ਯੁੱਧ ਨਸ਼ਿਆਂ ਵਿਰੁੱਧ ਮੁਹਿੰਮ ਤਹਿਤ ਗੁਰਦਾਸਪੁਰ ਪੁਲਿਸ ਦੀ 15 ਦਿਨਾਂ ਵਿਚ ਛੇਵੀਂ ਵੱਡੀ ਕਾਮਯਾਬੀ

ਗੁਰਦਾਸਪੁਰ,  7 ਸਤੰਬਰ (ਰੋਹਿਤ ਗੁਪਤਾ)- ਗੁਰਦਾਸਪੁਰ ਜ਼ਿਲ੍ਹੇ ਦੇ ਥਾਣਾ ਬਹਿਰਾਮਪੁਰ ਦੀ ਪੁਲਿਸ ਅਤੇ ਖੁਫੀਆ ਵਿਭਾਗ ਗੁਰਦਾਸਪੁਰ ਦੀ ਟੀਮ ਵਲੋਂ ਦੇਰ ਰਾਤ ਰਾਵੀ ਦਰਿਆ ਦੇੇ ਕਿਨਾਰੇ ਸਥਿਤ ਪਿੰਡਾਂ ਵਿਚ ਕੀਤੇ ਸਾਂਝੇ ਅਭਿਆਨ ਦੌਰਾਨ ਕਰੀਬ 5 ਪੈਕਟ ਹੈਰੋਇਨ ਸਣੇ ਇਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਜਦਕਿ ਉਸਦਾ ਇਕ ਸਾਥੀ ਫਰਾਰ ਹੋਣ ਵਿਚ ਕਾਮਯਾਬ ਹੋ ਗਿਆ। ਐਸ.ਐਸ.ਪੀ. ਆਦਿੱਤਿਆ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਬਹਿਰਾਮਪੁਰ ਪੁਲਿਸ ਅਤੇ ਖੁਫੀਆ ਵਿਭਾਗ (ਐਸਐਸਪੀ) ਗੁਰਦਾਸਪੁਰ ਵਲੋਂ ਕੀਤੇ ਸਾਂਝੇ ‌ਅਭਿਆਨ ਦੌਰਾਨ ਰਾਵੀ ਦਰਿਆ ਦੇ ਨੇੜਿਓਂ ਕਰੀਬ 5 ਪੈਕਟ ਹੈਰੋਇਨ, ਜਿਸ ਦਾ ਕੁੱਲ ਵਜਨ 2.7 ਕਿਲੋ ਨਿਕਲਿਆ ਹੈ, ਸਮੇਤ ਬਲਵਿੰਦਰ ਸਿੰਘ ਉਫ ਨੀਟਾ ਨਾਮ ਦੇ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਜਦ ਕਿ ਇਸ ਦੌਰਾਨ ਉਸ ਦਾ ਇਕ ਸਾਥੀ ਭੱਜਣ ਵਿਚ ਕਾਮਯਾਬ ਹੋ ਗਿਆ । ਬਲਵਿੰਦਰ ਸਿੰਘ ਉਰਫ਼ ਨੀਟਾ ਦੀ ਰਾਵੀ ਦਰਿਆ ਪਾਰ ਪਿੰਡ ਵਿਚ ਪੈਲੀ ਹੈ ਅਤੇ ਉਹ ਹੁਣ ਪਿੰਡ ਨਵੀਂ ਆਬਾਦੀ  ਚੰਡੀਗੜ੍ਹ ਵਿਚ ਰਹਿੰਦਾ ਸੀ। ਬਹਿਰਾਮਪੁਰ ਪੁਲਿਸ ਵਲੋਂ ਕਾਬੂ ਕੀਤੇ ਉਕਤ ਵਿਅਕਤੀ ਖਿਲਾਫ਼ ਐਨ.ਡੀ.ਪੀ.ਐਸ. ਐਕਟ ਅਧੀਨ ਮਾਮਲਾ ਦਰਜ ਕਰਕੇ ਹਿਰਾਸਤ ਵਿਚ ਲੈ ਕੇ ਇਸ ਦੇ ਅਗਲੇ ਪਿਛਲੇ ਲਿੰਕ ਖੰਗਾਲੇ ਜਾ ਰਹੇ ਹਨ। ਐਸ.ਐਸ.ਪੀ. ਅਦਿੱਤਿਆ ਨੇ ਦਾਅਵਾ ਕੀਤਾ ਹੈ ਕਿ ਡਰੱਗ ਮਾਫੀਆ ਦੇ ਵੱਡੇ ਨੈਟਵਰਕ ਨੂੰ ਤੋੜਿਆ ਗਿਆ ਹੈ ਤੇ ਇਕ ਹਫ਼ਤੇ ਵਿਚ ਪਿਛਲੇ 15 ਦਿਨਾਂ ਦੇ ਵਿਚ ਹੈਰੋਇਨ ਦੀਆ ਵੱਡੀਆਂ ਖੇਪਾਂ ਬਰਾਮਦ ਕੀਤੀਆਂ ਗਈਆਂ ਹਨ।