ਚੰਡੀਗੜ੍ਹ, 16 ਮਈ (ਮਾਰਕੰਡਾ)- ਸੇਲੀਏਕ ਬਿਮਾਰੀ ਜਾਗਰੂਕਤਾ ਦਿਵਸ ਨੂੰ ਮਨਾਉਂਦੇ ਹੋਏ ਪੀ.ਜੀ.ਆਈ. ਚੰਡੀਗੜ੍ਹ ਬੱਚਿਆਂ ਦੇ ਵਿਭਾਗ (ਪੀਡੀਆਟਿ੍ਕ ਗੈਸਟਰੋਐਂਟਰੋਲੋਜੀ ਅਤੇ ਹੈਪੇਟੋਲੋਜੀ) ਵਿਖੇ ਬੱਚਿਆਂ, ਮਾਪਿਆਂ ਅਤੇ ਦੇਖਭਾਲ ਕਰਨ ਵਾਲਿਆਂ ਨੂੰ ਸੇਲੀਏਕ ਬਿਮਾਰੀ ਨਾਲ ਜੁੜੀਆਂ ਬਿਮਾਰੀਆਂ ਦੇ ਸ਼ੁਰੂਆਤੀ ਨਿਦਾਨ, ਲੰਬੇ ਸਮੇਂ ਦੇ ਪ੍ਰਬੰਧਨ ਅਤੇ ਰੋਕਥਾਮ ਬਾਰੇ ਪੀ.ਜੀ.ਆਈ. ਬੱਚਿਆਂ ਵਿਭਾਗ ਦੇ ਮੁਖੀ ਪ੍ਰੋ. ਸਾਧਨਾ ਲਾਲ ਜਾਣਕਾਰੀ ਦਿੱਤੀ | ਉੱਤਰੀ ਭਾਰਤ ਵਿਚ ਇਸ ਬਿਮਾਰੀ ਦੇ ਵੱਧ ਰਹੇ ਬੋਝ ਨੂੰ ਉਜਾਗਰ ਕਰਦੇ ਹੋਏ ਪ੍ਰੋ. ਲਾਲ ਨੇ ਦੱਸਿਆ ਕਿ ਸੇਲੀਏਕ ਬਿਮਾਰੀ ਪੰਜਾਬ, ਹਰਿਆਣਾ, ਹਿਮਾਚਲ ਪ੍ਰਦੇਸ਼, ਰਾਜਸਥਾਨ ਤੇ ਆਸ-ਪਾਸ ਦੇ ਖੇਤਰਾਂ ਵਿਚ ਜੈਨੇਟਿਕ ਸੰਵੇਦਨਸ਼ੀਲਤਾ ਤੇ ਕਣਕ-ਪ੍ਰਮੁੱਖ ਖਾਣ-ਪੀਣ ਦੀਆਂ ਆਦਤਾਂ ਕਾਰਨ ਕਾਫ਼ੀ ਜ਼ਿਆਦਾ ਪ੍ਰਚਲਿਤ ਹੈ | ਚੰਡੀਗੜ੍ਹ ਵਿਚ ਸਕੂਲ-ਅਧਾਰਤ ਸਕ੍ਰੀਨਿੰਗ ਰਾਹੀਂ ਪੀ.ਜੀ.ਆਈ. ਨੇ ਖੋਜ ਵਿਚ ਪਾਇਆ ਕਿ ਹਰ 120 ਬੱਚਿਆਂ ਵਿਚੋਂ ਲਗਭਗ 1 ਨੂੰ ਸੇਲੀਏਕ ਬਿਮਾਰੀ ਹੋ ਸਕਦੀ ਹੈ | ਪ੍ਰੋ. ਲਾਲ ਇਹ ਨੋਟ ਕੀਤਾ ਕਿ ਇਸ ਦੇ ਪ੍ਰਚਲਨ ਦੇ ਬਾਵਜੂਦ, ਬਿਮਾਰੀ ਅਕਸਰ ਘੱਟ ਨਿਦਾਨ ਕੀਤੀ ਜਾਂਦੀ ਹੈ ਕਿਉਂਕਿ ਲੱਛਣ ਅਕਸਰ ਸੂਖਮ ਜਾਂ ਅਸਧਾਰਨ ਹੁੰਦੇ ਹਨ | ਸੇਲੀਏਕ ਬਿਮਾਰੀ ਇਕ ਬਰਫ਼ ਦੇ ਟੁਕੜੇ ਵਾਂਗ ਹੈ, ਜੋ ਦਿਖਾਈ ਦੇਣ ਵਾਲੇ ਲੱਛਣ ਅੰਤਰੀਵ ਬੋਝ ਦਾ ਸਿਰਫ ਇਕ ਛੋਟਾ ਜਿਹਾ ਹਿੱਸਾ ਹਨ | ਬਹੁਤ ਸਾਰੇ ਮਰੀਜ਼ ਸਾਲਾਂ ਤੱਕ ਅਣਪਛਾਤੇ ਰਹਿੰਦੇ ਹਨ | ਜਦੋਂ ਕਿ ਚੁੱਪ ਅੰਦਰੂਨੀ ਨੁਕਸਾਨ ਜਾਰੀ ਰਹਿੰਦਾ ਹੈ | ਇਕ ਵਾਰ ਪਤਾ ਲੱਗਣ 'ਤੇ ਕਣਕ ਤੇ ਕਣਕ-ਅਧਾਰਤ ਉਤਪਾਦਾਂ ਨੂੰ ਖਾਣ ਵਿਚ ਪੂਰੀ ਪਰਹੇਜ ਜ਼ਰੂਰੀ ਹੈ | ਖ਼ੁਰਾਕ ਵਿਚ ਛੋਟੀਆਂ ਗ਼ਲਤੀਆਂ ਵੀ ਅੰਤੜੀਆਂ ਨੂੰ ਨੁਕਸਾਨ ਤੇ ਲੰਬੇ ਸਮੇਂ ਦੀਆਂ ਪੇਚੀਦਗੀਆਂ ਪੈਦਾ ਕਰ ਸਕਦੀਆਂ ਹਨ | ਮਾਪਿਆਂ ਨੂੰ ਸਲਾਹ ਦਿੱਤੀ ਗਈ ਸੀ ਕਿ ਉਹ ਜਵਾਰ, ਬਾਜਰਾ, ਰਾਗੀ, ਮੱਕੀ ਤੇ ਦਾਲਾਂ ਵਰਗੇ ਕੁਦਰਤੀ ਤੌਰ 'ਤੇ ਸੁਰੱਖਿਅਤ ਅਨਾਜਾਂ ਦੀ ਵਰਤੋਂ ਕਰਕੇ ਸੁਰੱਖਿਅਤ ਘਰਾਂ ਵਿਚ ਤਿਆਰ ਕੀਤੇ ਗਲੂਟਨ-ਮੁਕਤ ਭੋਜਨ ਨੂੰ ਤਰਜੀਹ ਦੇਣ | ਜਦੋਂ ਕਿ ਪ੍ਰੋਸੈਸਡ ਤੇ ਪੈਕ ਕੀਤੇ ਭੋਜਨਾਂ ਤੋਂ ਪਰਹੇਜ਼ ਕਰਨ | ਆਪਣੀ ਕੀਤੀ ਖੋਜ ਨੂੰ ਉਜਾਗਰ ਕਰਦੇ ਹੋਏ ਪ੍ਰੋ. ਲਾਲ ਨੇ ਕਿਹਾ ਕਿ ਜਿਨ੍ਹਾਂ ਬੱਚਿਆਂ ਨੂੰ ਘੱਟੋ-ਘੱਟ ਛੇ ਮਹੀਨਿਆਂ ਲਈ ਵਿਸ਼ੇਸ਼ ਛਾਤੀ ਦਾ ਦੁੱਧ ਚੁੰਘਾਇਆ ਜਾਂਦਾ ਹੈ, ਉਨ੍ਹਾਂ ਬੱਚਿਆਂ ਨੂੰ ਇਸ ਬਿਮਾਰੀ ਤੋਂ ਕਾਫ਼ੀ ਨਿਜ਼ਾਤ ਮਿਲਦੀ ਹੈ |
