ਪਟਿਆਲਾ

ਤੂਫ਼ਾਨ ਤੇ ਅਸਮਾਨੀ ਬਿਜਲੀ ਨਾਲ ਪੋਲਟਰੀ ਫਾਰਮ ਤਬਾਹ, ਲਗਭਗ 25 ਲੱਖ ਦਾ ਨੁਕਸਾਨ

ਪਿੰਡ ਬੱਲੋਪੁਰ 'ਚ ਤੂਫ਼ਾਨ ਤੇ ਅਸਮਾਨੀ ਬਿਜਲੀ ਨਾਲ ਤਬਾਹ ਹੋਇਆ ਪੋਲਟਰੀ ਫਾਰਮ ਦਾ ਮਾਲਕ ਵਿਕਰਮਜੀਤ ਸਿੰਘ ਡਿੱਗਿਆ ਹੋਇਆ ਸਾਡਾ ਦਿਖਾਉਂਦੇ ਹੋਏ | ਤਸਵੀਰ : ਸਰਦਾਰਾ ਸਿੰਘ <br/> 17-05-2026

ਘਨੌਰ, 16 ਮਈ (ਸਰਦਾਰਾ ਸਿੰਘ ਲਾਛੜੂ)-ਬੀਤੀ ਰਾਤ ਆਏ ਤੇਜ ਤੂਫ਼ਾਨ ਤੇ ਅਸਮਾਨੀ ਬਿਜਲੀ ਨੇ ਹਲਕਾ ਘਨੌਰ ਦੇ ਪਿੰਡ ਬੱਲੋਪੁਰ ਦੇ ਨੌਜਵਾਨ ਵਿਕਰਮਜੀਤ ਸਿੰਘ ਦੇ ਸੁਪਨੇ ਤਬਾਹ ਕਰ ਦਿੱਤੇ | ਤੂਫ਼ਾਨ ਦੌਰਾਨ ਉਸ ਦੇ ਪੋਲਟਰੀ ਫਾਰਮ ਦੀ ਛੱਤ ਤਕਰੀਬਨ 60 ਫੁੱਟ ਉੱਪਰ ਉੱਡ ਕੇ ਹਵਾ 'ਚ ਪਲਟੀ ਖਾਂਦੀ ਹੋਈ ਨਾਲ ਦੇ ਖੇਤਾਂ 'ਚ ਜਾ ਡਿੱਗੀ | ਇਸ ਕੁਦਰਤੀ ਆਫ਼ਤ ਨਾਲ ਪੋਲਟਰੀ ਫਾਰਮ ਦੀ ਦੂਜੀ ਮੰਜ਼ਿਲ ਪੂਰੀ ਤਰਾਂ ਢਹਿ-ਢੇਰੀ ਹੋ ਗਈ, ਜਦਕਿ ਪਹਿਲੀ ਮੰਜ਼ਿਲ ਵੀ ਤਕਰੀਬਨ 60 ਫ਼ੀਸਦੀ ਨੁਕਸਾਨੀ ਗਈ ਹੈ | ਇਸ ਘਟਨਾ 'ਚ ਵਿਕਰਮਜੀਤ ਸਿੰਘ ਦਾ ਕਰੀਬ 25 ਲੱਖ ਰੁਪਏ ਦਾ ਭਾਰੀ ਨੁਕਸਾਨ ਹੋ ਗਿਆ | ਵਿਕਰਮਜੀਤ ਸਿੰਘ ਨੇ ਦੱਸਿਆ ਕਿ ਘਟਨਾ ਵੇਲੇ ਉਹ ਫਾਰਮ 'ਚ ਹੀ ਮੌਜੂਦ ਸੀ | ਉਸ ਨੇ ਕਿਹਾ, ''ਹਵਾ ਬਹੁਤ ਜ਼ੋਰਦਾਰ ਸੀ ਤੇ ਇਕ ਜ਼ੋਰਦਾਰ ਧਮਾਕਾ ਹੋਇਆ | ਲੱਗਾ ਜਿਵੇਂ ਪਹਿਲਾਂ ਅਸਮਾਨੀ ਬਿਜਲੀ ਡਿੱਗੀ ਹੋਵੇ ਤੇ ਫਿਰ ਤੇਜ਼ ਤੂਫ਼ਾਨ ਫਾਰਮ 'ਚ ਦਾਖਲ ਹੋ ਗਿਆ | ਸ਼ੈੱਡ ਖੜਕਣ ਲੱਗ ਪਿਆ ਤੇ ਖੇਤਾਂ 'ਚ ਜਾ ਡਿੱਗਾ | ਪੀੜਤ ਨੌਜਵਾਨ ਨੇ ਭਾਵੁਕ ਹੁੰਦਿਆਂ ਦੱਸਿਆ ਕਿ ਉਹ ਵਿਦੇਸ਼ ਜਾਣ ਦੀ ਥਾਂ ਕਰਜ਼ਾ ਲੈ ਕੇ ਪਿਛਲੇ ਕੁਝ ਸਾਲਾਂ ਤੋਂ ਪੋਲਟਰੀ ਫਾਰਮ ਚਲਾ ਕੇ ਆਪਣੇ ਆਰਥਿਕ ਹਾਲਾਤਾਂ ਨਾਲ ਲੜ ਰਿਹਾ ਸੀ | ਕੁਦਰਤੀ ਮਾਰ ਨੇ ਕੁਝ ਸਕਿੰਟਾਂ 'ਚ ਹੀ ਮੇਰੇ ਸੁਪਨੇ ਉਡਾ ਦਿੱਤੇ | ਸੰਘਰਸ਼ ਦੇ ਦਿਨਾਂ 'ਚ ਇੰਨਾ ਵੱਡਾ ਨੁਕਸਾਨ ਝੱਲਣਾ ਬਹੁਤ ਔਖਾ ਹੈ ਪਰ ਜੋ ਪ੍ਰਮਾਤਮਾ ਨੂੰ ਮਨਜ਼ੂਰ ਹੈ, ਉਸ ਅੱਗੇ ਕਿਸੇ ਦਾ ਵੱਸ ਨਹੀਂ, ਉਸ ਨੇ ਕਿਹਾ | ਇਸ ਮੌਕੇ ਪਿੰਡ ਵਾਸੀ ਗੁਰਦੀਪ ਸਿੰਘ, ਜਗਤਾਰ ਸਿੰਘ, ਮਨਦੀਪ ਸਿੰਘ, ਗੁਰਵਿੰਦਰ ਸਿੰਘ ਤੇ ਭੁਪਿੰਦਰ ਸਿੰਘ ਨੇ ਕਿਹਾ ਕਿ ਵਿਕਰਮਜੀਤ ਸਿੰਘ ਮਿਹਨਤੀ ਨੌਜਵਾਨ ਹੈ | ਉਨਾਂ ਸਮਾਜ ਸੇਵੀ ਸੰਸਥਾਵਾਂ ਤੇ ਦਾਨੀ ਸੱਜਣਾਂ ਨੂੰ ਅਪੀਲ ਕੀਤੀ ਕਿ ਪੀੜਤ ਨੌਜਵਾਨ ਦੀ ਮਦਦ ਲਈ ਅੱਗੇ ਆਉਣ ਤਾਂ ਜੋ ਉਹ ਮੁੜ ਆਪਣਾ ਪੋਲਟਰੀ ਫਾਰਮ ਖੜਾ ਕਰ ਸਕੇ |

ਪਿਛਲੀ ਖ਼ਬਰ ਨਾਜਾਇਜ ਸ਼ਰਾਬ ਸਮੇਤ ਇਕ ਵਿਅਕਤੀ ਗਿ੍ਫਤਾਰ ਅਗਲੀ ਖ਼ਬਰ ਪਟਿਆਲਾ ਜ਼ਿਲ੍ਹੇ 'ਚੋਂ ਦੂਜਾ ਸਥਾਨ ਹਾਸਿਲ ਕਰਨ ਵਾਲੀ ਹੋਣਹਾਰ ਵਿਦਿਆਰਥਣ ਰਾਜਦੀਪ ਕੌਰ ਦਾ ਵਿਸ਼ੇਸ਼ ਸਨਮਾਨ