ਬੁਢਲਾਡਾ, 30 ਦਸੰਬਰ (ਸਵਰਨ ਸਿੰਘ ਰਾਹੀ/ਸੁਨੀਲ ਮਨਚੰਦਾ)-ਸਥਾਨਕ ਸ਼ਹਿਰ ਦੇ ਪਿੰਡ ਦਰੀਆਪੁਰ ਰੋਡ ਤੇ ਇੱਕ ਜੁਮਲਾ ਮਾਲਕ ਜ਼ਮੀਨ ਦੇ ਕਬਜ਼ੇ ਨੂੰ ਲੈ ਕੇ ਨਗਰ ਕੌਂਸਲ ਵਲੋਂ ਦਿੱਤੇ ਗਏ ਨੋਟਿਸ ਦੇ ਵਿਰੋਧ 'ਚ ਇਕੱਠੇ ਹੋਏ ਕਿਸਾਨ ਯੂਨੀਅਨ (ਡਕੌਂਦਾ) ਦੇ ਆਗੂਆਂ ਨੇ ਕਿਹਾ ਕਿ ਉਹ ਕਿਸੇ ਵੀ ਸਰਕਾਰੀ ਅਦਾਰੇ ਜਾਂ ਬੈਂਕ ਵਲੋਂ ਕਿਸਾਨਾਂ ਦੀ ਜ਼ਮੀਨ ਖੋਹਣ ਦੇ ਯਤਨ ਸਫਲ ਨਹੀਂ ਹੋਣ ਦੇਣਗੇ | ਜਥੇਬੰਦੀ ਦੇ ਜ਼ਿਲਾ ਸਕੱਤਰ ਲਛਮਣ ਸਿੰਘ ਚੱਕ ਅਲੀਸ਼ੇਰ, ਬਲਾਕ ਪ੍ਰਧਾਨ ਜੁਗਰਾਜ ਸਿੰਘ ਅਹਿਮਦਪੁਰ, ਇਕਾਈ ਪ੍ਰਧਾਨ ਹਰਦੇਵ ਸਿੰਘ ਬੁਢਲਾਡਾ ਅਤੇ ਅਵਤਾਰ ਸਿੰਘ ਕੁੱਲਰੀਆਂ ਨੇ ਕਿਹਾ ਕਿ ਬੁਢਲਾਡਾ ਸ਼ਹਿਰ ਦੇ ਇਕ ਕਿਸਾਨ ਹਰਮਨਜੀਤ ਸਿੰਘ ਅਤੇ ਯਾਦਵਿੰਦਰ ਸਿੰਘ ਕੋਲ ਪਿਛਲੇ 60-65 ਸਾਲਾਂ ਤੋਂ 25 ਕਨਾਲ਼ਾਂ 19 ਮਰਲੇ ਜੁਮਲਾ ਮਾਲਕਨ ਜ਼ਮੀਨ ਹੈ, ਜਿਸ ਦਾ ਨਗਰ ਕੌਂਸਲ ਨਾਲ ਐਫ.ਸੀ.ਆਰ. ਚੰਡੀਗੜਵਿਖੇ ਕੇਸ ਵੀ ਚੱਲਦਾ ਹੈ ਅਤੇ ਇਸ ਜਗਾ ਲਈ ਉਨਾਂ ਦੇ ਹੱਕ 'ਚ ਸਟੇਅ ਵੀ ਮਿਲੀ ਹੋਈ ਹੈ ਅਤੇ ਜਿਸ ਦੀ ਅਗਲੀ ਪੇਸ਼ੀ 18 ਮਾਰਚ ਤੈਅ ਹੈ ਪ੍ਰੰਤੂ ਨਗਰ ਕੌਂਸਲ ਵਲੋਂ ਇਸ ਜ਼ਮੀਨ ਨੂੰ ਖਾਲੀ ਕਰਨ ਅਤੇ ਕਬਜ਼ਾ ਕਰਨ ਸਬੰਧੀ ਉਨਾਂ ਨੂੰ 30 ਦਸੰਬਰ ਦਾ ਨੋਟਿਸ ਦਿੱਤਾ ਗਿਆ ਸੀ | ਕਿਸਾਨ ਆਗੂਆਂ ਨੇ ਦੱਸਿਆ ਕਿ ਮਾਣਯੋਗ ਸੁਪਰੀਮ ਕੋਰਟ ਦੇ 3 ਮਹੀਨੇ ਪਹਿਲਾਂ ਸਟੇਟ ਆਫ਼ ਹਰਿਆਣਾ ਵਰਸਜ਼ ਜੈ ਸਿੰਘ ਅਤੇ ਹੋਰਨਾਂ ਦੇ ਕੇਸ 'ਚ ਆਏ ਫ਼ੈਸਲੇ ਤਹਿਤ ਜੁਮਲਾ ਮਾਲਕਨ ਜ਼ਮੀਨ 'ਤੇ ਕਾਬਜ਼ ਕਿਸਾਨ ਦੀ ਮਾਲਕੀ ਮੰਨੀ ਜਾਵੇਗੀ | ਕਿਸਾਨ ਆਗੂਆਂ ਨੇ ਕਿਹਾ ਕਿ ਯੂਨੀਅਨ ਵਲੋਂ ਇਸ ਕਿਸਾਨ ਪਰਿਵਾਰ ਦੇ ਹੱਕ 'ਚ ਡਟ ਕੇ ਪਹਿਰਾ ਦਿੱਤਾ ਜਾਵੇਗਾ | ਇਸ ਮੌਕੇ ਭੋਲਾ ਸਿੰਘ ਕੁੱਲਰੀਆਂ, ਦਰਸ਼ਨ ਸਿੰਘ ਪਿੱਪਲੀਆਂ, ਮਨਪ੍ਰੀਤ ਸਿੰਘ, ਚਹਿਲ ਬੰਤਾ ਸਿੰਘ ਚਹਿਲ, ਐਡਵੋਕੇਟ ਹਰਮਨਜੋਤ ਸਿੰਘ ਚਹਿਲ, ਪਾਰਸਵੀਰ ਸਿੰਘ, ਦਿਲਜੋਤ ਸਿੰਘ, ਲਾਭ ਸਿੰਘ ਪਿਪਲੀਆਂ ਆਦਿ ਹਾਜ਼ਰ ਸਨ |
