਾਈ ਪ੍ਰਾਪਤ ਮਾਹਿਰ ਬਣਾਉਣ ਵੱਲ ਹੋਣਾ ਚਾਹੀਦਾ ਹੈ | ਉਨ੍ਹਾਂ ਜੀ-20 ਗਲੋਬਲ ਹੈਲਥਕੇਅਰ ਰਿਸਪਾਂਸ ਟੀਮ ਦੀ ਸਥਾਪਨਾ ਦਾ ਵੀ ਪ੍ਰਸਤਾਵ ਰੱਖਿਆ | ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਅਸੀਂ ਸਿਹਤ ਐਮਰਜੈਂਸੀ ਤੇ ਕੁਦਰਤੀ ਆਫ਼ਤਾਂ ਦਾ ਸਾਹਮਣਾ ਕਰਨ ਵੇਲੇ ਇਕੱਠੇ ਕੰਮ ਕਰਨ 'ਤੇ ਹੋਰ ਮਜ਼ਬੂਤ ਹੁੰਦੇ ਹਾਂ | ਸਾਡੀ ਕੋਸ਼ਿਸ਼ ਸਾਥੀ ਜੀ-20 ਦੇਸ਼ਾਂ ਤੋਂ ਸਿਖਲਾਈ ਪ੍ਰਾਪਤ ਡਾਕਟਰੀ ਮਾਹਿਰਾਂ ਦੀਆਂ ਟੀਮਾਂ ਬਣਾਉਣ ਦੀ ਹੋਣੀ ਚਾਹੀਦੀ ਹੈ, ਜੋ ਕਿਸੇ ਵੀ ਐਮਰਜੈਂਸੀ ਦੀ ਸਥਿਤੀ 'ਚ ਤੇਜ਼ੀ ਨਾਲ ਤਾਇਨਾਤੀ ਲਈ ਤਿਆਰ ਹੋਣ |