ਨਵੀਂ ਦਿੱਲੀ, 24 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਵਿਚ ਪੈ ਰਹੀ ਗਰਮੀ ਤੇ ਤਪਸ਼ ਦੇ ਕਾਰਨ ਜਿਥੇ ਇਨਸਾਨ ਝੁਲਸ ਰਹੇ ਹਨ, ਉਸ ਦੇ ਨਾਲ ਹੀ ਅਵਾਰਾ ਪਸ਼ੂ ਵੀ ਬਹੁਤ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਇਹ ਪਸ਼ੂ ਗਰਮੀ ਤੇ ਧੁੱਪ ਤੋਂ ਬਚਣ ਲਈ ਸੜਕਾਂ, ਦਰੱਖ਼ਤਾਂ ਥੱਲੇ ਅਤੇ ਹੋਰ ਥਾਵਾਂ 'ਤੇ ਖੜ੍ਹ ਜਾਂਦੇ ਹਨ ਤਾਂ ਕਿ ਧੁੱਪ ਤੇ ਗਰਮੀ ਤੋਂ ਬਚਿਆ ਜਾ ਸਕੇ | ਇਹ ਪਸ਼ੂ ਏਧਰੋਂ-ਉਧਰੋਂ ਕੁਝ ਨਾ ਕੁਝ ਖਾ ਕੇ ਗੁਜ਼ਾਰਾ ਕਰ ਰਹੇ ਹਨ | ਹਾਲਾਂਕਿ ਕੁਝ ਸਮਾਜ ਸੇਵੀ ਅਵਾਰਾ ਘੁੰਮ ਰਹੀਆਂ ਗਊਆਂ ਨੂੰ ਕਦੇ-ਕਦੇ ਚਾਰਾ ਪਾ ਕੇ ਜਾਂਦੇ ਹਨ ਅਤੇ ਕੁਝ ਲੋਕ ਸਬਜ਼ੀਆਂ ਦੇ ਪੱਤੇ, ਸੁੱਕੀਆਂ ਰੋਟੀਆਂ ਵੀ ਸੜਕਾਂ ਦੇ ਕਿਨਾਰਿਆਂ ਜਾਂ ਹੋਰ ਥਾਂ ਰੱਖ ਜਾਂਦੇ ਹਨ | ਇਨ੍ਹਾਂ ਨੂੰ ਖਾ ਕੇ ਅਵਾਰਾ ਪਸ਼ੂ ਆਪਣਾ ਪੇਟ ਪਾਲਦੇ ਹਨ | ਕੁਝ ਸਮਾਜ ਸੇਵੀਆਂ ਦੀ ਮੰਗ ਰਹੀ ਹੈ ਕਿ ਇਨ੍ਹਾਂ ਅਵਾਰਾ ਗਊਆਂ ਲਈ ਕੋਈ ਸ਼ੈੱਡ ਤੇ ਪਾਣੀ ਦੀ ਵਿਵਸਥਾ ਹੋਣੀ ਚਾਹੀਦੀ ਹੈ ਤਾਂ ਕਿ ਉਥੇ ਇਹ ਬੈਠ ਸਕਣ ਤੇ ਪਾਣੀ ਪੀ ਸਕਣ | ਇਹ ਅਵਾਰਾ ਗਊਆਂ ਗਲੀਆਂ ਵਿਚ ਵੀ ਘੁੰਮਦੀਆਂ ਹਨ ਅਤੇ ਲੋਕ ਇਨ੍ਹਾਂ ਨੂੰ ਉਥੋਂ ਭਜਾ ਦਿੰਦੇ ਹਨ |
