31 ਦਿਨਾਂ ਵਿਚ ਧੋਖਾਧੜੀ ਨਾਲ 30 ਲੱਖ ਡਾਲਰ ਕਮਾਉਣ ਦਾ ਦੋਸ਼

ਅ

ਅਜੀਤ ਡੈਸਕ 01-11-2026

ਨਿਊਯਾਰਕ, 31 ਅਕਤੂਬਰ (ਰਾਜੂ ਸ਼ਹਿਬਾਜ਼ਪੁਰਾ)-ਨਾਸਾਊ ਕਾਊਂਟੀ ਵਿਚ ਫ਼ਰਜੀ ਦਵਾਈ ਦੁਕਾਨਾਂ ਰਾਹੀਂ ਲੱਖਾਂ ਡਾਲਰ ਦੀ ਧੋਖਾਧੜੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਅਧਿਕਾਰੀਆਂ ਦੇ ਹਵਾਲੇ ਨਾਲ ਆਈ ਰਿਪੋਰਟ ਮੁਤਾਬਕ ਬਖੋਦਿਰ ਮੀਰੋਦੀਮੋਵ ਉਤੇ ਸਿਰਫ਼ 31 ਦਿਨਾਂ ਵਿਚ 30 ਲੱਖ ਡਾਲਰ ਹਾਸਲ ਕਰਨ ਦਾ ਦੋਸ਼ ਹੈ। ਮਾਮਲੇ ਨਾਲ ਜੁੜਿਆ ਦੂਜਾ ਨਾਂਅ ਅਬਦਿਲਾਕਿਮ ਬਰਦੀਕੁਲੋਵ ਦਾ ਹੈ। ਦੋਵੇਂ ਦੇਸ਼ ਤੋਂ ਬਾਹਰ ਦੱਸੇ ਗਏ ਹਨ।ਪੁਲਿਸ ਦੇ ਲਿਖਤੀ ਬਿਆਨ ਅਨੁਸਾਰ ਫ੍ਰੀਪੋਰਟ ਦੀ ‘ਆਰਐੱਨਜੇ ਫਾਰਮੇਸੀ’ ਅਤੇ ਫਲੋਰਲ ਪਾਰਕ ਦੀ ‘ਜੈਰਿਕੋ ਐਕਸਪ੍ਰੈੱਸ ਆਰਐਕਸ’ ਨੇ ਕਰੀਬ 80 ਲੱਖ ਡਾਲਰ ਦੇ ਬਿੱਲ ਪੇਸ਼ ਕੀਤੇ, ਜਿਨ੍ਹਾਂ ਵਿਚੋਂ ਲਗਭਗ 50 ਲੱਖ ਡਾਲਰ ਦੀ ਅਦਾਇਗੀ ਹੋਈ। ਦੋਸ਼ ਹੈ ਕਿ ਡਾਕਟਰਾਂ ਅਤੇ ਮਰੀਜ਼ਾਂ ਦੀ ਪਛਾਣ ਚੋਰੀ ਕਰਕੇ ਜਾਅਲੀ ਦਵਾਈ ਪਰਚੀਆਂ ਬਣਾਈਆਂ ਗਈਆਂ। ਫਿਰ ਮੈਡੀਕੇਡ, ਮੈਡੀਕੇਅਰ ਅਤੇ ਨਿੱਜੀ ਬੀਮਾ ਕੰਪਨੀਆਂ ਤੋਂ ਪੈਸੇ ਵਸੂਲੇ ਗਏ ਪਰ ਮਰੀਜ਼ਾਂ ਨੂੰ ਦਵਾਈਆਂ ਨਹੀਂ ਦਿੱਤੀਆਂ ਗਈਆਂ।