ਚੌਕ ਮਹਿਤਾ, 20 ਜਨਵਰੀ (ਜਗਦੀਸ਼ ਸਿੰਘ ਬਮਰਾਹ)-ਸਮਾਜਿਕ ਚੇਤਨਾ, ਔਰਤ ਦੀ ਸਮਾਜ ਵਿਚ ਮਹੱਤਤਾ ਅਤੇ ਬੇਟੀਆਂ ਪ੍ਰਤੀ ਉਸਾਰੂ ਨਜ਼ਰੀਏ ਦੀ ਲੋੜ ਨੂੰ ਹੁਲਾਰਾ ਦੇਣ ਦੇ ਕਰਤੱਵ ਤਹਿਤ ਪਿੰਡ ਨੰਗਲੀ ਕਲਾਂ, ਨੰਗਲੀ ਖੁਰਦ ਅਤੇ ਨਵੀਂ ਨੰਗਲੀ ਵਿਚ ਨਵ- ਜਨਮੀਆਂ ਧੀਆਂ ਨੂੰ ਸੰਸਾਰ ਵਿਚ ਆਉਣ 'ਤੇ 'ਜੀ ਆਇਆਂ ਨੂੰ ' ਕਹਿਣ ਲਈ ਸਰਕਾਰੀ ਐਲੀਮੈਂਟਰੀ ਸਕੂਲ ਨੰਗਲੀ ਕਲਾਂ ਦੇ ਵਿਹੜੇ ਵਿਚ ਧੀਆਂ ਦੀ ਲੋਹੜੀ ਮਨਾਈ ਗਈ | ਸੰਖੇਪ ਸੁੱਚਜੇ ਅਤੇ ਊਰਜਾ ਭਰਪੂਰ ਮਹੌਲ ਵਿਚ ਪਿਛਲੀ ਲੋਹੜੀ ਤੋਂ ਬਾਅਦ ਹੁਣ ਤੱਕ ਜਨਮੀਆਂ ਧੀਆਂ ਦੀਆਂ ਮਾਤਾਵਾਂ, ਤੇ ਉਨ੍ਹਾਂ ਦੇ ਪਰਿਵਾਰਾਂ ਦਾ ਗਰਮ ਜੋਸ਼ੀ ਨਾਲ ਸਵਾਗਤ ਕੀਤਾ ਗਿਆ ਅਤੇ ਬਣਦਾ ਮਾਣ-ਸਨਮਾਨ ਕੀਤਾ ਗਿਆ | ਪ੍ਰੋਗਰਾਮ ਨੂੰ ਨੇਪਰੇ ਚਾੜਨ ਲਈ ਸਵ: ਗੁਰਪਾਲ ਸਿੰਘ (ਯੂ. ਐੱਸ. ਏ.) ਦੇ ਪਰਿਵਾਰ, ਬਲਕਾਰ ਸਿੰਘ ਧਾਲੀਵਾਲ ਬੇਟ (ਕਪੂਰਥਲਾ), ਸਵ: ਸੂਬੇਦਾਰ ਮੇਜਰ ਬਾਵਾ ਸਿੰਘ ਰੰਧਾਵਾ (ਨੰਗਲੀ ਕਲਾਂ) ਦੇ ਪਰਿਵਾਰ ਵਲੋਂ ਸਹਿਯੋਗ ਕੀਤਾ ਗਿਆ | ਇਸ ਤੋਂ ਇਲਾਵਾ ਸਕੂਲ ਮੁੱਖ ਅਧਿਆਪਕਾ ਗਗਨਦੀਪ ਕੌਰ, ਸਰਪੰਚ ਬਲਵਿੰਦਰ ਸਿੰਘ ਨਵੀਂ ਨੰਗਲੀ, ਸਮੂਹ ਸਟਾਫ ਸਰਕਾਰੀ ਐਲੀਮੈਂਟਰੀ ਅਤੇ ਮਿਡਲ ਸਕੂਲ ਨੰਗਲੀ ਕਲਾਂ, ਆਂਗਣਵਾੜੀ ਵਰਕਰਜ਼ ਪੰਚਾਇਤ ਮੈਂਬਰ, ਸਕੂਲ ਦਾ ਸਹਾਇਕ ਸਟਾਫ, ਐੱਸ. ਐੱਮ. ਸੀ. ਮੈਂਬਰਜ਼ ਅਤੇ ਵਿਦਿਆਰਥੀਆਂ ਦੇ ਮਾਪਿਆਂ ਨੇ ਤਨਦੇਹੀ ਨਾਲ ਹਿੱਸਾ ਪਾਇਆ | ਸਟੇਜ ਸਕੱਤਰ ਦੀ ਭੂਮਿਕਾ ਹੈੱਡ ਮਾਸਟਰ ਰਾਜਵਿੰਦਰ ਸਿੰਘ ਨੰਗਲੀ ਕਲਾਂ ਨੇ ਨਿਭਾਈ |