ਜਲੰਧਰ

ਲੋਹੀਆਂ ਫਲਾਈਓਵਰ ਅਤੇ ਜਾਮਨਗਰ ਸੜਕ ਠੇਕੇਦਾਰ ਨੇ ਜੇਕਰ 'ਲੋਕਾਂ ਦੀਆਂ ਅੱਖਾਂ 'ਚ ਘੱਟਾ ਪਾਉਣਾ' ਬੰਦ ਨਾ ਕੀਤਾ ਤਾਂ, ਜਲਦ ਲਗਾਵਾਂਗੇ ਧਰਨਾ-ਪੀੜਤ ਦੁਕਾਨਦਾਰ

ਲੋਹੀਆਂ ਦੇ ਬਣ ਰਹੇ ਫਲਾਈਓਵਰ ਦੀਆਂ ਸਰਵਿਸ ਸੜਕਾਂ ਅਤੇ ਅੰਮਿ੍ਤਸਰ ਜਾਮਨਗਰ ਸੜਕ ਦੇ ਟਰਾਲਿਆਂ ਦੀ ਮਿੱਟੀ ਤੋਂ ਪ੍ਰੇਸ਼ਾਨ ਦੋਵੇਂ ਪਾਸੇ ਦੇ ਦੁਕਾਨਦਾਰ ਥਾਣਾ ਲੋਹੀਆਂ ਵਿਖੇ ਮੰਗ ਪੱਤਰ ਦੇਣ ਮੌਕੇ | (ਸੱਜੇ) ਲੋਹੀਆਂ ਨੇੜਿਓ ਲੰਘ ਰਹੇ ਅੰਮਿ੍ਤਸਰ ਜਾਮਨਗਰ ਸੜਕ ਲਈ ਮਿੱਟੀ ਲੈ ਕੇ ਆਉਂਦੇ ਦੋ ਟਰਾਲਿਆਂ ਤੋਂ ਉਠਦੀ ਧੂੜ ਦੇ ਦਿ੍ਸ਼ | ਤਸਵੀਰਾਂ : ਗੁਰਪਾਲ ਸਿੰਘ ਸ਼ਤਾਬਗੜ੍ਹ <br/> 08-05-2026

ਲੋਹੀਆਂ ਖਾਸ, 7 ਮਈ (ਗੁਰਪਾਲ ਸਿੰਘ ਸ਼ਤਾਬਗੜ੍ਹ, ਕੁਲਦੀਪ ਸਿੰਘ ਖਾਲਸਾ) ਨੈਸ਼ਨਲ ਹਾਈਵੇ 703ਏ 'ਤੇ ਪੈਂਦੇ ਲੋਹੀਆਂ ਦੇ ਫਾਟਕ 'ਐੱਸ.-53' ਜਿਸ ਨੂੰ 'ਸੁਲਤਾਨਪੁਰ ਵਾਲਾ ਫਾਟਕ' ਵੀ ਕਿਹਾ ਜਾਂਦਾ ਹੈ, 'ਤੇ ਬਣ ਰਹੇ ਫਲਾਈਓਵਰ ਅਤੇ ਅੰਮਿ੍ਤਸਰ ਜਾਮਨਗਰ ਸੜਕ ਦੇ ਟਰਾਲਿਆਂ ਕਾਰਨ ਫਾਟਕ ਦੇ ਦੋਵੇਂ ਪਾਸੇ ਦੇ ਦੁਕਾਨਦਾਰ ਅਤੇ ਆਮ ਲੋਕਾਂ ਦੇ ਸਬਰ ਦਾ ਬੰਨ ਅੱਜ ਉਸ ਵੇਲੇ ਟੁੱਟਦਾ ਨਜ਼ਰ ਆਇਆ ਜਦੋਂ ਉਨ੍ਹਾਂ ਨੇ ਦੋਹਾਂ ਕੰਪਨੀਆਂ ਦੇ ਠੇਕੇਦਾਰਾਂ ਨੂੰ ਚੇਤਾਵਨੀ ਦਿੰਦਿਆਂ ਅਤੇ ਥਾਣਾ ਲੋਹੀਆਂ ਵਿਖੇ ਸ਼ਿਕਾਇਤ ਦਿੰਦਿਆਂ ਕੰਪਨੀਆਂ ਦਾ ਕੰਮ ਨਾ ਚੱਲਣ ਦੇਣ ਅਤੇ ਜਲਦੀ ਹੀ ਸੜਕ 'ਤੇ ਧਰਨਾ ਲਗਾ ਦੇਣ ਦਾ ਐਲਾਨ ਕਰ ਦਿੱਤਾ | ਇਸ ਸਬੰਧੀ ਥਾਣਾ ਲੋਹੀਆਂ ਵਿਖੇ 'ਜੱਕੋਪੁਰ ਖੁਰਦ ਮੋੜ ਤੋਂ ਲੈ ਕੇ ਜੋਸਨ ਹਸਪਤਾਲ ਤੱਕ' ਦੇ ਦੋਵਾਂ ਸਾਈਡਾਂ ਦੇ ਪੁੱਜੇ ਦੁਕਾਨਦਾਰਾਂ ਬਲਜੀਤ ਸਿੰਘ ਬੱਲੀ, ਜਗਜੀਵਨ ਸਿੰਘ ਸੇਠੀ, ਇੰਦਰਜੀਤ ਸਿੰਘ ਜੀਤਾ, ਰਣਜੀਤ ਸਿੰਘ, ਗੁਰਸ਼ਰਨ ਸਿੰਘ ਖਿੰਡਾ, ਕਸ਼ਮੀਰ ਸਿੰਘ, ਸੰਤੋਖ ਸਿੰਘ, ਗੁਰਮੇਲ ਸਿੰਘ, ਹਰਵਿੰਦਰ ਸਿੰਘ ਨੰਢਾ, ਲਖਵਿੰਦਰ ਸਿੰਘ ਨੰਢਾ, ਗਿਆਨੀ ਪਰਮਜੀਤ ਸਿੰਘ, ਬਹਾਦਰ ਸਿੰਘ ਮਠਾੜੂ, ਰਵੀ, ਰਸ਼ਪਿੰਦਰ ਸਿੰਘ, ਬਲਦੇਵ ਸਿੰਘ ਸਾ. ਮੀਤ ਪ੍ਰਧਾਨ, ਜਰਨੈਲ ਸਿੰਘ ਥਿੰਦ, ਬਲਕਾਰ ਸਿੰਘ, ਸੁਖਦੇਵ ਸਿੰਘ, ਅਸ਼ੋਕ ਕੁਮਾਰ, ਅਨਸਾਰੀ, ਬਲਵੀਰ ਸਿੰਘ, ਗੁਰਮੁੱਖ ਸਿੰਘ, ਭਗਵੰਤ ਸਿੰਘ, ਮੇਜਰ ਸਿੰਘ, ਬਲਜਿੰਦਰ ਸਿੰਘ, ਪਰਦੀਪ ਸਿੰਘ, ਰੌਸ਼ਨ ਲਾਲ, ਕੁਲਦੀਪ ਸਿੰਘ, ਬਾਜ਼ ਸਿੰਘ, ਗੁਰਵਿੰਦਰ ਸਿੰਘ, ਜਸਪਾਲ ਸਿੰਘ ਅਤੇ ਹੋਰਾਂ ਨੇ ਕਿਹਾ ਕਿ ਉਕਤ ਬਣ ਰਹੇ ਫਲਾਈਓਵਰ ਦੇ ਠੇਕੇਦਾਰ ਵੱਲੋਂ ਸਰਵਿਸ ਰੋਡ ਨਹੀਂ ਬਣਾਈਆਂ, ਜਿਨ੍ਹਾਂ ਵਿੱਚ 2, 2 ਫੁੱਟ ਡੂੰਗੇ ਟੋਏ ਹਨ ਅਤੇ ਮੋਟਰਸਾਈਕਲ, ਕਾਰਾਂ ਆਦਿ ਦਾ ਲੰਘਣਾ ਤਾਂ ਬੇਹੱਦ ਮੁਸ਼ਕਿਲ ਹੈ | ਇਸੇ ਤਰ੍ਹਾਂ ਨਵੀਂ ਬਣ ਰਹੀ ਸੜਕ 'ਅੰਮਿ੍ਤਸਰ ਜਾਮਨਗਰ' ਦੇ ਠੇਕੇਦਾਰ ਵੱਲੋਂ ਸੜਕ ਲਈ ਲਿਆਂਦੀ ਜਾ ਰਹੀ ਮਿੱਟੀ ਦੇ ਟਰਾਲਿਆਂ ਕਾਰਨ ਸਾਰੀ ਸੜਕ 'ਤੇ ਮਿੱਟੀ ਖਿਲਾਰ ਦਿੱਤੀ ਗਈ ਹੈ, ਜੋ ਜਿਥੇ ਲੋਕਾਂ ਦੀਆਂ ਅੱਖਾਂ 'ਚ ਘੱਟਾ ਪਾ ਰਹੀ ਹੈ, ਉਥੇ ਸਾਰੀਆਂ ਦੁਕਾਨਾਂ ਵੀ ਮਿੱਟੀ ਘੱਟੇ ਨਾਲ ਭਰੀਆਂ ਰਹਿੰਦੀਆਂ ਹਨ | ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਟੋਇਆਂ ਕਾਰਨ ਮੋਟਸਾਈਕਲ ਤੋਂ ਭੁੜਕ ਕੇ ਇੱਕ ਬੱਚੇ ਦੀ ਮੌਤ ਹੋ ਚੁੱਕੀ ਹੈ ਅਤੇ ਇਸ ਮਿੱਟੀ ਤੋਂ ਫਿਸਲੇ ਇੱਕ ਸਾਈਕਲ ਸਵਾਰ ਦੀ ਜੇ.ਸੀ.ਬੀ. ਮਸ਼ੀਨ ਹੇਠ ਆ ਕੇ ਮੌਤ ਵੀ ਹੋ ਚੁੱਕੀ | ਉਨ੍ਹਾਂ ਠੇਕੇਦਾਰਾਂ ਅਤੇ ਪ੍ਰਸ਼ਾਸ਼ਨ ਨੂੰ ਸਵਾਲ ਕੀਤਾ ਕਿ ਲੋਕਾਂ ਦੀ ਜਾਨ ਦਾ ਖੌਅ ਬਣ ਚੁੱਕੇ ਇਹ ਦੋਵੇਂ ਪ੍ਰਾਜੈਕਟ ਹੋਰ ਕਿੰਨੀਆਂ ਜਾਨਾਂ ਲੈਣਗੇ | ਉਨ੍ਹਾਂ ਮੰਗ ਕੀਤੀ ਅਤੇ ਚੇਤਾਵਨੀ ਦਿੱਤੀ ਕਿ ਜੇਕਰ ਕੱਲ੍ਹ ਇੱਕ ਦੋ ਦਿਨਾਂ ਤੱਕ ਇਨ੍ਹਾਂ ਸੜਕਾਂ ਅਤੇ ਮਿੱਟੀ ਦਾ ਹੱਲ ਨਾ ਕੀਤਾ ਤਾਂ ਉਹ ਕੰਪਨੀਆਂ ਦਾ ਕੰਮ ਨਹੀਂ ਚੱਲਣ ਦੇਣਗੇ ਅਤੇ ਸੜਕ 'ਤੇ ਧਰਨਾ ਲਗਾ ਦੇਣਗੇ |

ਪਿਛਲੀ ਖ਼ਬਰ ਪੰਜਾਬ ਦੀਆਂ 6 ਪ੍ਰਮੁੱਖ ਸੰਘਰਸ਼ਸ਼ੀਲ ਅਧਿਆਪਕ ਜਥੇਬੰਦੀਆਂ ਨੇ ਮੁੱਖ ਮੰਤਰੀ ਦੇ ਨਾਂਅ ਸੌਂਪਿਆ ਮੰਗ-ਪੱਤਰ ਅਗਲੀ ਖ਼ਬਰ ਵਿਧਾਇਕ ਸ਼ੇਰੋਵਾਲੀਆ ਤੇ ਪ੍ਰਧਾਨ ਥਿੰਦ ਨੇ ਸ਼ਾਹਕੋਟ ਦੀ ਗਰੀਨ ਸਿਟੀ ਕਾਲੌਨੀ 'ਚ ਸ਼ੁਰੂ ਕਰਵਾਇਆ ਵਿਕਾਸ ਕਾਰਜ