ਐੱਸ. ਏ. ਐੱਸ. ਨਗਰ, 29 ਅਗਸਤ (ਕਪਿਲ ਵਧਵਾ)-ਸਥਾਨਕ ਫੇਜ਼-5 ਸਥਿਤ ਬਰੂ ਬੈਰਲ ਰੈਸਟੋਰੈਂਟ ਵਿਚ ਮੁਲਾਕਾਤ ਤੋਂ ਬਾਅਦ ਕਾਰੋਬਾਰੀ ਤੋਂ ਭਾਈਵਾਲੀ ਦਾ ਝਾਂਸਾ ਦੇ ਕੇ 1 ਕਰੋੜ ਰੁ. ਲੈਣ ਦੇ ਦੋਸ਼ ਹੇਠ ਸਥਾਨਕ ਥਾਣਾ ਫੇਜ਼-1 ਦੀ ਪੁਲਿਸ ਨੇ ਰੈਸਟੋਰੈਂਟ ਦੇ ਮਾਲਕ ਗੁਰਮੀਤ ਸਿੰਘ ਤੇ ਉਸ ਦੀ ਪਤਨੀ ਕਮਲਜੀਤ ਕੌਰ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਚੰਡੀਗੜ੍ਹ ਦੇ ਸੈਕਟਰ-51 ਡੀ ਦੇ ਰਹਿਣ ਵਾਲੇ ਅਮਨ ਰਾਣਾ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਦੱਸਿਆ ਹੈ ਕਿ ਮਾਰਚ 2024 ਵਿਚ ਗੁਰਮੀਤ ਸਿੰਘ ਨੇ ਉਸ ਨੂੰ ਮੁਹਾਲੀ ਦੇ ਫੇਜ਼-5 ਸਥਿਤ ਰੈਸਟੋਰੈਂਟ ਵਿਚ ਖੁਲਵਾ ਕੇ ਆਪਣੇ ਕਾਰੋਬਾਰ ਵਿਚ ਨਿਵੇਸ਼ ਕਰਨ ‘ਤੇ ਭਾਈਵਾਲੀ ਦੇਣ ਤੇ ਰਕਮ ‘ਤੇ ਵਿਆਜ਼ ਸਮੇਤ ਪੈਸਾ ਸੁਰੱਖਿਅਤ ਵਾਪਸ ਕਰਨ ਦਾ ਭਰੋਸਾ ਦਿੱਤਾ ਸੀ। ਉਸ ਦੇ ਭਰੋਸੇ ਵਿਚ ਆ ਕੇ ਅਮਨ ਨੇ ਮੁਲਜ਼ਮਾਂ ਵਲੋਂ ਦੱਸੇ ਗਏ ਖਾਤਿਆਂ ਵਿਚ ਵੱਖ-ਵੱਖ ਕਿਸ਼ਤਾਂ ਰਾਹੀਂ ਕਰੀਬ 1 ਕਰੋੜ ਰੁ. ਦੀ ਰਕਮ ਟਰਾਂਸਫਰ ਕਰ ਦਿੱਤੀ। ਸ਼ਿਕਾਇਤ ਮੁਤਾਬਿਕ ਰਕਮ ਵਾਪਸ ਨਾ ਹੋਣ ਦੀ ਸੂਰਤ ਵਿਚ ਸਥਾਨਕ ਫੇਜ਼-8 ਸਥਿਤ ਵੀ. ਆਰ. ਐੱਸ. ਫਾਈਨਟੈਕ ਸਕੁਏਅਰ ਦੇ ਸ਼ੋਅਰੂਮ ਨੰ. 119 ਅਤੇ 120 ਨੂੰ ਗਾਰੰਟੀ ਵਜੋਂ ਦੇਣ ਦਾ ਭਰੋਸਾ ਵੀ ਦਿੱਤਾ ਗਿਆ ਸੀ। ਪੁਲਿਸ ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ 40 ਲੱਖ ਰੁ. ਲੈਣ ਵਾਲੇ ਦਿਨ ਹੀ ਦੋਵਾਂ ਸ਼ੋਅਰੂਮਾਂ ਦੀ ਅਲਾਟਮੈਂਟ ਰੱਦ ਕਰਵਾਉਣ ਲਈ ਮੁਲਜ਼ਮਾਂ ਵਲੋਂ ਡਿਵੈਲਪਰ ਨੂੰ ਅਰਜ਼ੀ ਦੇ ਦਿੱਤੀ ਗਈ ਸੀ। ਪੁਲਿਸ ਰਿਕਾਰਡ ਅਨੁਸਾਰ 16 ਅਕਤੂਬਰ ਨੂੰ 40 ਲੱਖ ਰੁ., 17 ਅਕਤੂਬਰ ਨੂੰ 40 ਲੱਖ ਰੁ., 21 ਅਕਤੂਬਰ ਨੂੰ 50 ਹਜ਼ਾਰ ਰੁ. ਅਤੇ 22 ਅਕਤੂਬਰ ਨੂੰ 4.5 ਲੱਖ ਰੁ. ਟਰਾਂਸਫਰ ਕੀਤੇ ਗਏ। ਇਸ ਤੋਂ ਇਲਾਵਾ 14.5 ਲੱਖ ਰੁ. ਮੁਲਜ਼ਮਾਂ ਦੀ ਕੰਪਨੀ ਦੇ ਐੱਚ. ਡੀ. ਐੱਫ. ਸੀ. ਬੈਂਕ ਖਾਤੇ ਵਿਚ ਭੇਜੇ ਗਏ। ਸ਼ਿਕਾਇਤਕਰਤਾ ਦਾ ਦਾਅਵਾ ਹੈ ਕਿ ਮੁਲਜ਼ਮਾਂ ਵਲੋਂ ਉਕਤ ਰਕਮ ‘ਚੋਂ ਸਿਰਫ਼ 15 ਲੱਖ ਰੁ. ਹੀ ਵਾਪਸ ਕੀਤੇ ਗਏ, ਜਦਕਿ ਬਾਕੀ ਰਕਮ ਨਹੀਂ ਮੋੜੀ ਗਈ। ਪੁਲਿਸ ਵਲੋਂ ਬੈਂਕ ਲੈਣ-ਦੇਣ ਤੇ ਸ਼ੋਅਰੂਮਾਂ ਨਾਲ ਸੰਬੰਧਿਤ ਦਸਤਾਵੇਜ਼ਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਮਾਮਲੇ ਦੀ ਜਾਂਚ ਏ. ਐੱਸ. ਆਈ. ਦਵਿੰਦਰ ਸਿੰਘ ਨੂੰ ਸੌਂਪੀ ਗਈ ਹੈ।
