ਜਿੰਨੇ ਮਰਜ਼ੀ ਝੂਠੇ ਕੇਸ ਪਾ ਲਓ,ਮੇਰੀ ਆਵਾਜ਼ ਨਹੀਂ ਬੰਦ ਕਰ ਸਕੋਗੇ-ਜੀ. ਕੇ.

ਨਵੀਂ ਦਿੱਲੀ, 29 ਅਕਤੂਬਰ (ਜਗਤਾਰ ਸਿੰਘ)-ਦਿੱਲੀ ਗੁਰਦੁਆਰਾ ਕਮੇਟੀ ਦੇ ਮੌਜੂਦਾ ਪ੍ਰਬੰਧਕਾਂ ਦੀ ਪ੍ਰੈੱਸ ਕਾਨਫ਼ਰੰਸ ਤੋਂ ਬਾਅਦ ਕਮੇਟੀ ਦੇ ਸਾਬਕਾ ਪ੍ਰਧਾਨ ਮਨਜੀਤ ਸਿੰਘ ਜੀ. ਕੇ. ਨੇ ਦਾਅਵਾ ਕੀਤਾ ਕਿ ਕਾਲਕਾ-ਕਾਹਲੋਂ ਦੀ ਟੀਮ ਕਥਿਤ ਦੋਸ਼ਾਂ ਦੇ ਆਸਰੇ ਮੇਰੀ ਆਵਾਜ਼ ਬੰਦ ਕਰਾਉਣਾ ਚਾਹੁੰਦੇ ਹਨ ਪਰ ਉਨ੍ਹਾਂ ਦੇ ਮਨਸੂਬੇ ਕਦੀ ਕਾਮਯਾਬ ਨਹੀਂ ਹੋਣਗੇ। ਜੀ. ਕੇ. ਨੇ ਕਿਹਾ ਕਿ ਕਾਲਕਾ-ਕਾਹਲੋਂ ਟੀਮ ਨੇ ਪਿਛਲੇ 7 ਸਾਲਾਂ ਵਿਚ ਉਨ੍ਹਾਂ (ਜੀ. ਕੇ.) ’ਤੇ ਸੈਂਕੜੇ ਇਲਜ਼ਾਮ ਲਾਏ ਸਨ ਪਰ ਆਪਣੀ ਸਰਕਾਰ ਤੇ ਪੁਲਿਸ ਹੁੰਦੇ ਹੋਏ ਵੀ ਉਹ ਮੈਨੂੰ ਗ੍ਰਿਫ਼ਤਾਰ ਨਹੀਂ ਕਰਵਾ ਸਕੇ। ਉਨ੍ਹਾਂ ਕਿਹਾ ਕਿ ਹੁਣ ਮਾਮਲਾ ਕੋਰਟ ਤੱਕ ਪਹੁੰਚ ਗਿਆ ਹੈ ਤੇ ਉੱਥੋਂ ਵੀ ਉਹ ਬਰੀ ਹੋ ਕੇ ਸਾਹਮਣੇ ਆਉਣਗੇ। ਜੀ. ਕੇ. ਨੇ ਕਿਹਾ ਕਿ ਮੇਰਾ ਡੀ. ਐਨ. ਏ. ਜਥੇਦਾਰ ਸੰਤੋਖ ਸਿੰਘ ਦਾ ਹੈ, ਇਸ ਲਈ ਧਰਮ, ਪੰਥਕ, ਸਿੱਖਿਆ ਤੋਂ ਲੈ ਕੇ ਮਰਿਆਦਾ ਤੱਕ ਸਵਾਲ ਕਰਦੇ ਰਹਾਂਗਾ, ਕੌਮ ਲਈ ਬੋਲਣ ਲਈ ਕੋਈ ਮੈਨੂੰ ਨਹੀਂ ਰੋਕ ਸਕੇਗਾ। ਜੀ. ਕੇ. ਨੇ ਕਾਲਕਾ ਨੇ ਇਹ ਵੀ ਚੁਨੌਤੀ ਦਿੱਤੀ ਕਿ ਉਹ ਆਪਣੇ ਸਿਆਸੀ ਆਕਾ ਦੇ ਕਰੋੜਾਂ ਰੁਪਏ ਦੇ ਚੌਲ ਘੁਟਾਲੇ ਦੇ ਮਾਮਲੇ ’ਤੇ ਕਦੋਂ ਬੋਲਣਗੇ।