40 ਟ੍ਰਿਲੀਅਨ ਡਾਲਰ ਦਾ ਕਰਜ਼ਾ ਚਿੰਤਾਜਨਕ, ਇਰਾਨ ਜੰਗ ਤੇ ਕੈਨੇਡਾ ਟੈਰਿਫ਼ ਵਿਵਾਦ ਮਹਿੰਗਾਈ ਹੋਰ ਵਧਾ ਸਕਦੇ ਹਨ-ਨੀਲ ਕਸ਼ਕਾਰੀ
ਨਿਊਯਾਰਕ, 24 ਅਗਸਤ (ਰਾਜੂ ਸਾਹਿਬਾਜ਼ਪੁਰਾ)-ਮਿਨੀਐਪੋਲਿਸ ਫੈਡਰਲ ਰਿਜ਼ਰਵ ਬੈਂਕ ਦੇ ਪ੍ਰਧਾਨ ਨੀਲ ਕਸ਼ਕਾਰੀ ਨੇ ਅਮਰੀਕੀ ਅਰਥਵਿਵਸਥਾ ਬਾਰੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਹੈ ਕਿ ਦੇਸ਼ ਦਾ ਸਰਕਾਰੀ ਕਰਜ਼ਾ 40 ਟ੍ਰਿਲੀਅਨ ਡਾਲਰ ਤੱਕ ਪਹੁੰਚ ਚੁੱਕਾ ਹੈ। ਭਾਵੇਂ ਇਸ ਵੇਲੇ ਵਿੱਤੀ ਬਾਜ਼ਾਰ ਵਿਚ ਕਿਸੇ ਤੁਰੰਤ ਸੰਕਟ ਦੇ ਸੰਕੇਤ ਨਹੀਂ ਹਨ, ਪਰ ਕਰਜ਼ਾ ਲਗਾਤਾਰ ਵਧਣ ਦੀ ਮੌਜੂਦਾ ਰਫ਼ਤਾਰ ਲੰਬੇ ਸਮੇਂ ਲਈ ਠੀਕ ਨਹੀਂ ਹੈ।
ਨਿਊਯਾਰਕ, 24 ਅਗਸਤ (ਰਾਜੂ ਸਾਹਿਬਾਜ਼ਪੁਰਾ)-ਮਿਨੀਐਪੋਲਿਸ ਫੈਡਰਲ ਰਿਜ਼ਰਵ ਬੈਂਕ ਦੇ ਪ੍ਰਧਾਨ ਨੀਲ ਕਸ਼ਕਾਰੀ ਨੇ ਅਮਰੀਕੀ ਅਰਥਵਿਵਸਥਾ ਬਾਰੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਹੈ ਕਿ ਦੇਸ਼ ਦਾ ਸਰਕਾਰੀ ਕਰਜ਼ਾ 40 ਟ੍ਰਿਲੀਅਨ ਡਾਲਰ ਤੱਕ ਪਹੁੰਚ ਚੁੱਕਾ ਹੈ। ਭਾਵੇਂ ਇਸ ਵੇਲੇ ਵਿੱਤੀ ਬਾਜ਼ਾਰ ਵਿਚ ਕਿਸੇ ਤੁਰੰਤ ਸੰਕਟ ਦੇ ਸੰਕੇਤ ਨਹੀਂ ਹਨ, ਪਰ ਕਰਜ਼ਾ ਲਗਾਤਾਰ ਵਧਣ ਦੀ ਮੌਜੂਦਾ ਰਫ਼ਤਾਰ ਲੰਬੇ ਸਮੇਂ ਲਈ ਠੀਕ ਨਹੀਂ ਹੈ। ਕਸ਼ਕਾਰੀ ਮੁਤਾਬਕ ਅਮਰੀਕੀ ਸਰਕਾਰ ਦੇ 10 ਸਾਲਾ ਬਾਂਡ ਦੀ ਵਿਆਜ ਦਰ ਕਰੀਬ 4.7 ਫ਼ੀਸਦੀ ਹੈ। ਇਹ ਹਾਲੀਆ ਸਾਲਾਂ ਦੇ ਮੁਕਾਬਲੇ ਉੱਚੀ ਜ਼ਰੂਰ ਹੈ, ਪਰ ਪਿਛਲੇ ਦਹਾਕਿਆਂ ਦੇ ਪੱਧਰ ਨੂੰ ਦੇਖਦਿਆਂ ਅਸਾਧਾਰਨ ਨਹੀਂ ਮੰਨੀ ਜਾ ਸਕਦੀ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਬਾਂਡ ਬਾਜ਼ਾਰ ਆਮ ਢੰਗ ਨਾਲ ਕੰਮ ਕਰ ਰਿਹਾ ਹੈ ਅਤੇ ਫ਼ਿਲਹਾਲ ਕਿਸੇ ਵੱਡੀ ਵਿੱਤੀ ਗੜਬੜ ਦੇ ਸੰਕੇਤ ਨਹੀਂ ਮਿਲੇ। ਉਨ੍ਹਾਂ ਕਿਹਾ ਕਿ ਬਾਂਡ ਦਰਾਂ ’ਤੇ ਸਿਰਫ਼ ਮਹਿੰਗਾਈ ਹੀ ਨਹੀਂ, ਸਗੋਂ ਸਰਕਾਰੀ ਉਧਾਰੀ, ਆਰਥਿਕ ਵਿਕਾਸ, ਉਤਪਾਦਕਤਾ ਅਤੇ ਆਰਟੀਫ਼ਿਸ਼ਲ ਇੰਟੈਲੀਜੈਂਸ ਵਿਚ ਹੋ ਰਿਹਾ ਨਿਵੇਸ਼ ਵੀ ਅਸਰ ਪਾਉਂਦਾ ਹੈ। ਕਰਜ਼ੇ ਤੇ ਬਜਟ ਘਾਟੇ ਨੂੰ ਕਾਬੂ ਕਰਨ ਲਈ ਵ੍ਹਾਈਟ ਹਾਊਸ, ਖ਼ਜ਼ਾਨਾ ਵਿਭਾਗ ਅਤੇ ਕਾਂਗਰਸ ਨੂੰ ਮਿਲ ਕੇ ਠੋਸ ਯੋਜਨਾ ਬਣਾਉਣੀ ਪਵੇਗੀ। ਫੈਡਰਲ ਰਿਜ਼ਰਵ ਦਾ ਮੁੱਖ ਕੰਮ ਮਹਿੰਗਾਈ ਨੂੰ ਦੋ ਫ਼ੀਸਦੀ ਦੇ ਟੀਚੇ ਤੱਕ ਲਿਆਉਣਾ ਹੈ। ਕਸ਼ਕਾਰੀ ਨੇ ਕਿਹਾ ਕਿ ਅਮਰੀਕਾ ਪਿਛਲੇ ਪੰਜ ਸਾਲਾਂ ਤੋਂ ਮਹਿੰਗਾਈ ਦੇ ਦਬਾਅ ਹੇਠ ਹੈ। ਇਰਾਨ ਨਾਲ ਚੱਲ ਰਹੇ ਟਕਰਾਅ ਕਾਰਨ ਊਰਜਾ ਕੀਮਤਾਂ ਪ੍ਰਭਾਵਿਤ ਹੋ ਰਹੀਆਂ ਹਨ। ਤੇਲ ਅਤੇ ਗੈਸ ਮਹਿੰਗੇ ਹੋਣ ਦਾ ਅਸਰ ਆਵਾਜਾਈ, ਉਤਪਾਦਨ ਅਤੇ ਰੋਜ਼ਾਨਾ ਵਰਤੋਂ ਦੀਆਂ ਵਸਤਾਂ ਤੱਕ ਪਹੁੰਚਦਾ ਹੈ। ਜੇ ਟਕਰਾਅ ਲੰਬਾ ਚੱਲਿਆ ਤਾਂ ਮਹਿੰਗਾਈ ਨੂੰ ਕਾਬੂ ਕਰਨਾ ਹੋਰ ਮੁਸ਼ਕਲ ਹੋ ਸਕਦਾ ਹੈ। ਕੈਨੇਡਾ ਨਾਲ ਵਧਦੇ ਟੈਰਿਫ਼ ਵਿਵਾਦ ਬਾਰੇ ਉਨ੍ਹਾਂ ਕਿਹਾ ਕਿ ਦੋਵਾਂ ਦੇਸ਼ਾਂ ਵੱਲੋਂ ਇੱਕ-ਦੂਜੇ ਦੇ ਸਮਾਨ ’ਤੇ ਲਗਾਤਾਰ ਨਵੇਂ ਟੈਰਿਫ਼ ਲਾਉਣ ਨਾਲ ਵਪਾਰਕ ਅਨਿਸ਼ਚਿਤਤਾ ਵਧੇਗੀ। ਇਸ ਦਾ ਸਿੱਧਾ ਬੋਝ ਕਾਰੋਬਾਰਾਂ ਅਤੇ ਆਮ ਖ਼ਪਤਕਾਰਾਂ ’ਤੇ ਪੈ ਸਕਦਾ ਹੈ। ਉਨ੍ਹਾਂ ਮੁਤਾਬਕ ਵਪਾਰਕ ਹਾਲਾਤ ਸਥਿਰ ਹੋਣ ਤੋਂ ਬਾਅਦ ਹੀ ਕਾਰੋਬਾਰ ਨਵੀਆਂ ਨੀਤੀਆਂ ਅਨੁਸਾਰ ਆਪਣੀਆਂ ਯੋਜਨਾਵਾਂ ਬਣਾ ਸਕਣਗੇ ਅਤੇ ਕੀਮਤਾਂ ’ਤੇ ਪੈ ਰਿਹਾ ਦਬਾਅ ਘਟੇਗਾ। ਵਿਆਜ ਦਰਾਂ ਬਾਰੇ ਕਸ਼ਕਾਰੀ ਨੇ ਕਿਹਾ ਕਿ ਮਹਿੰਗਾਈ ਕਾਬੂ ਵਿੱਚ ਨਾ ਆਉਣ ’ਤੇ ਦਰਾਂ ਵਿੱਚ ਚੌਥਾਈ ਫ਼ੀਸਦੀ ਵਾਧੇ ਦੀ ਲੋੜ ਪੈ ਸਕਦੀ ਹੈ। ਹਾਲਾਂਕਿ ਅਗਲਾ ਫ਼ੈਸਲਾ ਨਵੇਂ ਆਰਥਿਕ ਅੰਕੜਿਆਂ ਦੀ ਸਮੀਖਿਆ ਤੋਂ ਬਾਅਦ ਹੀ ਲਿਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਅਮਰੀਕੀ ਅਰਥਵਿਵਸਥਾ ਸਾਹਮਣੇ ਤੁਰੰਤ ਸੰਕਟ ਨਹੀਂ, ਪਰ ਵਧਦਾ ਕਰਜ਼ਾ, ਇਰਾਨ ਟਕਰਾਅ ਅਤੇ ਕੈਨੇਡਾ ਨਾਲ ਟੈਰਿਫ਼ ਜੰਗ ਅਜਿਹੀਆਂ ਚੁਣੌਤੀਆਂ ਹਨ, ਜਿਨ੍ਹਾਂ ਨੂੰ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ।
