ਫਿਰੋਜ਼ਪੁਰ, 7 ਮਈ (ਰਾਕੇਸ਼ ਚਾਵਲਾ)-ਬੀਤੇ ਦਿਨ ਰੇਲਗੱਡੀ ਨੰਬਰ 12925 ਪੱਛਮ ਸੁਪਰ-ਫਾਸਟ ਐਕਸਪੈੱ੍ਰਸ 'ਚ ਨਵੀਂ ਦਿੱਲੀ ਤੋਂ ਅੰਮਿ੍ਤਸਰ ਤੱਕ ਟਿਕਟ ਚੈਕਿੰਗ ਸਟਾਫ਼ ਪ੍ਰਭਸਿਮਰਨ ਸਿੰਘ ਦੀ ਡਿਊਟੀ ਥਰਡ ਏ.ਸੀ. ਕੋਚਾਂ ਵਿਚ ਸੀ | ਕੋਚਾਂ ਦੀ ਚੈਕਿੰਗ ਦੌਰਾਨ ਚੰਡੀਗੜ੍ਹ ਤੋਂ ਬਾਅਦ ਡਿਊਟੀ 'ਤੇ ਤਾਇਨਾਤ ਜੀ.ਆਰ.ਪੀ. ਸਟਾਫ਼ ਵਲੋਂ ਉਨ੍ਹਾਂ ਨੂੰ ਇਕ ਗੁਆਚੇ ਹੋਏ ਬੈਗ ਦੇ ਸੰਬੰਧ 'ਚ ਸੂਚਨਾ ਦਿੱਤੀ ਗਈ | ਜਿਸ ਨੂੰ ਕੋਈ ਮੁਸਾਫਿਰ ਛੱਡ ਗਿਆ ਸੀ | ਬੈਗ ਵਿਚ ਲਗਭਗ 9,000 ਦੀ ਨਕਦ ਰਾਸ਼ੀ ਅਤੇ ਮਹੱਤਵਪੂਰਨ ਦਸਤਾਵੇਜ਼ ਮੌਜੂਦ ਸਨ | ਸਾਥੀ ਮੁਸਾਫ਼ਿਰਾਂ ਤੋਂ ਪੁੱਛਗਿੱਛ ਕਰਨ 'ਤੇ ਜਾਣਕਾਰੀ ਮਿਲੀ ਕਿ ਬੈਗ ਇਕ ਮਹਿਲਾ ਮੁਸਾਫਿਰ ਦਾ ਸੀ, ਜੋ ਕੋਚ ਛੱਡ ਕੇ ਜਾ ਚੁੱਕੀ ਸੀ | ਬੈਗ ਦੀ ਤਲਾਸ਼ੀ ਲੈਣ 'ਤੇ ਉਸ ਵਿਚੋਂ ਇਕ ਬੈਂਕ ਪਾਸ-ਬੁੱਕ ਪ੍ਰਾਪਤ ਹੋਈ | ਜਿਸ ਉੱਤੇ ਲਿਖੇ ਮੋਬਾਈਲ ਨੰਬਰ ਰਾਹੀਂ ਸੰਬੰਧਿਤ ਮੁਸਾਫਿਰ ਨਾਲ ਸੰਪਰਕ ਕੀਤਾ ਗਿਆ | ਸੰਪਰਕ ਕਰਨ 'ਤੇ ਪਤਾ ਲੱਗਾ ਕਿ ਮਹਿਲਾ ਮੁਸਾਫਿਰ ਇਸ ਸਮੇਂ ਜਨਰਲ ਕੋਚ ਵਿਚ ਸਫ਼ਰ ਕਰ ਰਹੀ ਸੀ | ਇਸ ਤੋਂ ਬਾਅਦ ਪ੍ਰਭਸਿਮਰਨ ਸਿੰਘ ਨੇ ਇਮਾਨਦਾਰੀ ਦੀ ਮਿਸਾਲ ਪੇਸ਼ ਕਰਦੇ ਹੋਏ ਜੀ.ਆਰ.ਪੀ ਸਟਾਫ਼ ਦੀ ਮੌਜੂਦਗੀ ਵਿਚ ਬੈਗ ਉਸ ਦੇ ਅਸਲੀ ਮਾਲਕ ਨੂੰ ਸੁਰੱਖਿਅਤ ਰੂਪ ਵਿਚ ਸੌਂਪ ਦਿੱਤਾ | ਸੀਨੀਅਰ ਡਵੀਜ਼ਨਲ ਕਮਰਸ਼ੀਅਲ ਮੈਨੇਜਰ ਬਸੰਤ ਕੁਮਾਰ ਨੇ ਰੇਲ ਕਰਮਚਾਰੀਆਂ ਦੀ ਸ਼ਲਾਘਾ ਕੀਤਾ |