ਚੰਡੀਗੜ੍ਹ, 21 ਮਈ (ਕਪਿਲ ਵਧਵਾ)- ਡਿਊਟੀ ਦੌਰਾਨ ਐਮ.ਸੀ. ਚੰਡੀਗੜ੍ਹ ਦੀ ਮਹਿਲਾ ਐੱਸ.ਡੀ.ਈ. ਪਿ੍ਯੰਕਾ ਦੀ ਗੱਡੀ 'ਤੇ ਪੱਥਰਾਅ ਕਰਨ ਦੇ ਮਾਮਲੇ ਵਿਚ ਸਾਰੰਗਪੁਰ ਥਾਣਾ ਪੁਲਿਸ ਨੇ ਇਕ ਨੌਜਵਾਨ ਸਮੇਤ ਹੋਰਨਾਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ | ਪੁਲਿਸ ਵਲੋਂ ਸਾਂਝੀ ਕੀਤੀ ਜਾਣਕਾਰੀ ਅਨੁਸਾਰ ਸ਼ਿਕਾਇਤਕਰਤਾ ਦੇ ਬਿਆਨਾਂ ਦੇ ਅਧਾਰ 'ਤੇ ਐੱਫ.ਆਈ.ਆਰ ਦਰਜ ਕੀਤੀ ਗਈ ਹੈ | ਸ਼ਿਕਾਇਤਕਰਤਾ ਮਹਿਲਾ ਐੱਸ.ਡੀ.ਈ, ਐਮ.ਸੀ. ਚੰਡੀਗੜ੍ਹ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਦੱਸਿਆ ਕਿ ਉਹ 20 ਮਈ 2026 ਨੂੰ ਮਿਲਕ ਕਾਲੋਨੀ ਧਨਾਸ ਵਿਖੇ ਚੱਲ ਰਹੀ ਡੈਮੋਲਿਸ਼ਨ ਡਰਾਈਵ ਦੌਰਾਨ ਸਰਕਾਰੀ ਡਿਊਟੀ 'ਤੇ ਮੌਜੂਦ ਸੀ | ਇਸ ਦੌਰਾਨ ਵੰਸ਼ ਵਾਸੀ ਮਿਲਕ ਕਾਲੋਨੀ ਧਨਾਸ ਤੇ ਹੋਰਾਂ ਨੇ ਉਨ੍ਹਾਂ ਦੀ ਸਰਕਾਰੀ ਗੱਡੀ 'ਤੇ ਪੱਥਰਾਅ ਕੀਤਾ ਤੇ ਡਿਊਟੀ ਵਿਚ ਰੁਕਾਵਟ ਪੈਦਾ ਕੀਤੀ | ਪੁਲਿਸ ਨੇ ਕਾਰਵਾਈ ਕਰਦਿਆਂ ਮੁਖ ਮੁਲਜ਼ਮ ਵੰਸ਼ (22) ਨੂੰ ਗਿ੍ਫ਼ਤਾਰ ਕਰਕੇ ਵੀਰਵਾਰ ਨੂੰ ਨਿਆਇਕ ਹਿਰਾਸਤ ਵਿਚ ਭੇਜ ਦਿੱਤਾ ਹੈ ਜਦਕਿ ਮਾਮਲੇ ਦੀ ਜਾਂਚ ਜਾਰੀ ਹੈ |
