ਕਾਠਮੰਡੂ, 10 ਸਤੰਬਰ- ਨਿਪਾਲ ਵਿਚ ਆਏ ਭਿਆਨਕ ਹੜ੍ਹਾਂ ਤੋਂ ਬਾਅਦ ਭਾਰਤ ਨੇ 35 ਟਨ ਰਾਹਤ ਅਤੇ ਬਚਾਅ ਸਮੱਗਰੀ ਦੀ ਆਪਣੀ ਅੱਠਵੀਂ ਖੇਪ ਭੇਜੀ। ਭਾਰਤੀ ਹਵਾਈ ਸੈਨਾ ਦਾ ਇਕ ਜਹਾਜ਼ ਬੁੱਧਵਾਰ ਨੂੰ ਕਾਠਮੰਡੂ ਪਹੁੰਚਿਆ, ਜਿਸ ਨਾਲ ਭਾਰਤ ਦੀ ਕੁੱਲ ਰਾਹਤ ਸਮੱਗਰੀ ਦੀ ਖੇਪ 130 ਟਨ ਤੋਂ ਵੱਧ ਹੋ ਗਈ।
ਇਸ ਖੇਪ ਵਿਚ ਤੰਬੂ, ਕੰਬਲ, ਸਫਾਈ ਕਿੱਟਾਂ, ਸੂਰਜੀ ਲੈਂਪ, ਦਵਾਈਆਂ ਅਤੇ ਬਚਾਅ ਉਪਕਰਣ ਸ਼ਾਮਿਲ ਹਨ। ਭਾਰਤ ਨੇ 26 ਅਗਸਤ ਨੂੰ ਰਾਹਤ ਕਾਰਜ ਸ਼ੁਰੂ ਕੀਤਾ ਸੀ।
ਨਿਪਾਲ ਪੁਲਿਸ ਦੇ ਅਨੁਸਾਰ ਹੜ੍ਹ ਪ੍ਰਭਾਵਿਤ ਖੇਤਰਾਂ ਤੋਂ ਹੁਣ ਤੱਕ 1,367 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ। 102 ਲਾਸ਼ਾਂ ਦੀ ਪਛਾਣ ਕੀਤੀ ਗਈ ਹੈ। ਪਛਾਣ ਲਈ ਡੀ.ਐਨ.ਏ. ਨਮੂਨੇ ਇਕੱਠੇ ਕੀਤੇ ਜਾ ਰਹੇ ਹਨ ਅਤੇ ਭਾਰਤ ਸਮੇਤ ਕਈ ਦੇਸ਼ਾਂ ਦੇ ਫੋਰੈਂਸਿਕ ਮਾਹਰ ਸਹਾਇਤਾ ਕਰ ਰਹੇ ਹਨ। ਰਸੁਵਾ ਜ਼ਿਲ੍ਹੇ ਦੇ ਚਿਲੀਮੇ ਹਾਈਡ੍ਰੋਪਾਵਰ ਪ੍ਰੋਜੈਕਟ 'ਤੇ ਨਿਪਾਲੀ ਅਤੇ ਭਾਰਤੀ ਫੌਜੀ ਟੀਮਾਂ ਦੁਆਰਾ ਇੱਕ ਸਾਂਝਾ ਖੋਜ ਅਤੇ ਬਚਾਅ ਕਾਰਜ ਚਲਾਇਆ ਜਾ ਰਿਹਾ ਹੈ। ਟੀਮ ਹੁਣ ਤੱਕ ਸੇਵਾ ਸੁਰੰਗ ਦੇ ਅੰਦਰ ਲਗਭਗ 105 ਮੀਟਰ ਅੰਦਰ ਦਾਖਲ ਹੋ ਚੁੱਕੀ ਹੈ।
ਪ੍ਰੋਜੈਕਟ ਵੱਲ ਜਾਣ ਵਾਲੀ ਸੜਕ ਤੋਂ ਮਲਬਾ ਵੀ ਸਾਫ਼ ਕੀਤਾ ਜਾ ਰਿਹਾ ਹੈ। ਪ੍ਰਭਾਵਿਤ ਖੇਤਰ ਦੇ ਦੋਵੇਂ ਪਾਸੇ ਰੱਸੀ ਦੀਆਂ ਲਾਈਨਾਂ ਲਗਾਈਆਂ ਗਈਆਂ ਹਨ।
ਨਿਪਾਲ ਫੌਜ ਦੀ ਇਕ ਟੀਮ ਉਸੇ ਦਿਨ ਘਟਨਾ ਸਥਾਨ 'ਤੇ ਪਹੁੰਚੀ, ਜਿਸ ਦਿਨ ਹੜ੍ਹ ਆਇਆ ਸੀ। ਉਨ੍ਹਾਂ ਨੇ ਪਹਿਲਾਂ ਇਲਾਕੇ ਦਾ ਸਰਵੇਖਣ ਕੀਤਾ ਅਤੇ ਫਿਰ ਸੁਰੰਗ ਦੇ ਮੂੰਹ ਤੋਂ ਚਿੱਕੜ ਅਤੇ ਮਲਬਾ ਹਟਾਉਂਦੇ ਹੋਏ ਸੁਰੰਗ ਵਿਚ ਦਾਖਲ ਹੋਏ। ਉੱਥੇ ਦੋ ਲੋਕਾਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ।
