ਸ਼ਿਖਰ ਦੁਪਹਿਰੇ ਛਾਵਾਂ ਦਾ ਮੁੱਲ ਪੈਂਦਾ ਹੈ,
ਔਖੇ ਵਕਤ ਦੁਆਵਾਂ ਦਾ ਮੁੱਲ ਪੈਂਦਾ ਹੈ |
ਜਿਸ ਵੇਲੇ ਮੰਜ਼ਿਲ 'ਤੇ ਬੰਦਾ ਪੁੱਜਦਾ ਹੈ,
ਤਾਂ ਫਿਰ ਮੁਸ਼ਕਲ ਰਾਹਵਾਂ ਦਾ ਮੁੱਲ ਪੈਂਦਾ ਹੈ |
ਵਿੱਚ ਬੁਢਾਪੇ ਸਾਂਭੇ ਜਾਵਣ ਮਾਪੇ ਜੇ,
ਪੁੱਤ ਦੇ ਕੀਤੇ ਚਾਵਾਂ ਦਾ ਮੁੱਲ ਪੈਂਦਾ ਹੈ |
ਸੀਰਤ ਨੂੰ ਪੁੱਛਦਾ ਹੈ ਅੱਜਕਲ੍ਹ ਕਿਹੜਾ ਜੀ,
ਸੂਰਤ ਨਾਲ ਅਦਾਵਾਂ ਦਾ ਮੁੱਲ ਪੈਂਦਾ ਹੈ |
ਪੰਛੀ ਚਹਿਕਣ, ਫੁੱਲ ਖਿਲਾਰਨ ਮਹਿਕਾਂ ਜਦ,
ਬਾਗ਼ਾਂ ਵਿੱਚ ਫ਼ਿਜ਼ਾਵਾਂ ਦਾ ਮੁੱਲ ਪੈਂਦਾ ਹੈ |
ਹੀਰ ਸਲੇਟੀ ਛਮਕਾਂ ਮਾਰੇ ਰਾਂਝੇ ਨੂੰ ,
ਇਸ਼ਕੇ ਵਿੱਚ ਸਜ਼ਾਵਾਂ ਦਾ ਮੁੱਲ ਪੈਂਦਾ ਹੈ |
ਨਿਕਲੇ ਦਮ ਜੋ ਵਿੱਚ ਥਲਾਂ ਦੇ ਆਸ਼ਿਕ ਦਾ,
ਫ਼ਿਰ ਆਸ਼ਿਕ ਦੇ ਸਾਹਵਾਂ ਦਾ ਮੁੱਲ ਪੈਂਦਾ ਹੈ |
ਸੱਜਣਾਂ ਨਾਲ ਬਿਤਾਏ ਜਿੱਥੇ ਪਲ ਹੋਵਣ,
ਸੱਜਣਾਂ ਪਿੱਛੋਂ ਥਾਵਾਂ ਦਾ ਮੁੱਲ ਪੈਂਦਾ ਹੈ |
ਤਨਹਾਈ ਜਦ ਸ਼ਖਸ ਨੂੰ ਸ਼ਾਇਰ ਕਰਦੀ ਹੈ,
ਲਫ਼ਜ਼ਾਂ ਨਾਲ ਖ਼ਲਾਵਾਂ ਦਾ ਮੁੱਲ ਪੈਂਦਾ ਹੈ |
'ਮੀਤ' ਜਦੋਂ ਕੋਈ ਸੁਣਦਾ, ਮੰਨਦਾ, ਕਰਦਾ ਹੈ,
ਦਿੱਤੀਆਂ ਨੇਕ ਸਲਾਵਾਂ ਦਾ ਮੁੱਲ ਪੈਂਦਾ ਹੈ |
-ਜ਼ਿਲ੍ਹਾ : ਪਠਾਨਕੋਟ | ਮੋਬਾਈਲ : 96220-81262
