ਗੁਰੂਸਰ ਸੁਧਾਰ, 5 ਮਾਰਚ (ਬਲਵਿੰਦਰ ਸਿੰਘ ਧਾਲੀਵਾਲ)-ਥਾਣਾ ਸੁਧਾਰ ਦੇ ਸਹਾਇਕ ਥਾਣੇਦਾਰ ਮਨੋਹਰ ਲਾਲ ਤੇ ਲਧਾਈਕੇ ਬਾਘਾ ਪੁਰਾਣਾ ਦੇ ਮਨਵਿੰਦਰ ਸਿੰਘ ਨਾਲ 38 ਲੱਖ 50 ਹਜ਼ਾਰ ਦੀ ਠੱਗੀ ਦੇ ਮਾਮਲੇ ਵਿਚ ਨਾਮਜ਼ਦ ਸਥਾਨਕ ਸੇਫ ਇੰਮੀਗ੍ਰੇਸ਼ਨ ਕੰਸਲਟੈਟ ਸੁਧਾਰ ਬਾਜ਼ਾਰ ਦੇ ਲਖਵੀਰ ਸਿੰਘ ਵਾਸੀ ਮੁੱਲਾਂਪੁਰ ਤੇ ਰੀਨਾ ਰਾਣੀ ਵਾਸੀ ਆਦਰਸ਼ ਨਗਰ ਅੱਬੂਵਾਲ ਖ਼ਿਲਾਫ਼ 35 ਲੱਖ ਰੁਪਏ ਦੀ ਠੱਗੀ ਮਾਰਨ ਦੇ ਮਾਮਲੇ ਵਿਚ ਥਾਣਾ ਸੁਧਾਰ ਵਿਖੇ ਇਕ ਮੁਕੱਦਮਾ ਦਰਜ ਕੀਤਾ ਗਿਆ ਹੈ | ਪੁਲਿਸ ਜ਼ਿਲ੍ਹਾ ਲੁਧਿਆਣਾ ਦਿਹਾਤੀ ਮੁਖੀ ਨੂੰ ਦਿੱਤੀ ਦਰਖਾਸਤ ਵਿਚ ਪੀੜਤ ਚਰਨਜੀਤ ਸਿੰਘ ਪੁੱਤਰ ਤਾਰਾ ਸਿੰਘ ਵਾਸੀ ਘਮਣੇਵਾਲ (ਜਗਰਾਉਂ) ਨੇ ਦੱਸਿਆ ਕਿ ਇਨ੍ਹਾਂ ਦੋਵਾਂ ਕਥਿਤ ਦੋਸ਼ੀਆਂ ਨੇ ਮੈਨੂੰ ਜਾਅਲੀ ਵਿਆਹ ਕਰਵਾ ਕੇ ਵਿਦੇਸ਼ ਭੇਜਣ ਦਾ ਝਾਂਸਾ ਦਿੱਤਾ ਤੇ ਤੈਅ ਹੋਏ ਸੌਦੇ 45 ਲੱਖ ਰੁਪਏ ਵਿਚੋਂ ਮੈਂ ਫਰਵਰੀ 2024 ਵਿਚ 35 ਲੱਖ ਰੁਪਏ ਕਿਸ਼ਤਾਂ ਵਿਚ ਅਦਾ ਕਰ ਦਿੱਤੇ | ਚਰਨਜੀਤ ਸਿੰਘ ਅਨੁਸਾਰ ਲਖਵੀਰ ਸਿੰਘ ਤੇ ਰੀਨਾ ਰਾਣੀ ਨੇ ਮੇਰਾ ਵਿਆਹ ਕਿਸੇ ਅਣਜਾਣ ਲੜਕੀ ਨਾਲ ਕਰਵਾ ਦਿੱਤਾ | ਦੋ ਸਾਲ ਬੀਤ ਜਾਣ 'ਤੇ ਵੀ ਨਾ ਤਾਂ ਮੈਨੂੰ ਵਿਦੇਸ਼ ਭੇਜਿਆ ਤੇ ਨਾ ਹੀ ਪੈਸੇ ਮੋੜੇ, ਉਲਟਾ ਮੇਰੇ ਉੱਪਰ ਅਦਾਲਤ ਵਿਚ ਤੰਗ, ਪ੍ਰੇਸ਼ਾਨ ਕਰਨ ਦਾ ਕੇਸ ਲਗਾ ਦਿੱਤਾ | ਥਾਣਾ ਮੁਖੀ ਸੁਧਾਰ ਇੰਸਪੈਕਟਰ ਗੁਰਦੀਪ ਸਿੰਘ ਨੇ ਦੱਸਿਆ ਕਿ ਦੋਵੇਂ ਕਥਿਤ ਦੋਸ਼ੀਆਂ ਖ਼ਿਲਾਫ਼ ਆਈ.ਪੀ.ਸੀ. ਦੀ ਧਾਰਾ 406, 420 ਤਹਿਤ ਮੁਕੱਦਮਾ ਦਰਜ ਕੀਤਾ ਗਿਆ ਹੈ |
