ਕੇਂਦਰ ਵਲੋਂ ਸ਼ੁੱਧ ਈਥਾਨੌਲ ਨਾਲ ਚੱਲਣ ਵਾਲੇ ਵਾਹਨਾਂ ਨੂੰ ਮਨਜ਼ੂਰੀ

ਨਵੀਂ ਦਿੱਲੀ, 26 ਅਕਤੂਬਰ (ਪੀ.ਟੀ.ਆਈ.)-ਆਵਾਜਾਈ ਮੰਤਰਾਲੇ ਨੇ ਕੇਂਦਰੀ ਮੋਟਰ ਵਾਹਨ ਨਿਯਮਾਂ ’ਚ ਸੋਧਾਂ ਨੂੰ ਨੋਟੀਫਾਈ ਕੀਤਾ ਹੈ। ਇਸ ਤਹਿਤ ਹੁਣ ਅਜਿਹੇ ਫਲੈਕਸ-ਫਿਊਲ ਵਾਹਨਾਂ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ, ਜੋ ਈ100 ਯਾਨੀ ਲਗਭਗ ਸ਼ੁੱਧ ਈਥਾਨੌਲ ਨਾਲ ਵੀ ਚੱਲ ਸਕਦੇ ਹਨ। ਈ100 ਈਂਧਨ ਨਾਲ ਵਾਹਨ ਲਗਭਗ ਸ਼ੁੱਧ ਈਥਾਨੌਲ ਦੀ ਵਰਤੋਂ ਕਰਕੇ ਚੱਲ ਸਕਦੇ ਹਨ। ਸੜਕ ਆਵਾਜਾਈ ਮੰਤਰਾਲੇ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਈ20 (20 ਫ਼ੀਸਦੀ ਈਥਾਨੌਲ ਮਿਲੇ ਪੈਟਰੋਲ) ਤੋਂ ਵੱਧ ਤੇ ਈ100 ਤੱਕ ਦੇ ਈਂਧਨ ਦੀ ਵਰਤੋਂ ਸਿਰਫ਼ ਉਨ੍ਹਾਂ ਵਾਹਨਾਂ ’ਚ ਕੀਤੀ ਜਾ ਸਕੇਗੀ, ਜਿਨ੍ਹਾਂ ਨੂੰ ਇਸ ਮੰਤਵ ਲਈ ਤਿਆਰ ਕੀਤਾ ਗਿਆ ਹੈ ਤੇ ਜਿਨ੍ਹਾਂ ਨੂੰ ਇਸ ਦੀ ਵਰਤੋਂ ਲਈ ਪ੍ਰਮਾਣਿਤ ਕੀਤਾ ਗਿਆ ਹੈ। ਇਹ ਨਿਯਮ ਹੋਰ ਵਾਹਨਾਂ ’ਤੇ ਲਾਗੂ ਨਹੀਂ ਹੋਵੇਗਾ। ਈ20 ਜਾਂ ਆਮ ਈਂਧਨ ਨਾਲ ਚੱਲਣ ਵਾਲੇ ਵਾਹਨਾਂ ’ਚ ਈ85 ਜਾਂ ਈ100 ਈਂਧਨ ਦੀ ਵਰਤੋਂ ਨਹੀਂ ਕੀਤੀ ਜਾ ਸਕੇਗੀ। ਸੜਕ ਆਵਾਜਾਈ ਤੇ ਰਾਜਮਾਰਗ ਮੰਤਰਾਲੇ ਨੇ ਵਾਹਨਾਂ ਦੀਆਂ ਕੁਝ ਸ਼੍ਰੇਣੀਆਂ ਲਈ ਨਿਰਧਾਰਤ ਹੱਦਾਂ, ਈਂਧਨ ਦੇ ਮਿਆਰਾਂ ਤੇ ਪ੍ਰਦੂਸ਼ਣ ਨਿਕਾਸ ਨਾਲ ਸੰਬੰਧਿਤ ਸਾਰਣੀਆਂ ਤੇ ਜਾਂਚ ਪ੍ਰਕਿਰਿਆਵਾਂ ’ਚ ਵਰਤੇ ਜਾਂਦੇ ਤਕਨੀਕੀ ਹਵਾਲਿਆਂ ’ਚ ਵੀ ਤਬਦੀਲੀਆਂ ਕੀਤੀਆਂ ਹਨ। ਇਸ ਤੋਂ ਇਲਾਵਾ ਸਰਕਾਰ ਨੇ ਇਨ੍ਹਾਂ ਤਬਦੀਲੀਆਂ ਦੇ ਦਾਇਰੇ ’ਚ ਆਉਣ ਵਾਲੇ ਹਲਕੇ ਪੈਟਰੋਲ ਤੇ ਡੀਜ਼ਲ ਵਾਹਨਾਂ ਦੀ ਵਜ਼ਨ ਹੱਦ 3,000 ਕਿਲੋਗ੍ਰਾਮ ਤੋਂ ਵਧਾ ਕੇ 3,500 ਕਿਲੋਗ੍ਰਾਮ ਕਰ ਦਿੱਤੀ ਹੈ।