ਰਾਜਪੁਰਾ, 1 ਜਨਵਰੀ (ਰਣਜੀਤ ਸਿੰਘ)-ਸਬ-ਡਵੀਜ਼ਨ ਰਾਜਪੁਰਾ ਹਲਕੇ 'ਚ ਹੋਈ ਹਲਕੀ ਬਾਰਿਸ਼ ਨੇ ਜਿੱਥੇ ਆਮ ਜਨ-ਜੀਵਨ ਦੀ ਰਫ਼ਤਾਰ ਨੂੰ ਇਕ ਤਰ੍ਹਾਂ ਨਾਲ ਬਰੇਕ ਲਾ ਦਿੱਤੀ ਹੈ ਉੱਥੇ ਹੀ ਇਹ ਬਾਰਿਸ਼ ਹਾੜੀ ਦੀਆਂ ਫ਼ਸਲਾਂ ਖ਼ਾਸ ਤੌਰ 'ਤੇ ਕਣਕ ਦੀ ਫ਼ਸਲ ਲਈ ਰਾਹਤ ਬਣ ਕੇ ਬਹੁੜੀ ਹੈ ਤੇ ਸੋਨੇ 'ਤੇ ਸੁਹਾਗਾ ਸਾਬਤ ਹੋਵੇਗੀ | ਇਸ ਨਾਲ ਕਣਕ ਦਾ ਝਾੜ ਵਧਣ ਦੀ ਆਸ ਨੰੂ ਬੂਰ ਪੈਂਦਾ ਵਿਖਾਈ ਦੇ ਰਿਹਾ ਹੈ | ਜਾਣਕਾਰੀ ਮੁਤਾਬਿਕ ਹਲਕੇ ਦੇ ਪਿੰਡਾਂ ਨੀਲਪੁਰ, ਦਮਨਹੇੜੀ, ਖ਼ਾਨਪੁਰ, ਧਮੋਲੀ, ਖਡੋਲੀ, ਮਦਨਪੁਰ, ਚਲਹੇੜੀ, ਪਹਿਰ, ਨੇਪਰਾਂ, ਫਤਿਹਪੁਰਗੜ੍ਹੀ ਅਤੇ ਹੋਰਨਾਂ ਪਿੰਡਾਂ ਦੇ ਕਿਸਾਨਾਂ ਨੇ 'ਅਜੀਤ' ਨੂੰ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਆਸਮਾਨੀ ਬਾਰਿਸ਼ ਦਾ ਪਾਣੀ ਆਪਣੇ ਨਾਲ ਨਾਈਟਰੋਜਨ ਲੈ ਕੇ ਆਉਂਦਾ ਹੈ ਜੋ ਕਣਕ ਦੇ ਕੁਦਰਤੀ ਫੁਟਾਰੇ ਲਈ ਲਾਹੇਵੰਦ ਹੁੰਦਾ ਹੈ | ਇਸ ਨਾਲ ਕਣਕ ਦਾ ਰੰਗ ਗੂੜਾ ਹਰਾ ਹੋ ਜਾਂਦਾ ਹੈ ਅਤੇ ਕਣਕ ਦੇ ਬੂਟੇ 'ਚ ਜਾਨ ਪੈ ਜਾਂਦੀ ਹੈ | ਬਾਰਿਸ਼ ਕਾਰਨ ਤਾਪਮਾਨ ਵਿਚ ਗਿਰਾਵਟ ਆ ਜਾਂਦੀ ਹੈ | ਇਹ ਗਿਰਾਵਟ ਕਣਕ ਦੇ ਦਾਣੇ ਦੀ ਗੁਣਵੱਤਾ ਅਤੇ ਬੂਟੇ ਦੇ ਵਾਧੇ ਲਈ ਅਨੁਕੂਲ ਹਾਲਾਤ ਪੈਦਾ ਕਰਦੀ ਹੈ | ਬਾਰਿਸ਼ ਕਾਰਨ ਪੱਤਿਆਂ ਉੱਪਰ ਜੰਮੀ ਧੂੜ ਮਿੱਟੀ ਦੇ ਕਣ ਧੋਤੇ ਜਾਂਦੇ ਹਨ | ਇਸ ਨਾਲ ਬੂਟਿਆਂ ਦੀ ਸੂਰਜ ਦੀ ਰੌਸ਼ਨੀ ਸੋਖਣ ਦੀ ਸਮਰੱਥਾ ਵੱਧ ਜਾਂਦੀ ਹੈ | ਇਸ ਸੰਬੰਧੀ ਖੇਤੀ ਮਾਹਿਰਾਂ ਅਤੇ ਕਿਸਾਨਾਂ ਦਾ ਕਹਿਣਾ ਹੈ ਕਿ ਜਿਨ੍ਹਾਂ ਕਿਸਾਨਾਂ ਨੇ ਕਣਕ ਨੂੰ ਦੂਜਾ ਪਾਣੀ ਲਾਉਣਾ ਸੀ ਉਨ੍ਹਾਂ ਲਈ ਇਹ ਬਾਰਿਸ਼ ਡੀਜ਼ਲ ਅਤੇ ਬਿਜਲੀ ਦੀ ਬੱਚਤ ਦੇ ਰੂਪ ਵਿਚ ਲਾਹੇਵੰਦ ਸਾਬਤ ਹੋਈ ਹੈ ਅਤੇ ਕਿਹਾ ਜੇਕਰ ਬਾਰਿਸ਼ ਹਲਕੀ ਹੀ ਰਹਿੰਦੀ ਹੈ ਤਾਂ ਇਹ ਬਾਰਿਸ਼ ਆਲੂਆਂ ਦੀ ਫ਼ਸਲ ਲਈ ਵੀ ਫ਼ਾਇਦੇਮੰਦ ਹੈ ਪਰ ਜੇਕਰ ਖੇਤਾਂ ਵਿਚ ਪਾਣੀ ਖੜ੍ਹ ਜਾਂਦਾ ਹੈ ਤਾਂ ਲੇਟ ਬਲਾਇਟ (ਝੁਲਸ ਰੋਗ) ਦਾ ਖ਼ਤਰਾ ਵੱਧ ਸਕਦਾ ਹੈ | ਹਲਕੇ ਦੇ ਕਿਸਾਨਾਂ ਦਾ ਕਹਿਣਾ ਹੈ ਕਿ ਹਾਲ ਦੀ ਘੜੀ ਇਹ ਬਾਰਿਸ਼ ਕਣਕ ਹਰਾ ਚਾਰਾ, ਸਰੋਂ੍ਹ, ਆਲੂ ਅਤੇ ਹੋਰ ਫ਼ਸਲਾਂ ਲਈ ਲਾਭਦਾਇਕ ਸਾਬਤ ਹੋਵੇਗੀ ਪਰ ਜੇਕਰ ਜ਼ਿਆਦਾ ਬਾਰਿਸ਼ ਪੈਂਦੀ ਹੈ ਅਤੇ ਖੇਤਾਂ ਵਿਚ ਪਾਣੀ ਖੜ੍ਹਨ ਦੀ ਨੌਬਤ ਆ ਜਾਂਦੀ ਹੈ ਤਾਂ ਪਾਣੀ ਦੀ ਨਿਕਾਸੀ ਦਾ ਉਚਿੱਤ ਪ੍ਰਬੰਧ ਕੀਤਾ ਜਾਵੇ |
