ਨਵੀਂ ਦਿੱਲੀ, 14 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦੱਖਣੀ ਜ਼ਿਲ੍ਹਾ ਥਾਣੇ ਦੀ ਪੁਲਿਸ ਨੇ ਗੱਡੀਆਂ ਦੀ ਚੋਰੀ ਕਰਨ ਵਾਲੇ ਇਕ ਚੋਰ ਨੂੰ ਕਾਬੂ ਕੀਤਾ ਹੈ ਜੋ ਕਿ ਅਕਸਰ ਚੋਰੀ ਕੀਤੇ ਹੋਏ ਮੋਟਰਸਾਈਕਲ 'ਤੇ ਹੋਰ ਚੋਰੀਆਂ ਕਰਨ ਲਈ ਇਧਰ-ਉਧਰ ਘੁੰਮਦਾ ਰਹਿੰਦਾ ਸੀ | ਇਸ ਚੋਰ ਦਾ ਨਾਂਅ ਸਾਗਰ (25) ਹੈ ਜੋ ਕਿ ਦਿੱਲੀ ਦੇ ਮਦਨਗਿਰੀ ਇਲਾਕੇ ਦਾ ਰਹਿਣ ਵਾਲਾ ਹੈ | ਪੁਲਿਸ ਨੇ ਇਸ ਚੋਰ ਨੂੰ ਸੀ.ਸੀ.ਟੀ.ਵੀ. ਦਾ ਵਿਸ਼ਲੇਸ਼ਣ, ਸਥਾਨਕ ਖ਼ੁਫੀਆ ਦੀ ਜਾਣਕਾਰੀ ਮਿਲਣ ਅਤੇ ਤਕਨੀਕ ਨਿਗਰਾਨੀ ਦੇ ਆਧਾਰ 'ਤੇ ਸੰਕੇਤ ਇਲਾਕੇ ਵਿਚੋਂ ਗਿ੍ਫ਼ਤਾਰ ਕੀਤਾ | ਇਸ ਕੋਲੋਂ ਪੁਲਿਸ ਨੇ ਇਕ ਚੋਰੀ ਕੀਤਾ ਮੋਟਰਸਾਈਕਲ, ਇਕ ਸਕੂਟਰੀ ਤੇ ਹੋਰ ਗੱਡੀਆਂ ਬਰਾਮਦ ਕੀਤੀਆਂ ਹਨ | ਇਸ ਦੀ ਗਿ੍ਫ਼ਤਾਰੀ ਨਾਲ ਪੁਲਿਸ ਦੇ ਗੱਡੀਆਂ ਦੀ ਚੋਰੀ ਦੇ ਤਿੰਨ ਮਾਮਲੇ ਸੁਲਝੇ ਹਨ | ਇਸ ਚੋਰ ਖ਼ਿਲਾਫ਼ ਚੋਰੀ, ਖੋਹ ਅਤੇ ਅਸਲ੍ਹਾ ਐਕਟ ਦੇ ਅਪਰਾਧ ਵੀ ਸ਼ਾਮਿਲ ਹਨ | ਇਨ੍ਹਾਂ ਦੇ ਮਾਮਲੇ ਥਾਣਾ ਸ਼ਾਸਤਰੀ ਪਾਰਕ, ਤਿਮਾਰਪੁਰ, ਨਿਊ ਅਸ਼ੋਕ ਨਗਰ ਅਤੇ ਕੀਰਤੀ ਨਗਰ ਵਿਚ ਪਹਿਲਾਂ ਹੀ ਦਰਜ ਹਨ | ਪੁਲਿਸ ਇਸ ਤੋਂ ਹੋਰ ਪੁੱਛ-ਪੜਤਾਲ ਕਰ ਰਹੀ ਹੈ |