ਕਵੀਨਜ਼ ਦੇ ਇਕ ਵੱਖਰੇ ਮਾਮਲੇ ਵਿਚ ਦਵਾਈ ਦੁਕਾਨਾਂ ਦੇ ਮਾਲਕ 62 ਸਾਲਾ ਮਿਗੇਲ ਬੈਰਨ ਉਤੇ ਤਿੰਨ ਕਰੋੜ 10 ਲੱਖ ਡਾਲਰ ਤੋਂ ਵੱਧ ਦੀ ਧੋਖਾਧੜੀ ਦਾ ਦੋਸ਼ ਹੈ। ਅਟਾਰਨੀ ਜਨਰਲ ਦਫ਼ਤਰ ਮੁਤਾਬਕ ਉਹ ਮਰੀਜ਼ਾਂ ਨੂੰ ਨਕਦ ਲਾਲਚ ਦੇ ਕੇ ਆਪਣੀਆਂ ਦੁਕਾਨਾਂ ਤੋਂ ਦਵਾਈਆਂ ਲੈਣ ਲਈ ਕਹਿੰਦਾ ਸੀ। ਫਿਰ ਕੁਝ ਦਵਾਈਆਂ ਸਸਤੇ ਭਾਅ ਵਾਪਸ ਖ਼ਰੀਦ ਕੇ ਹੋਰ ਮਰੀਜ਼ਾਂ ਨੂੰ ਦਿੰਦਾ ਅਤੇ ਉਨ੍ਹਾਂ ਲਈ ਮੁੜ ਸਰਕਾਰੀ ਅਦਾਇਗੀ ਲੈਂਦਾ ਸੀ।ਬੈਰਨ ਉਤੇ ਇਸ ਰਕਮ ਨਾਲ ਮਹਿੰਗੀਆਂ ਜਾਇਦਾਦਾਂ ਅਤੇ ਗੱਡੀਆਂ ਖ਼ਰੀਦਣ ਦੇ ਦੋਸ਼ ਵੀ ਹਨ। ਉਸ ਨੂੰ ਲਾਗਾਰਡੀਆ ਹਵਾਈ ਅੱਡੇ ਉਤੇ ਟੋਰਾਂਟੋ ਜਾਣ ਦੀ ਕੋਸ਼ਿਸ਼ ਦੌਰਾਨ ਗ੍ਰਿਫ਼ਤਾਰ ਕੀਤਾ ਗਿਆ। ਮੁੱਖ ਦੋਸ਼ ਸਾਬਤ ਹੋਣ ਉਤੇ ਉਸ ਨੂੰ ਵੱਧ ਤੋਂ ਵੱਧ 25 ਸਾਲ ਕੈਦ ਹੋ ਸਕਦੀ ਹੈ।ਨਾਸਾਊ ਵਿਚ ਫ਼ਿਲਹਾਲ ਦੋਸ਼ ਸਬੰਧਤ ਕੰਪਨੀਆਂ ਖ਼ਿਲਾਫ਼ ਦਰਜ ਹਨ। ਦੋਵਾਂ ਮਾਮਲਿਆਂ ਦੇ ਦੋਸ਼ ਅਜੇ ਅਦਾਲਤ ਵਿਚ ਸਾਬਤ ਨਹੀਂ ਹੋਏ ਹਨ।

ਪਿਛਲੀ ਖ਼ਬਰ ਜ਼ਿਲ੍ਹੇ ਵਿਚ ਤਿਉਹਾਰਾਂ ਤੋਂ ਪਹਿਲਾਂ ਭੋਜਨ ਸੁਰੱਖਿਆ ਸੰਬੰਧੀ ਵਿਸ਼ੇਸ਼ ਮੁਹਿੰਮ ਜਾਰੀ - ਜ਼ਿਲ੍ਹਾ ਸਿਹਤ ਅਫ਼ਸਰ ਅਗਲੀ ਖ਼ਬਰ ਆਸਟ੍ਰੇਲੀਆ ਭਰ ਵਿਚ ਮਨਾਇਆ ਗਿਆ ਹੈਲੋਵੀਨ ਦਾ ਤਿਉਹਾਰ