ਮੱਲਾਂਵਾਲਾ,14 ਅਪ੍ਰੈਲ( ਜੋਸਨ)-ਭਾਰਤੀ ਕਿਸਾਨ ਯੂਨੀਅਨ ਬਹਿਰਾਮ ਕੇ ਦੇ ਸੂਬਾ ਮੀਤ ਪ੍ਰਧਾਨ ਚਮਕੌਰ ਸਿੰਘ ਉਸਮਾਨ ਵਾਲਾ ਅਤੇ ਦਿਲਬਾਗ ਸਿੰਘ ਗਿੱਲ ਜ਼ਿਲ੍ਹਾ ਪ੍ਰਧਾਨ ਫਿਰੋਜ਼ਪੁਰ ਨੇ ਐੱਫ.ਸੀ.ਆਈ ਇੰਸਪੈਕਟਰਾਂ ਦੀ ਹੜਤਾਲ 'ਤੇ ਕੜੀ ਪ੍ਰਤੀਕਿਰਿਆ ਦਿੰਦੇ ਕਿਹਾ ਕਿ ਹਰ ਸਾਲ ਹਾੜੀ ਜਾਂ ਸਾਉਣੀ ਦੀ ਫਸਲ ਮੰਡੀਆਂ ਵਿਚ ਆਉਂਦੇ ਹੀ ਇੰਸਪੈਕਟਰ ਹੜਤਾਲ 'ਤੇ ਚਲੇ ਜਾਂਦੇ ਹਨ ਜਿਸ ਦਾ ਸਿੱਧਾ ਨੁਕਸਾਨ ਕਿਸਾਨਾਂ ਨੂੰ ਝੱਲਣਾ ਪੈਂਦਾ ਹੈ | ਆਗੂਆਂ ਨੇ ਕਿਹਾ ਕਿ ਕਿਸਾਨ ਛੇ ਮਹੀਨੇ ਮਿਹਨਤ ਕਰਕੇ ਫਸਲ ਤਿਆਰ ਕਰਦਾ ਹੈ, ਪਰ ਮੰਡੀਆਂ ਵਿਚ ਖ਼ਰੀਦ ਪ੍ਰਕਿਰਿਆ ਰੁਕਣ ਕਾਰਨ ਉਸ ਦੀ ਫਸਲ ਖੁੱਲੇ੍ਹ ਅਸਮਾਨ ਹੇਠ ਪਈ ਰਹਿੰਦੀ ਹੈ | ਉਨ੍ਹਾਂ ਦੋਸ਼ ਲਗਾਇਆ ਕਿ ਇਹ ਸਾਰਾ ਮਾਮਲਾ ਮਿਲੀਭੁਗਤ ਦਾ ਨਤੀਜਾ ਲੱਗਦਾ ਹੈ, ਜਿੱਥੇ ਅੰਨਦਾਤੇ ਦੀ ਲੁੱਟ ਹੋ ਰਹੀ ਹੈ | ਆਗੂਆਂ ਨੇ ਕਿਸਾਨਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੀ ਕਣਕ ਨੂੰ ਘੱਟ ਭਾਅ 'ਤੇ ਨਾ ਵੇਚਣ ਅਤੇ ਮਿਥੇ ਹੋਏ ਸਰਕਾਰੀ ਭਾਅ 'ਤੇ ਹੀ ਵਿੱਕਰੀ ਕਰਨ ਲਈ ਡਟੇ ਰਹਿਣ |
